آندھرا پردیش: وزیر اعلی لاپتہ

ہندوستان کی ریاست آندھرا پردیش کی حکومت نے لوگوں سے اپیل کیا ہے کہ وہ ریاست کے وزیراعلی راج شیکھر ریڈی کو تلاش کرنے میں ان کی مدد کریں۔

وزیراعلی راج شیکھر ریڈی کا ہیلی کاپٹر صبح ساڑھے نو بجے سے لاپتہ ہے جس پر وہ حیدرآباد سے روانہ ہوئے تھے۔ تقریبا ساڑھے سات گھنٹے گزر جانے کے بعد بھی ان کا پتہ نہیں چل سکا ہے۔

حیدرآباد میں ایک پریس کانفرنس سے خطاب کرتے ہوئے ریاست کے وزیرخزانہ روزیّا نے کہا کہ '' ان کی تلاش کے لیے سات ہیلی کاپٹر بھیجے گئے ہیں لیکن ابھی تک پتء نہیں چل سکا ہے۔''

ہندوستان کے ذرائع ابلاغ میں صبح ہی سے ہیلی کاپٹر لاپتہ ہونے کے متعلق مختف طرح کی خبریں نشر کی جا رہی تھیں لیکن دوپہر بعد ریاستی حکومت اور دلی میں کانگریس پارٹی نے اس بات کی تصدیق کر دی ہے کہ آندھر پردیش کے وزیراعلی ڈاکٹر راج شیکھر ریڈی کا ہیلی کاپٹر جب سے لاپتہ ہے تب سے ان سے کسی طرح کا بھی رابطہ نہیں ہو سکا ہے۔

دلی میں کانگریس پارٹی نے ایک پریس کانفرنس میں مسٹر شیکھر کی گمشدگی پر صدمہ کا اظہار کیا ہے اور کہا ہے کہ پارٹی کی صدر سونیا گاندھی کو اس پر افسوس ہے۔

حالیہ عام انتخابات میں راج شیکھ ریڈی نے اپنی ریاست سے کانگریس پارٹی کو کامیابی دلانے میں اہم رول ادا کیا تھا اور خود بھی دوبارہ اقتدار میں آنے میں کامیاب ہوئے تھے۔ کہا جاتا ہے کہ سونیا گاندھی اپنی پارٹی کے تمام وزراء اعلی میں مسٹر شیکھ پر سب سے زیاد اعتماد رکھتی ہیں۔

اطلاعات کے مطابق اس ہیلی کاپٹر میں وزیراعلی کے ساتھ ان کے چیف سکریٹری، ایک سینیئر افسر اور دو پائلٹ سوار تھے۔

حیدرآباد کے بیگم پیٹ ایئرپورٹ سے ہیلی کاپٹر ساڑھے آٹھ بجے پرواز کیا تھا اور وزیر اعلی کو چتّور کے ایک پروگرام میں شرکت کے لیے پونے گیارہ بجے پہنچنا تھا۔ لیکن حکام کے مطابق ساڑھے نو بجے کے بعد ہی اس سے رابطہ منقصع ہوگیا۔

چتّور کے بیشتر علاقوں میں موسلا دھار بارش ہورہی ہے اور اسی علاقے میں نلّا ملاّ نامی مشہور جنگلات ہیں جو ماؤنوازوں کی سرگرمیں کے لیے جانے جاتے ہیں۔