 |  کشمیر کے عسکریت پسند گروپ حالیہ الیکشن کا بائیکاٹ کر رہے ہیں۔ |
ہندوستان کے زیر انتظام کشمیر میں پولیس کا کہنا ہے کہ سابق وفاقی وزیر مقبول ڈار ایک قاتلانہ حملے میں بچ گئے ہیں۔ مقبول ڈار حالیہ الیکشن میں اننت ناگ کے ایک حلقے سے آزاد امیدوار کے طور پر انتخابات لڑ رہے ہیں۔ سری نگر سے بی بی سی کے نامہ نگار کا کہنا ہے پولیس کے مطابق مقبول ڈار جب اپنے حلقے کا دورہ کر ہے تھے تو عسکریت پسندوں نے واچی کے علاقے میں ان کے قافلے پر گرنیڈ سے حملہ کیا۔ مسٹر ڈار اس حملے میں بچ گئے جبکہ ان کے دو سیکورٹی گارڈ اور ایک شہری زخمی ہوگئے۔ اس حملے کے بعد فائرنگ بھی ہوئی لیکن یہ واضح نہیں کہ یہ پولیس کی طرف سے کی گئی یا عسکریت پسندوں نے کی۔ مقبول ڈار سن انیس سو پچانوے کے الیکشن میں اننت ناگ سے جنتا دل کے امیدوار کے طور پر کامیاب ہوئے تھے اورانہوں نے جونیئر وزیرداخلہ کے فرائض بھی انجام دئے تھے۔ ابھی تک کسی بھی عسکریت پسند گروپ نے اس حملے کی ذمہ داری قبول نہیں کی ہے۔ اس سے پہلے سری نگر کے قریب پمپور کے علاقے میں عسکریت پسندوں کے طرف سے ایک پولیس کی گاڑی پر گرنیڈ حملے میں بارہ شہری زخمی ہوگئے تھے۔ دوسری طرف عسکریت پسند گروپوں نے حالیہ الیکشن میں ووٹرں کے کم ٹرن آؤٹ پر اطمینان ظاہر کیا ہے۔ان گروپوں نے الیکشن کا بائیکاٹ کیا ہے اور ان کا کہنا ہے کہ الیکشن کشمیر کے مسئلے کا حل نہیں ہے۔ | 
یہ صفحہ دوست کو ای میل کیجیئے
پرِنٹ کریں
