جمعہ کو بھارتی پارلیمان میں کانگرس اور راشٹریا جنتا دل کے ممبران نے بھارتی جانتا پارٹی کی رہنما اور ریاست مدھیہ پردیش کی وزیر اعلیٰ اما بھارتی کے خلاف غیر ضمانتی وارنٹ کا معاملہ اٹھایا اور ان کے استعفی کا مطالبہ کیا۔ اس معاملے کی وجہ سے پارلیمان کی کارروائی دو گھنٹے کے لیے ملتوی کرنی پڑی۔ اس سے پہلے تین دنوں تک حزب اختلاف کے ممبران نے ویر ساورکر کے معاملے کی وجہ سے پارلیمان میں ہنگامہ آرائی کی تھی۔ سابق مرکزی وزیر شیبو سورین کی طرح اما بھارتی کا معاملہ بھی دس سال پرانا ہے۔ بھارتی ریاست کرناٹک کے ضلع ہبلی میں ایک عید گاہ پر ہونے والے حملے کے سلسلے میں اما بھارتی اور دیگر 21 لوگوں کے خلاف مقدمہ درج کیا گیا تھا۔ حکومتی جماعتیں مطالبہ کر رہی ہیں کہ اما بھارتی کے خلاف غیر ضمانتی وارنٹ کی وجہ سے انہیں وزیر اعلیٰ کے عہدے سے استعفی دے دینا چاہیے۔ یاد رہے کہ شیبو سورین کے خلاف جھارکھنڈ کی ایک عدالت نے غیر ضمانتی وارنٹ جاری کیا تھا جس کی وجہ سے حزب اختلاف نے پارلیمان میں ہنگامہ آرائی کر کے انہیں استعفی دینے پر مجبور کر دیا تھا۔ اما بھارتی کے خلاف مقدمہ ہبلی کی ایک عدالت میں چل رہا ہے۔ یہ مقدمہ 15 اگست 1994 کو عدالت میں درج کیا گیا تھا۔ بھارتی اخبار ’ہندو‘ کے مطابق حکومت نے پہلے اما بھارتی اور دیگر افراد کے خلاف درج مقدمات واپس لینے کے لیے درخواست دائر کی تھی لیکن اس کے بعد حکومت نے یہ درخواست واپس لے لی۔ اس معاملے میں عدالت نے پچھلے سالوں میں اما بھارتی، جگدیش شیٹی گار اور دیگر افراد کے خلاف کئی بار غیر ضمانتی وارنٹ جاری کیے ہیں۔ | 
یہ صفحہ دوست کو ای میل کیجیئے
پرِنٹ کریں
