ኤርትራዊት ፕሮፌሽናል ተቐዳዳሚት ብሽክለታ ደሲት ኪዳነ ብሓደጋ መኪና ዓሪፋ

ኤርትራዊት ፕሮፌሽናል ተቐዳዳሚት ብሽክለታ ደሲት ኪዳን ትማሊ ኣብ ስዓታት ናይ ንግሆ ኣብ መንገዲ ማይ ነፍሒ ኣብ እዋን ልምምድ ብዘጋጠማ ሓደጋ መኪና ዓሪፋ።

10 ጥቅምቲ 2000 ዝተወለደት ፕሮፈሽናል ተቐዳዳሚት ደሲት ኪዳን፡ ካብ 2019 ጀሚራ ኣብ ናይ ዩሲኣይ ጋንታ ተጠርኒፋ ንውልቃን ንሃገራዊት ጋንታ ኤርትራን ዓበይቲ ዓወታት ከተመዝግብ ዝጸንሐት ተቀዳዳሚት እያ።

ጓል 21 ዓመት ደሲት ኪዳነ፡ ኣብ 2018 ርዋንዳ ኣብ ዝተኻየደ ኣፍሪካን ኮንቲነንታል ቻምፕዮን ሺፕ ብናይ ውልቂ ናይ ግዜ ውድድርን ናይ ጽርግያ ውድድር ብናይ ጁኔርን ሲነርን ተሸላሚት ወርቂ መዳልያ ኮይና እያ።

ኣብ ተመሳሳሊ ዓመት ኣብ ሻምፕዮን ዓለም ምስ ዓበይትን ውሩያትን ተቐዳደምቲ ተወዳዲራ መበል 22 ኮይና ውድድራ ምዝዛማ ኣብ ውድድር ብሽክለታ ዘለዋ ብቕዓት ዘግሃደ ውጽኢት እዩ ነይሩ።

ኣብ 2019 ብናይ ውልቂ ናይ ግዜ ውድድር ቻምፕዮን ኤርትራ ኮይና ውድድራ ዝዛዘመት ደሲት ኪዳነ ኣብ ናይ ጽርግያ ውድድር'ውን ንዳናይት ፍጹም ተኸቲላ ካልኣይቲ ኮይና እያ ውድድራ ዛዚማ።

ኣብ 2019 ኣብ ሞሮኮ ኣብ ዝተኻየደ ኣፍሪካን ጌም ኣብ ናይ ጁንየር ናይ ውልቂ ናይ ግዜ ውድድር ካልኣይቲ ብምውጻእ ተዓዋቲት ብሩር መዳልያ ክትከውን እንከላ ኣብ ሓፈሻዊ ናይ ግዜ ውድድርን ናይ ጽርግያ ውድድርን ኸኣ ሓምሸይቲ ኮይና ውድድራ ዛዚማ።

ኣብ 2019 ኣብ ኢትዮጵያ ከተማ ባህርዳር ኣብ ዝተኻየደ ኣፍሪካን ኮንቲነታል ቻምፕዮን ሺፕ

ደሲት፡ ኣብ ጠቕላላ ዓመተ 2019 ኣብ 19 መዓልታት ዝወሰደ ውድድራት ብምስታፍ 1215 ኪሎ ሜትር ርሕቀት ዝሸፈነ ብምዝዋር ኣብ ዩሲኣይ ዝተመዝገበ 43 ነጥቢ ኣዋህሊላ እያ ነታ ዓመት ዛዚማታ።

ኣብ ዓመት 2021 ድማ ምስ ጋንታ ናይ ዩሲኣይ ብምዃን ኣብ ዓበይቲ ኣውሮጳውያን ውድድራት ላ ኪላሲክ ማርቢሃን፣ ግራንድ ብሪክስ ማርቦሃን ፈሚኒን፣ ግሮተ ብሪጅ ካልኦትን ብምስታፍ ብሓፈሻ ኣብ 13 መዓልታት 1183 ኪሎ ሜትር ዝሸፈነ ውድድራት ኣካይዳ።

ንሳ፡ ኣብ 25 መስከረም 2021 ኣብ ቤልጅም ኣብ ዝተኻየድ መበል 94 ቻምፕዮን ዓለም ምስ ኣድያም ተስፋኣለም፣ ብስራት ገብረመስቀልን ብምዃን ንሃገራዊት ጋንታ ኤርትራ ብምውካል ኣብቲ ዓቢ ውድድር ክትሳተፍ ክኢላ እያ።