پردے پر مدھوبالا کا نصف حسن ہی دکھائی دیتا تھا

کچھ چہرے آنکھوں میں بس جاتے ہیں اور انھیں میں سے ایک چہرہ ہے مدھوبالا کا بھی ہے جو آج بھی ان کے چاہنے والوں کی آنکھوں میں رہتا ہے۔

زندگی کے محض 36 سال لیکن ایک طویل داستان پر مشتمل جس کو سننے سے کبھی بوریت نہیں ہوتی۔

مدھوبالا کا اصلی نام ممتاز تھا، اور وہ 14 فروری کو دہلی میں پیدا ہوئی تھیں۔ وہ سلور سکرین کی 'وینس' کے نام سے بھی معروف ہیں۔

مدھوبالا کے متعلق آج بھی بہت کچھ لکھا اور پڑھا جاتا ہے اور اس سے کہیں زیادہ انھیں دیکھا جاتا ہے۔

فلم فیئر میگزین کے سابق مدیر بی کے كرنجيا کے ایک مضمون میں اس بات کا ذکر ہے کہ ’مدھوبالا نے اپنے کانٹریکٹ میں یہ بھی لکھنا شروع کر دیا تھا کہ ان کے ساتھ فلم میں ہیرو کا کردار کون کرے گا اس کا فیصلہ کرنے کا اختیار انھیں خود ہو گا۔'

آج بہت سے فلم سٹارز اپنے ساتھ باڈی گارڈ رکھتے ہیں۔ بالی وڈ میں اس کا آغاز مدھوبالا نے ہی کیا تھا۔

مدھوبالا سے منسوب تقریباً سبھی کہانیاں حقیقت لگتی ہیں۔ بی کے کرنجيا کے مطابق: 'جب وہ پہلی بار مدھوبالا سے ملے تو انھیں محسوس ہوا کہ فلمی پردہ مدھوبالا کی نصف خوبصورتی ہی پیش کر پاتا ہے۔ حقیقت میں وہ کہیں زیادہ خوبصورت تھیں۔'

بالی وڈ کی بعض اداکارائیں اب ہالی وڈ میں بھی کام کر کے پیسہ کمار رہی ہیں لیکن برسوں پہلے ہالی وڈ کے معروف صنعت کار فرینک كوپر نے مدھوبالا کو فلموں کی پیشکش کی تھی۔

ہندوستانی سینیما کی تاریخ میں 'مدھوبالا' محض ایک نام نہیں ہے۔ انھیں ان کی بے داغ خوبصورتی کے لیے 'وینس آف انڈین سینیما' بھی کہا جاتا ہے۔

ان کی پہلی فلم 'بسنت' (1942) تھی۔ اس دور کی مشہور اداکارہ دیویکا رانی اس فلم میں ان کی اداکاری سے بہت متاثر ہوئی تھیں اور ان کا نام ممتاز سے بدل کر 'مدھوبالا' رکھ دیا تھا۔

حیدرآباد کی خدیجہ اکبر نے مدھوبالا پر 'آئی وانٹ ٹو لیو' کے نام سے ایک کتاب لکھی ہے۔ ان کے مطابق مدھوبالا شہرت کے باوجود ایک ایسی اداکارہ تھیں جو وقت کی انتہائی پابند تھیں اور ہمیشہ سٹوڈیو مقررہ وقت پر پہنچا کرتی تھیں۔