جولی، ڈینیئل پرل کی بیوہ میریئین کا کردار ادا کریں گی۔

اکتیس سالہ جولی اپنی فلم ’ اے مائٹی ہارٹ‘ کی شوٹنگ، عنقریب شروع کرنے والی ہیں۔ یہ فلم دو ہزار دو میں، امریکی صحافی، ڈینیئل پرل کے پاکستان میں اغواء اور قتل کی کہانی پر مبنی ہے۔

پاکستان میں سکیورٹی کے خدشات کی وجہ سے جولی کو اس فلم کی عکس بندی بھارت میں کرنی پڑے گی۔

انہوں نے اپنے بیان میں کہا ہے کہ ’میں اس بات مایوس ہوئی ہوں کہ ہم فلم کی شوٹنگ پاکستان میں نہیں کر سکتے۔ وہ ملک جس سے میں محبت کرتی ہوں اور جس کا میں نے تین دفعہ دورہ بھی کیا ہے۔‘

یہ بیان اینجلینا جولی کے مشیر ٹریور نیلسن نے ان کی طرف سے جاری کیا ہے۔

ٹریور نے خبر رساں ادارے رائٹرز کو بتایا کہ ’ انہوں نے ( فلم سازوں نے) پاکستانی حکومت کے ہر درجے پر بات کرنے کی کوشش کی ہے۔ کسی نے بھی بُرا تو نہیں منایا لیکن یہ بات واضح تھی کی فلم کی شوٹنگ بھارت میں کرنا بہتر ہو گی۔‘

اس فلم کے ہدایتکار مائیکل وِنٹر باٹم ہیں اور جولی، ڈینیئل پرل کی بیوہ، میریئین کا کردار ادا کر رہی ہیں۔

	ڈینیئل پرل کو کراچی میں اغواء کے بعد قتل کر دیا گیا۔

اینجلینا جولی، جمعرات کو اپنے شوہر بریڈ پِٹ اور تین بچوں کے ہمراہ بھارت کے شہر پونے پہنچیں۔ بریڈ پِٹ اس فلم کے پروڈیوسرز میں شامل ہیں۔

وال سٹریٹ جرنل کے اڑتیس سالہ رپورٹر، ڈینئیل پرل کو سن دو ہزار دو میں ایک خبر کی تحقیق کے دوران کراچی میں اغواء کیا گیا تھا اور بعد میں انہیں قتل کر دیا گیا۔

’اے مائٹی ہارٹ‘ کی کہانی اس کتاب سے اخذ کی گئی ہے جسے ڈینیئل پرل کی بیوہ نے ان کے قتل کے بعد لکھا تھا۔

فلم میں ڈینیئل پرل کی پاکستان میں موجودگی کی وجہ، ان کا اغواء اور ان کی رہائی کے لئے ان کی بیوہ کی کوششوں کو دکھایا جائے گا۔

اپنے بیان میں اینجلینا جولی نے یہ بھی کہا ہے کہ ’اے مائٹی ہارٹ‘ فلم، مختلف ثقافتوں کے درمیان سمجھوتے اور ان اقدار کی کہانی ہے جو تمام عقائد کے لوگوں میں مشترک ہیں۔