شکیل اختر
بی بی سی اردو ڈاٹ کام، دہلی |  |
|  کیا دوبارہ اوما بھارتی کو وزیراعلیٰ بنایا جائے گا؟ |
کرناٹک کی ایک عدالت نے مدھیہ پردیش کی سابق وزیراعلی اوما بھارتی کے خلاف سبھی الزامات واپس لینے کی اجازت دے دی ہے۔ بھارتی گزشتہ ایک ہفتے سے جیل میں تھیں۔ ان کے خلاف 1994 میں کرناٹک کے شہر ہُبلی میں عیدگاہ میں جبری طور پر قومی پرچم لہرانے اور فساد برپا کرنے کا الزام تھا۔ اس واقعہ میں پانچ افراد مارے گۓ تھے۔ اوما بھارتی کے خلاف گرفتاری کا غیر ضمانتی وارنٹ جاری ہونے کے بعد انہیں مدھیہ پردیش کے وزیراعلی کے عہدے سے استعفی دینا پڑا تھا۔ کر ناٹک کی کانگریس حکومت نے گزشتہ ہفتے کہا تھا کہ وہ بھارتی کے خلاف یہ مقدمہ چلائے گی لیکن کل اچانک حکومت نے بنگلور ہائی کورٹ کو بتایا کہ وہ ان کے خلاف سارے الزامات واپس لینا چاہتی ہے۔ کرناٹک حکومت اوما بھارتی کے خلاف مقدمہ واپس لے کر ایک بڑے سیاسی ٹکراؤ سے بچ گئی ہے۔ بی جے پی نے اس معاملے کو ایک بڑی تحریک میں تبدیل کرنے کا منصوبہ بنایا تھا۔ یکم ستمبر سے ایل کے اڈوانی اور وینکیا نائڈو سمیت بی جے پی کے اعلیٰ رہنما اوما بھارتی کی گرفتاری کے خلاف بنگلور میں ہزاروں کارکنوں کے ہمراہ دھرنا دینے والے تھے۔ اوما بھارتی کا معاملہ عیدگاہ میں جبرا داخل ہونے اور فساد برپا کرنے کا تھا لیکن بی جے پی نے اسے ایسا سیاسی رنگ دیا تھا کہ جیسے یہ معاملہ قومی پرچم کی بے حرمتی کا ہو۔ بی جے پی نے اسے ایک تحریک بنانے کا منصوبہ بنایا تھا۔ لیکن مقدمہ واپس لیکر کانگریس نے بی جے پی کو تحریک چلانے سے محروم کر دیا۔ مہاراشٹر میں اکتوبر میں انتخاب ہونے والے ہیں۔ بی جے پی کسی ایسے ہی جذباتی موضوع کی تلاش میں تھی جس کی بنیاد پر وہ اپنے کارکنوں میں جوش پیدا کر سکے۔ مقدمے کی واپسی سے بی جے پی کے لۓ یہ سوال بھی پیدا ہوا ہے کہ وہ اوما بھارتی کو مدھیہ پردیش کا دوبارہ وزیراعلی بنائے یا نہیں۔ بی جے پی کانگریس کے اس فیصلے کو اپنی جیت سےتعبیر کر سکتی ہے لیکن سیاسی طور پر کانگریس نے اس معاملے میں بی جے پی کو مات دی ہے۔ | 
یہ صفحہ دوست کو ای میل کیجیئے
پرِنٹ کریں
