ریحانہ بستی والا بی بی سی اردو ڈاٹ کام، ممبئی

	ایمان علی حال ہی میں ریلیز پاکستانی فلم ’ خدا کے لیے‘ میں نظر آئیں ہیں‎

ایمان علی حال ہی میں ریلیز پاکستانی فلم ’ خدا کے لیے‘ میں نظر آئیں اور انڈیا میں اس فلم کی نمائش کے بعد فلمی تجزیہ نگاروں نے ان کے کام کی تعریف کی ہے۔

مظفر علی کی فلم میں ایک اہم رول ملنے پر لوگ انہیں خوش قمست تصور کر رہے ہیں کیونکہ علی کی فلم امراؤ جان میں اداکارہ ریکھا نے کام کیا تھا اور ان کی یہ فلم بہت مقبول ہوئی تھی اور انہيں نیشنل ایوارڈ سے بھی نوازا گیا تھا۔

فلم کی تیاریوں میں مصروف مظفر علی نے بی بی سی سے بات کرتے ہوئے بتایا کہ ’نور جہاں کے کردار کے لیے ایمان کا انتخاب ہو چکا ہے اور جہانگیر کے کردار کے لیے تین اداکاروں کے نام ہیں‘۔

فلم تاریخ پر مبنی ہے اس لیے اس پر ریسرچ بھی جاری ہے۔مظفر علی کے مطابق فلم ابھی ابتدائی مراحل میں ہے اس لیے اس پر بہت کچھ کہنا مناسب نہیں ہے۔

ذرائع کا کہنا ہے کہ مظفر علی فلم کی کچھ شوٹنگ پاکستان میں کرنا چاہتے ہیں کیونکہ وہ اپنی فلم میں اس دور کو دکھانے کی کوشش کریں گے جب جہانگیر نے اپنے دور حکومت میں کچھ وقفے کے لیے لاہور میں قیام کیا تھا۔اس لیے لاہور میں شوٹنگ کے لیے کچھ مقامات کا انتخاب جاری ہے۔