سٹین لی کے کردار سپائڈر مین نے زبردست کاروبار کیا تھا

کومک کتابوں کی مشہور عالم شخصیت چھیاسی سالہ سٹین لی ڈزنی کی نئی فلموں، کمپیوٹر گیمز، کتابوں اور دیگر منصوبوں کے لیے اچھوتے کردار بنائیں گے۔

سٹین لی کا کہنا تھا ’میرے پاس اس قسم کے لاکھوں کردار ہیں، میری الماریاں فلموں، ٹی وی شوز اور اس قسم کی دیگر چیزوں کے لیے انوکھے کرداروں سے بھری پڑی ہے۔ میں ڈزنی جیسے ادارے کے ساتھ منسلک ہونے کے لیے منتظر تھا تا کہ میں کرداروں کے اس خزانے کو منظر عام پر لا سکوں۔‘

سپائڈر مین اور ایکس مین سلسلوں کی چھ فلمیں دنیا بھر میں ساڑھے تین ارب ڈالر کا کاروبار کر چکی ہیں۔

فینٹاسٹِک فور (Fantastic Four) سلسلے کی دوسری فلم نمائش کے لیے پیش ہونے والی ہے جبکہ سٹین لی اور ان کے معاونوں کے باقی کرداروں، مثلاً دی انکریڈیبل ہلک (The Incredible Hulk)، آئرن مین (Iron Man) اور تھور اینڈ نِک فری (Thor and Nick Fury) کو بھی فلموں میں ڈھالا جا رہا ہے۔

	فینٹاسٹِک فور کے کرداروں پر مبنی فلم جلد ہی منظر عام پر آ رہی ہے

سٹین لی کی اپنی کمپنی ’پاؤ انٹرٹینمنٹ‘ کے مطابق ان کے ہاں تقریباً بیس کردار ایسے ہیں جو تیاری کے آخری مراحل میں ہیں۔ اس کے علاوہ بیس دیگر سُپر ہیرو ابتدائی مراحل میں ہیں جبکہ ان کے علاوہ چالیس اور ایسے ہیروز بھی ہیں جنہیں کمپنی جلد ہی متعارف کرانا چاہتی ہے۔

ڈزنی کے ساتھ معاہدے کے باوجود سٹین لی کے ایک حالیہ کردار سٹرپیریلا (Stripperela) کو ڈزنی فلموں میں نہیں لیا جائے گا۔