کیا اس بار بھارت کو آسکر مل سکے گا؟ ’جل‘ آزادانہ طور پر شامل

آسکر میں غیر ملکی زبان کے درجے میں بھارت کی جانب سے باضابطہ طور پر تو ’لايرز ڈائس‘ (Liar's Dice) کو شامل کیا گیا ہے لیکن گریش ملک کی ہندی فلم ’جل‘ کو آزادانہ طور پر شامل کیا گیا ہے۔

اس فلم کو بیسٹ ’اوریجنل سکور‘ کے لیے بھی نامزد کیا گیا ہے۔ فلم میں پورب کوہلی، کیرتی كلہري اور تنشٹھا چیٹرجی کے اہم کردار ہیں۔

’جل‘ یعنی پانی نامی اس فلم کی رن آف كچھ میں فلم بندی کی گئی ہے۔

بی بی سی سے بات کرتے ہوئے جل کے ہدایت کار گریش نےبتایا: ’میں تو لايرز ڈائس کی ٹیم کو بھی نیک خواہشات دیتا ہوں۔ ہندوستان کے حصہ میں ایک آسکر تو آنا ہی چاہیے۔‘

آسکر کے پلیٹ فارم پر ’جل‘ کا مقابلہ ’انٹرسٹیلر‘، ’ایگزوڈس‘، اور ’300 رائز آف امپا‏ئر‘ جیسی فلموں سے ہوگا۔

قومی سطح پر انعام یافتہ فلم ’جل‘ کے آزادانہ طور پر آسکر کے لیے بھیجے جانے پر انھوں نے کہا: ’جہاں تک میں جانتا ہوں غیر ملکی زبان کے زمرے میں فلم فیڈریشن آف انڈیا صرف ایک ہی فلم بھیج سکتی ہے۔ گيتو موہن داس کی فلم لايرز ڈائس بہت عمدہ ہو گی جبکہ جل کو کوریا سے لے کر بوسان تک بہت سراہا گیا ہے۔ کیمرہ ورک سے لے کر ڈائلاگ تک کو تجزیہ نگاروں نے سراہا۔ اس لیے میں نے اسے عالمی سطح پر لے جانے حوصلہ دکھایا۔‘

اس سے پہلے بھارت کی جانب سے آسکر کی دوڑ میں آخری نمبر تک پہنچ کر ناکام رہنے والی فلموں میں ’مدر انڈیا‘ اور ’لگان‘ شامل ہیں۔

گریش اپنی فلم کے بارے میں بہت پرامید ہیں۔ انھیں یقین ہے کہ ان کی فلم آسکر لانے میں ضرور کامیاب ہوگی۔

گریش کے مطابق: ’اب بھارت کے لیے آسکر کی یہ خشک سالی بہت جلد ختم ہونے والی ہے۔ لايرز ڈا‏ئس یا جل یہ اعزاز جیتنے میں کامیاب ہوگی۔‘

جل کے علاوہ بھارت کی جانب سے اے آر رحمان کی موسیقی والی فلم ’كوچیڈيان‘ کو بھی بیسٹ اورجنل سکور کے لیے نامزد کیا گیا ہے۔

اس ایوارڈ کی حتمی فہرست کا اعلان 15 جنوری سنہ 2015 کو کیاجائے گا جبکہ انعام کی تقریب 22 فروری 2015 کو منعقد ہوگی۔