سکھوں کی مقدس کتاب گرو گرنتھ صاحب کی چار سو سالہ تقریبات منانے کے لیے دنیا بھر سے سکھ بھارت کے شہر امرتسر میں اکٹھے ہو رہے ہیں۔ تقریباّ چالیس لاکھ سکھوں کے امرتسر میں آنے کی توقع ہے جہاں ان کی سب سے مقدس زیارت گولڈن ٹیمپل واقعہ ہے۔سکھوں کے لیے گولڈن ٹیمپل اتنا ہی مقدس ہے جتنا کہ مسلمانوں کے لیے مکہ۔ یکم ستمبر کو ہونے والی زیادہ تر تقریبات گولڈن ٹیمپل ہی میں ہوں گی۔ یہ دن سکھوں کے لیے خاص اہمیت کا حامل ہے۔ چار سو سال قبل یکم ستمبر کو سکھوں کے پانچویں گرو ارجن دیو گرو گرنتھ صاحب کو گولڈن ٹیمپل میں لائے تھے۔ گرنتھ صاحب تمام سکھ گرووں کی تعلیمات کا مجموعہ ہے اور سکھ مذہب کے ماننے والوں کے لیے روحانی فیض کا ذریعہ ہے۔ گرنتھ صاحب کو علامتی طور پر دسویں گرو کا درجہ دیا جاتا ہے اور اسے اتنی ہی تعظیم دی جاتی ہے جتنی کہ کسی بھی سکھ گرو کو۔ گولڈن ٹیمپل جسے ہری مندر صاحب بھی کہا جاتا ہے، کے گرد و نواح میں ایک میلے کا سا سماں ہے۔ شہر میں گلیوں اور سڑکوں کو پختہ کیا گیا ہے اور عمارتوں کی دیواروں پر سفیدی کی گئی ہے۔ سکھ یاتریوں کے لیے خصوصی انتظامات کیے گئے ہیں۔ پانچ دنوں کی رسومات میں تقریباّ چار لاکھ سکھوں کی شرکت کی توقع کی جا رہی ہے۔ یہ پہلی بار ہے کہ اتنی بڑی تعداد میں سکھ امرتسر میں اکٹھے ہو ں گے۔ سکھوں کے مذہبی مقامات کی ذمہ دار تنظیم شرومانی گردوارہ پرابندھک کمیٹی اور پنجاب حکومت اس جشن کو یادگار بنانے کے لیے ہر ممکن کوشش کر رہی ہے۔ اس موقع پر خاص یادگاری سکے جاری کیے جا رہے ہیں۔ گولڈن ٹیمپل اور اس کے کمپلیکس کی دوسری عمارتوں پر چراغاں کیا گیا ہے اور آتش بازی اور لیزر شو کے لیے خصوصی انتظامات کیے گئے ہیں۔ گرو گرنتھ صاحب کی فلاسفی اور تعلیمات پر ایک سیمینار، مذہبی پینٹنگز کی نمائش اور ایک بڑے اجتماع کا بھی اہتمام کیا گیا ہے جس میں اہم مذہبی، سیاسی اور سماجی شخصیات، جن میں بھارت کے وزیراعظم من موہن سنگھ بھی شامل ہیں، خطاب کریں گی۔ جشن کے موقع پر سات ہزار سے زائد پولیس اہلکار شہر میں تعینات کیے گئے ہیں۔ | 
یہ صفحہ دوست کو ای میل کیجیئے
پرِنٹ کریں
