پاکستان بنگلہ دیش کو ہرا کر ایشیا کپ کے فائنل میں پہنچ گیا، اتوار کو انڈیا سے مقابلہ ہوگا
،تصویر کا ذریعہPCB
ایشیا کپ 2025 کے سپر فور مرحلے کے اہم ترین میچ میں پاکستان نے بنگلہ دیش کو 11 رنز سے شکست دے کر فائنل تک رسائی حاصل کر لی ہے۔ اب اتوار 28 ستمبر کو ایک بار پھر پاکستان کا مقابلہ روایتی حریف انڈیا سے ہوگا۔ اس سے پہلے انڈیا سے دو بار اس ٹورنامنٹ میں پاکستان کو شکست کا سامنا کرنا پڑا۔
جمعرات کے میچ میں حارث رؤف اور شاہین شاہ آفریدی نے تین تین کھلاڑیوں کو پویلین کی راہ دکھائی۔ حارث رؤف نے چار اوورز میں 33 رنز دیے اور تین وکٹیں حاصل کی ہیں۔ شاہین آفریدی نے چار اوورز میں 17 رنز دے کر تین وکٹیں حاصل کیں۔ شاہین شاہ آفریدی نے 13 گیندوں پر 19 رنز بھی بنائے اور آج مین آف دی میچ کا قرعہ بھی ان کے نام ہی نکلا۔
جمعرات کو بنگلہ دیش کے خلاف پاکستانی بیٹنگ لائن ایک بار پھر مشکلات کا شکار نظر آئی اور مقررہ 20 اوورز میں آٹھ وکٹوں کے نقصان پر صرف 135 رنز ہی بنا سکی۔
پاکستان اور بنگلہ دیش کے لیے یہ میچ سیمی فائنل کی حیثیت اختیار کر گیا تھا کیونکہ یہ فائنل کی دوڑ بن گئی تھی۔
دبئی میں ایشیا کپ سپر فور کے میچ میں بنگلہ دیش کے مستقل کپتان لٹن داس کی غیر موجودگی میں کپتانی کے فرائض انجام دینے والے جاکر علی نے ٹاس جیت کر پہلے پاکستان کو بیٹنگ کی دعوت دی تھی۔
،تصویر کا ذریعہGetty Images
پاکستانی اننگز کا احوال
پاکستانی اوپنر صاحبزادہ فرحان صرف چار رنز ہی بنا سکے۔ تیسرے نمبر پر بیٹنگ کے لیے آنے والے صائم ایوب ایک بار پھر صفر پر آوٹ ہوگئے ۔ وہ ایشیا کپ میں چوتھی بار صفر پر آؤٹ ہوئے ہیں۔
فخر زمان بھی بڑی اننگز نہ کھیل سکے اور 20 گیندوں پر 13 رنز اور حسین طلعت تین رنز بناکر رشاد حسین کا ہدف بنے۔ کپتان سلمان آغا بھی بڑی اننگز کھیلنے میں ناکام ہوئے اور 19 رنز بنا کر مستفیض الرحمان کی گیند پر وکٹ کیپر کے ہاتھوں کیچ آؤٹ ہو گئے۔
پاکستان کو چھٹا نقصان 14ویں اوور میں 71 رنز پر ہوا جب شاہین شاہ آفریدی بڑی ہٹ مارنے کی کوشش میں 19 رنز بنا کر کیچ آؤٹ ہو گئے۔
End of سب سے زیادہ پڑھی جانے والی
،تصویر کا ذریعہPCB
محمد حارث 31 رنز بنا کر نمایاں رہے جبکہ محمد نواز نے 25 اور فہیم اشرف نے 14 رنز بنائے۔
بنگلہ دیش کے تسکین احمد نے چار اوورز میں 28 رنز دیے اور تین وکٹیں حاصل کیں۔ مستیفض الرحمان نے چار اوورز میں 33 رنز دے کر ایک وکٹ حاصل کی۔
ٹاس کے وقت گفتگو کرتے ہوئے سلمان علی آغا کا کہنا تھا کہ ہم ٹاس جیت کر بیٹنگ کا ہی فیصلہ کرتے۔ انھوں نے کہا کہ سری لنکا کے خلاف جیت کے تسلسل کو برقرار رکھیں گے اور پلان کے مطابق کھیلنے کی کوشش کریں گے۔
پاکستان نے سپر فور مرحلے میں انڈیا سے پہلا میچ ہارنے کے بعد سری لنکا کو شکست دی تھی جب کہ بنگلہ دیش بھی سپر فور مرحلے میں سری لنکا کوشکست دے چکا ہے۔
بنگلہ دیش کی اننگز کا احوال
بنگلہ دیش کے بلے باز بھی زیادہ تر وکٹ پر نہ ٹھہر سکے اور وکٹیں گرنے کا سلسلہ جاری رہا۔ بنگلہ دیش کے شمیم حسین نے 25 گیندوں کا سامنا کیا اور 30 رنز بنائے۔ سیف حسین نے 15 گیندوں کا سامنا کیا اور 18 رنز بنائے۔
پرویز حسین صفر پر آؤٹ ہوئے، توحید ہیریدوئی نے پانچ، مہدی حسن نے 11، کپتان جاکر علی نے پانچ، تسکین احمد نے چار رنز بنائے۔ ناٹ آوٹ رہنے والے راشد حسین نے 16 جبکہ مستفیض الرحمان نے چھ رنز بنائے۔
سوشل میڈیا پر ردعمل: ’صائم ایوب کا طریقہ کار یہی ہے کہ رنز نہیں بناؤں گا تو بنانے بھی نہیں دوں گا‘
،تصویر کا ذریعہ@YaariSports
اب یہ میچ ایشیا کپ کے سیمی فائنل کی حیثیت اختیار کر گیا تھا یعنی جو آج کا میچ جیتا وہ اتوار کو انڈیا کے خلاف فائنل کھیلے گا ایسے میں اس میچ پر سوشل میڈیا پر بھی خوب تبصرے دیکھنے کو ملے۔
پاکستان کی یکے بعد دیگرے وکٹیں گرتے دیکھیں تو سپورٹس یاری نامی اکاؤنٹ سے یہ رائے سامنے آئی کہ پاکستان انڈیا کے ڈر سے جان بوجھ کر ہار رہا ہے۔ مگر پھر نتائج مختلف نکلے۔
ڈینیئل الیگزینڈر نامی صارف نے مزاح کرتے ہوئے لکھا کہ حارث رؤف نے تین گیندوں پر تین رنزبنائے اور کوئی باؤنڈری لگانے میں کامیاب نہ ہوئے یوں یہ تین جمع تین چھ برابر زیرو ہے۔
صائم ایوب اس ٹورنامنٹ میں مسلسل چوتھی بار صفر پر آؤٹ ہوئے ہیں۔
کرکٹ پر گہری نظر رکھنے والے مظہر ارشد نے صائم ایوب کی کارکردگی پر تبصرہ کرتے ہوئے لکھا کہ صائم ایوب نے چار اوورز میں 16 رنز دے کر دو وکٹیں حاصل کیں۔ صائم ایوب کا طریقہ کار یہی ہے کہ اگر رنز نہیں بناؤں گا تو بنانے بھی نہیں دوں گا۔
