ریحانہ بستی والا بی بی سی اردو ڈاٹ کام، ممبئی

	شاہ رخ خان نے اپنے پروگرام کی تشہیر کے لیے ایک میوزک ویڈیو بھی بنایا ہے

پروگرام کے حوالے سے ناظرین کی بے چینی کی ایک وجہ تو پروگرام کی اپنی مقبولیت ہے لیکن اصل وجہ یہ ہے کہ اب اس پروگرام کو امیتابھ بچن کی بجائے بالی وڈ کے’ کنگ خان‘ کہلانے والے شاہ رخ خان پیش کریں گے۔

امیتابھ بچن کو اگر بالی وڈ کا لیجنڈ کہا جا تا ہے تو شاہ رخ کو نئی نسل اپنا ’آئیکون‘ مانتی ہے اور وہ بھارت سمیت برصغیر کی نوجوان نسل میں بے حد مقبول ہیں۔

جب یہ پروگرام شروع ہو گا تو ایسے ناظرین کی بھی کمی نہیں ہوگی جو یہ دیکھنا چاہیں گے کہ شاہ رخ اسے کس انداز میں پیش کرتے ہیں اور کیا وہ لوگوں کے دل و دماغ سے امیتابھ بچن کا اثر کم کرنے میں کامیاب ہو پاتے ہیں یا نہیں۔

شاہ رخ خان نے چینل سے معاہدے کے بعد سے ہی پروگرام کی میزبانی کی پریکٹس شروع کر دی تھی۔ ان کے گھر پر پروگرام کا سیٹ بنایا گیا تھا اور ’ہاٹ سیٹ‘ پر اکثر ان کے دوست بیٹھتے رہے جن میں ہدایت کار فرح خان، فرحان اختر کے علاوہ ان کا اپنا بیٹا آرین اور بیٹی سوہانہ بھی شامل ہیں۔

پروگرام شروع ہونے سے پہلے شاہ رخ خان کے شائقین بہت خوش ہیں۔بیس سالہ نازیہ شیخ کی خوشی کی انتہا نہیں۔ وہ کہتی ہیں کہ’شاہ رخ ہم سب سہیلیوں کا ہیرو ہے۔ ہم سب نے ایک ساتھ مل کر پروگرام دیکھنے کا فیصلہ کیا ہے اس لئے سب میرے گھر جمع ہو رہے ہیں‘۔

سلمان انصاری کمپیوٹر انجینئر ہیں۔ انہوں نے اس سے پہلے کون بنےگا کروڑ پتی شو دیکھا تھا جس کے میزبان امیتابھ بچن تھے۔ سلمان کہتے ہیں’شاہ رخ نوجوان ہیں اس لیے پروگرام میں یقیناً نیا پن ہوگا اور انداز بھی دلچسپ ہوگا۔ امیت جی کے پروگرام دیکھ کر ایسا لگتا تھا کہ آپ اسکول میں بیٹھے استاد کے سوالوں کے جواب دے رہے ہوں‘۔

	شاہ رخ کے گھر میں ہاٹ سیٹ پر فرح خان بھی بیٹھیں

شاہ رخ خان نے اپنے پروگرام کی تشہیر کے لیے ایک میوزک ویڈیو بھی بنایا ہے
جو افتتاحی پروگرام سے پہلے دکھایا جائے گا۔ اس کی لائن ہے ’ کر لے، کر لے تو ایک سوال‘ اور اس میں رقص کی ہدایات مشہور کوریوگرافر گنیش ہیگڈے نے دی ہیں۔

’کون بنے گا کروڑ پتی‘ وہ ٹی وی شو ہے جو امیتابھ بچن کے کیرئر میں ایک سیڑھی ثابت ہوا تھا۔ انہوں نے یہ شو اس وقت کیا تھا جب ان کا بالی وڈ میں کیرئر تقریباً ختم ہوگیا تھا اور ان کی اپنی کمپنی ’اے بی سی ایل‘ دیوالیہ ہو چکی تھی۔

اس شو نے جہاں ایک بار پھر ان کا کیرئر بنا دیا تھا وہیں امیتابھ بچن کی وجہ سے ٹی وی چینل کو بھی بے انتہا فائدہ ہوا تھا۔ امیتابھ نے بعد ازاں ’ کے بی سی ٹو‘ بھی کیا لیکن بیماری کے باعث وہ اسے جاری نہ رکھ سکے اور بعد میں اس کی میزبانی شاہ رخ خان کو دے دی گئی تھی۔