مظہر زیدی بی بی سی اردو ڈاٹ کام، بوسٹن، میساچیوسٹ

پف ڈیڈی جینیفر لوپیز کے ساتھ

کروڑ پتی سیاہ فام سِنگر کی طرف سے چلائی جانے والی مہم نے، جس کے زیادہ تر اخراجات وہ خود برداشت کررہے ہیں، امریکہ کے سیاہ فام ووٹروں کو ایک نیا نعرہ دیا ہے، ’وٹ ڈالو یا مر جاؤ’۔

ان کا کہنا ہے کہ اس نعرے کا مقصد سیاہ فام آبادی کو یہ آگاہی دینا ہے کہ اگر وہ متحرک ہو کر ووٹ نہیں ڈالیں گے تو ان کی حالت زار بہتر نہیں ہوگی۔

لیکن پف ڈیڈی کے ناقدین کا کہنا ہے کہ اس مہم میں یہ نعرہ جس طرح سے پیش کیا جارہا ہے اس سے لوگوں کو یہ پیغام مل رہا ہے کہ اگر سیاہ فاموں نے صدر بُش کو ووٹ ڈالا تو یہ ان کی موت کے مترادف ہوگا۔

اگرچہ پف ڈیڈی کا کہنا ہے کہ وہ ڈیموکریٹ اور ری پبلکن دونوں ہی امیدواروں سے مایوس ہیں اور کسی ایک کی حمایت نہیں کررہے لیکن یہ بھی ایک حقیقت ہے کہ ان کی اس مہم میں کام کرنے والے کئی سینئیر اہلکار ڈیموکریٹ ہیں۔

پف ڈیڈی کی اس مہم میں ان کے دوستوں اور ہالی وڈ کے کئی مشہور سٹار بھی شرکت کر رہے ہیں جن میں فلم ٹائی ٹینیک سے شہرت پانے والے لیونارڈو ڈی کاپریو بھی شامل ہیں جنہوں نے کھلے طور پر ڈیموکریٹ پارٹی کی حمایت کی ہے۔

امریکہ کی سیاہ فام آبادی جن میں خاص طور پر نوجوانوں میں پف ڈیڈی دیوانگی کی حد تک مقبول ہیں یہ مہم بظاہر کامیاب دکھائی دے رہی ہے لیکن پف ڈیڈی کتنے سیاہ فاموں کو اپنے گھروں سے پولنگ سٹیشن تک لے جانے میں کامیاب ہوتے ہیں اس کا اندازہ اگلے چوبیس گھنٹوں میں ہی ہو سکے گا۔