طلاق کے بعد بریڈ پِٹ ’دیو داس‘ بن گئے

ہالی وڈ اداکار بریڈ پٹ نے کہا ہے کہ انجلینا جولی سے طلاق کے بعد وہ جذباتی طور پر اتنی بری طرح ٹوٹ گئے تھے کہ انھیں علاج کروانا پڑا۔

بریڈ پٹ نے اعتراف کیا کہ وہ علیحدگی کے بعد بہت زیادہ شراب پینے لگے تھے لیکن اب انھوں نے شراب چھوڑ دی ہے۔

سٹائل میگزین کو دیے گئے ایک انٹرویو میں انھوں نے پہلی بار اینجلینا جولی سے اپنی علیحدگی کے بارے میں بات کی ہے۔

انھوں نے کہا: ’میں نے اپنا ذہنی علاج کروانا شروع کر دیا ہے۔ میں اب بہتر محسوس کر رہا ہوں۔ جولی سے الگ ہونے کے بعد میں باقی لوگوں سے بالکل کٹ گیا تھا، لیکن اب جذبات پر بہتر طریقے سے قابو کر سکتا ہوں۔‘

اینجلینا جولی نے ستمبر 2016 میں اعلان کیا تھا کہ وہ بریڈ پٹ سے طلاق لے رہی ہیں۔ دونوں 2004 سے ساتھ رہ رہے تھے اور 2014 میں انھوں نے شادی کر لی تھی۔

علیحدگی کے بعد بچوں کی کفالت پر دونوں کے درمیان سخت قانونی لڑائی بھی جاری رہی اور اس دوران بریڈ پٹ پر بچوں سے برے برتاؤ کے الزامات بھی لگے۔

بریڈ پٹ نے بتایا کہ اینجلینا سے الگ ہونے کے بعد انھوں نے مصروف رہنے کے لیے آرٹ کا سہارا لینا شروع کر دیا ہے اور مٹی، پلاسٹر، ربڑ اور لکڑی کی پینٹنگ بنانے لگے ہیں۔

بریڈ پٹ کے مطابق فلمیں اب ان کے لیے زیادہ اہم نہیں رہیں۔ وہ کہتے ہیں کہ باپ بننے کے بعد انھوں نے فلموں پر توجہ دینا ویسے ہی کم کر دیا تھا۔