 |  انتظامیہ کو امید ہے کہ اسے کنسرٹ کے انعقاد میں ویلز کی حکام کی حمایت حاصل ہو گی۔ |
برطانیہ کے شہر کارڈِف میں واقع ملینیئم سٹیڈیم کی انتظامیہ سونامی سمندری طوفان کے متاثرین کی امداد کے لیے ایک کنسرٹ کرانے کی کوشش کر رہی ہے۔ سٹیڈیم انتظامیہ کو امید ہے کہ بائیس جنوری کو ہونے والے کنسرٹ سے سونامی کے متاثرین کے لیے دس لاکھ پاؤنڈ جمع ہو جائیں گے۔ انتظامیہ کو امید ہے کہ اسے کنسرٹ کے انعقاد کے سلسلے میں ویلز کے حکام کی حمایت بھی حاصل ہو گی۔ سٹیڈیم کے مینیجر پال سرجنٹ کا کہنا ہے کہ تین ہفتے کے مختصر عرصہ میں کنسرٹ کی تیاری کرنا ایک مشکل کام ہے۔ پال سرجنٹ کے مطابق سٹیڈیم کا عملہ پیر کے روز عام تعطیل کے باوجود کام کررہا ہے تاکہ کنسرٹ کے انعقاد کو ممکن بنایا جاسکے۔ ’سونامی سمندری طوفان کے بعد عوامی سطع پر زبردست ردعمل سامنے آیا ہے۔ اب ہماری بھی کوشش ہے کہ متاثرین کی امداد کے لیے کیے جانے والے کام کو آگے بڑھائیں۔‘ ویلز فرسٹ منسٹر روڈری مورگن نے پہلے ہی کنسرٹ کے انعقاد کی حمایت کر دی ہے جبکہ ویلش لبرل ڈیموکریٹ لیڈر مائیک جرمن کنسرٹ کی تجویز دینے والوں میں شامل ہیں۔ | 
یہ صفحہ دوست کو ای میل کیجیئے
پرِنٹ کریں
