سر پال میکارٹنی اور سابق ماڈل ہیتھر ملز کے درمیان سن 2002 میں شادی ہوئی تھی

بدھ کے روز ایک مشترکہ بیان میں انہوں نے کہا ہے کہ میڈیا کی طرف سے ان کی نجی زندگی میں مسلسل مداخلت کے بعد ان کے لیئے نارمل تعلق برقرار رکھنا مشکل ہوتا جا رہا تھا۔

سر پال میکارٹنی اور سابق ماڈل ہیتھر ملز کے درمیان سن 2002 میں شادی ہوئی تھی اور ایک سال بعد ہی ان کے ہاں ایک بیٹی پیدا ہوئی تھی۔

اپنے بیان میں انہوں نے کہا کہ ہم نے روزانہ پیش آنے والے سخت دباؤ کے باوجود اپنے تعلقات کو برقرار رکھنے کی کوشش کی ہے لیکن اب بھاری دل سے ہم نے علیحدگی کا فیصلہ کیا ہے۔

اپنے ایک علیحدہ بیان میں سر پال میکارٹنی نے اس تاثر کو غلط قرار دیا ہے کہ ان کی اہلیہ نے ان سے دولت کی خاطر شادی کی تھی۔

’کتنے دُکھ کی بات ہے کہ چند غیر ذمہ دار لوگ ایسے موقع پر بھی غلط افواہیں پھیلا رہے ہیں۔‘

سرپال میکارٹنی کی شہرت پانچ دہائیوں پر محیط ہے۔ بیٹلز کے ایک رکن کی حیثیت سے انہوں نے ساٹھ کی دہائی میں بہت شہرت حاصل کی تھی۔

انہیں سن 1997 میں سر کے خطاب سے نوازہ گیا تھا۔ ان کی ذاتی دولت کی اندازہ 80 کروڑ پاؤنڈ سے زائد لگایا جاتا ہے۔

اس سے پہلے سرپال میکارٹنی کی شادی لنڈا ایسٹ مین سے ہوئی تھی جو لنڈا کی سن 1998 میں بریسٹ کینسر کے باعث موت تک برقرار رہی۔

پہلی شادی سے سرپال میکارٹنی کے تین بچے ہیں۔