ኣብ ኤርትራ ብኮሮናቫይረስ ከም ዝተለኽፉ ዝተረጋገጹ ሰባት ኩሎም ሓውዮም

ኤርትራ ብኮሮናቫይረስ ተለኺፎም ሕክምናዊ ክንክን ክግበረሎም ካብ ዝጸንሑ ሕሙማት እታ ናይ መወዳእታ: ብዝተገበረላ መርመራ ካብቲ ሕማም ናጻ ስለዝኾነት ሎሚ ካብ ሆስፒታል ከም ዝተፋነወት ሚኒስትሪ ጥዕና ኣብ ዘውጽኦ መግለጺ ሓቢሩ።

በዚ መሰረት ኤርትራ ብኮሮናቫይረስ ተለኺፎም ኣብ ሆስፒታል ክንክን ክግበረሎም ዝጸንሑ 39 ሰባት፡ ኩሎም ጥዕንኦም ናብ ንቡር ኩነታት ተመሊሱ ናብ ቤቶም ተፋንዮም ኣለው።

ሚኒስትሪ ጥዕና ኣብቲ ዘውጽኦ መግለጺ፡ "እዚ ውጽኢት'ዚ ዘተባብዕ'ኳ እንተዀነ፡ ከዛንየና ግን ኣይግባእን" ኢሉ።

ወሲኹ'ውን "ዝርግሐ ናይ'ቲ ለበዳ ኣብ መላእ ሃገር ብምልኣት ንምፍላጥ ዝካየዱ መርመራታት ክሳብ ዝዛዘሙ፡ ብመንግስቲ ዝወጹ መምርሒታት ብምልኣት ክትግበሩ ወሳንን ኣገዳስን" ምዃኑ ገሊጹ።

ኤርትራ ካብ 2 ሚያዝያ ጀሚራ ምሉእ ዕጸዋ ብምእዋጅ፡ ምንቅስቓሳት ንኣገዳሲ ምኽንያታታ እንተዘይኮይኑ ኣጊዳ እያ ዘላ።

እታ ሃገር 18 ሚያዝያ ሰለስተ በቲ ቫይረስ ዝተለኽፉ ሰባት ከም ዝረኸበት ድሕሪ ምግላጻ ንዝሓለፈ 27 መዓልትታት ሓድሽ መልከፍቲ ከም ዘይመዝገበት ጸብጻባት ሚኒስትሪ ጥዕና ይገልጽ።