حنیف قریشی کو عالمی سطح پر پزیرائی انیس سو پچاسی میں ملی

اس سال کی ملکہ کی آنرز لسٹ میں شامل کیے جانے والے حنیف قریشی انیس سو چون میں لندن میں پیدا ہوئے۔ ان کے والد کا تعلق پاکستان سے ہے اور والدہ برطانوی ہیں اور حنیف قریشی کِنگز کالج لندن سے فلسفہ میں ڈگری یافتہ ہیں۔

بطور ادیب انہوں نے اپنے کیرئر کا آغاز انٹونیو فرنچ (Antonio French) کے قلمی نام سے فحش کہانیاں لکھنے سے کیا جبکہ ان کا پہلا ڈرامہ انیس سو چھہتر میں لندن کے مشہور رائل ایلبرٹ ہال میں پیش کیا گیا۔

چھ سال بعد وہ رائل ایلبرٹ ہال کے ساتھ رائٹر اِن ریزیڈنس (Artist in Residence ) کی حیثیت سے منسلک ہو گئے۔ حنیف قریشی کو عالمی سطح پر پزیرائی انیس سو پچاسی میں ملی جب ان کی لکھی ہوئی فلم مائی بیوٹیفُل لانڈریٹ (My Beautiful Laundrette ) کو اکیڈمی ایوارڈ کے لیے نامزد کیا گیا۔

اس فلم کے ہدایتکار سٹیفن فریئرز تھے اور اس کی کہانی ایک پاکستانی نژاد برطانوی لڑکے اور ایک ہم جنس پرست برطانوی کے گرد گھومتی ہے۔

	دی بدھا آف سُبوریا کے مرکزی اداکار

حنیف قریشی کا انیس سو نوے میں شائع ہونے والا پہلا ناول دی بدھا آف سُبوریا (The Buddha of Suburbia) بین الاقوامی سطح پر سب سے زیادہ فروخت ہونے والی کتابوں میں سے تھا اور اسے ’وِٹبریڈ‘ ایوارڈ بھی ملا۔

کہا جاتا ہے کہ یہ ناول کسی حد تک حنیف قریشی کی خود نوشت ہے۔ اس ناول کا مرکزی کردار بھی ایک ہم جنس نوجوان لڑکا ہے جس کا باپ ایشیائی اور ماں برطانوی ہوتی ہے اور وہ انیس سو ستّر کی دہائی میں لندن میں بڑا ہوتا ہے۔

اس ناول کو بی بی سی نے انیس سو ترانوے میں چار قسطوں پر مشتمل ایک ڈرامے کی شکل میں پیش کیا تھا۔

حنیف قریشی کا دوسرے ناول ’بلیک ایلبم (Black Album) کا مرکزی خیال انیس سو اسی کی دہائی میں برطانیہ میں رہنے والے مسلمانوں کے مسائل سے متعلق ہے۔

آسکر کے لیے نامزدگی
انیس سو اٹھاسی میں حنیف قریشی کا ایک اور ناول انٹیمیسی (Intimacy) شائع ہوا جس سے متاثر ہو کر ایک فلم بھی بنائی گئی۔ اس کے بعد ان کا ایک ڈرامہ دی مدر (The Mother) بھی خاصا مشہور ہوا جس کی کہانی ایک ادھیڑ عمر کی خاتون اور ایک جوان مزدور شخص کے درمیان شادی کے گرد بُنی ہوئی ہے۔ اس ڈرامے پر بھی فلم بنائی گئی جس میں جیمز بانڈ سیریز کے اداکار ڈینئل کریگ نے ایک مرکزی کردار ادا کیا۔

دو ہزار چھ میں حنیف قریشی نے ایل فلم وینس (Venus) کا سکرین پلے لکھا جس کے مرکزی اداکار پیٹر او ٹُولی کو پہلی فلم میں بہترین اداکاری کے لیے آسکر، بیفٹا اور گولڈن گلوب کے ایواراڈز کے لیے نامزد کیا گیا۔

حنیف قریشی کا اگلا ناول سمتھِنگ ٹو ٹیل یو ( Something to Tell You) دو ہزار آٹھ میں شائع ہو رہا ہے۔