ኤርትራ፡"ዝበለጸ ወጽኢት ንምምጻእ ኢና ናብዚ ውድድር ንኣቱ ዘለና" ኣሰልጣኒ ሳምሶም ሶሎሞን

ካብ ዕለት 22 ጀሚሩ ኣብ ዓዲ እንግሊዝ ኣብ ከተማ ዮርክሻየር ዝካየድ ዘሎ መበል 92 ቅድድም ብሽክለታ ሻምፕዮን ዓለም፡ ሃገራዊት ጋንታ ኤርትራ ብዓበይቲ ደቂ ተባዕትዮ፡ ብናይ ትሕቲ 23 ደቂ ተባዕትዮ ከምኡ እውን ብሓንቲ ጓል ኣንስተይቲ ተወኪላ ውድድራታ ከተካይድ እያ።

እዚ ዓዲ እንግሊዝ ንራብዓይ ግዚኣ ተአንግዶ ዘላ ዝዓበየ ዓለማዊ ውድድር ቅድድም ብሽክለታ ኮይኑ፡ ኣብ መኽፈቲ መዓልቲ ሃገራዊት ጋንታ ኤርትራ ዘይተሳተፈትሉ ናይ ሕውስዋስ ደቂ ኣንስተዮን ደቂ ተባዕትዮን ናይ 27.6 ኪሎ ሜተር ውድድር (ሚክሲድ ሪለይ) ብምክያድ እዩ መጋረጅኡ ቀንጢጡ።

ሎሚ ኤርትራ ብናይ ትሕቲ 23 ዓመት ናይ ግዜ ውድድር ዳንኤል ሃብተሚካኤልን ቢንያም ግርማይን ተወኪላ ኣብ ዝገበረቶ ውድድር ነቲ ውድድር ዴንማርካዊ ሚኪኤል ብጀርግ ክዕወተሉ እንከሎ፡ ቢንያም ግርማይ መበል 31 ከምኡ እውን ዳኒኤል ሃብተሚካኤል መበል 50 ኮይኖም ውድድሮም ዛዚሞም።

እታ እንኮ ኤርትራዊት ጓል ኣንሰተይቲ ደሲት ኪዳነ እውን ናይ ውልቒ ናይ ግዜ ውድድር ሎሚ ከተካይድ እያ።

ኣሰልጣኒ ሃገራዊት ጋንታ ቅድድም ብሽክለታ ኤርትራ ኣቶ ሳምሶም ሰሎሞን፡ እዛ ሃገራዊት ጋንታ ኤርትራ፡ እቶም ኣብ ኣስመራ ዝነበሩ ተቐዳደምቲ ንኣስታት ሓደ ወርሒ ተጠርኒፎም ውድድራቶም ከካይድ ከም ዝጸንሑ ምስ ቢቢሲ ኣብ ዝገበሮ ቃለ መሕትት ሓቢሩ።

ሳምሶም ብምስዓብ "ነዞም ካብ ኣስመራ ዝመጽኡ፡ 4 ተቀዳደምቲ ኣብ ኣውሮጳ ውድድራት ከካይድ ድሕሪ ምጽናሕ ነዛ ጉጀለ ክጽንበርዋ ንጽበዮም ኣለና" ኢሉ።

ብምስዓብ "ፕረዚደንት ቅድድም ብሽከለታ ኤርትራ ኣቶ ተወልደ ዮውሃንስ፡ ሰክሬታሪ ቤት ጽሕፈት ብሽክለታ ኤርትራ ኣቶ ምስግና ሃይለ፡ መካኒክ ፈረጅ መሓመድ ኑርን ክኢላ ማሳጅ ሳልማን ሓመደን ምስታ ጋንታ ናብ ሎንዶን ገይሾም ዘለዉ እዮም" ኢሉ።

ሃገራዊት ጋንታ ኤርትራ ኣብ ዝሓለፈ 5 ውድድራት ቅድድም ብሽክለታ ሻምፕዮን ዓለም ከም ዝተሳተፈት ዝሓበረ ኣሰልጣኒ ሳምሶም ሰሎሞን "ሻምፕዮና ዓለም ኣብ ዓለም ኣለዉ ዝብሃሉ ፍሉጣት ተቐዳደምቲ ዝወዳደርሉ ከም ምኳኑ መጠን፡ ዓብይን ከቢድን ውድድር እዩ።

ስለዚ ኣብዚ ናይ ሎሚ ዓመት ውድድር ነጢርካ ኣብ ላዕሊ ዝብጻሕ የለን ብሓፈሻ ግን ንናይ ዝሓለፈ ውጽኢትና ኣመሓይሽና፡ ክብ ዝበለ ውጽኢት ንምምዝጋብ ኢና መጺእና ዘለና" ኢሉ።

ኣብዚ ናይ ሎሚ ዓመት ሻምፕዮን ዓለም 2019፡ ሃገራዊት ጋንታ ኤርትራ ኣብ ናይ ዓበይቲ፡ ዳኒኤል ተ/ሃይማኖት፡ መክሰብ ደበሳይ፡ መርሃዊ ቁዱስ፡ ናትናኤል ብርሃነ ከምኡ እውን ኣማኑኤል ገብረዝጋብሄር ተወኪላ ውድድራ ከም እተሰላስል እያ ተሓቢሩ ነይሩ።

እንተኾነ ተቐዳዳማይ ኣማኑኤል ገብረዝጋብሄር ኣብ ቮልታ ስጳኛ ብዘጋጠሞ ናይ ምውዳቕ ሓደጋ ጥዕንኡ ናብ ንቡር ስለ ዘይተመለሰ ኣብዚ ውድድር ከም ዘይሳተፍ ኣሰልጣኒ ሳምሶም ሰሎሞን ንቢቢሲ ሓቢሩ።

ኤርትራ ኣብ ናይ ትሕቲ 23 ዓመት እውን ብሄኖክ ሙሉብርሃን፡ ቢኒያም ግርማይ፡ ናትናኤል ተስፋጽዮን፡ ዳኒኤል ሃብተሚካኤልን ያቆብ ደበሳይን ተወኪላ እያ ውድድራ ከተካይድ።

ሳምሶም ሰሎሞን እዛ ብዳኒኤል ተ/ሃይማኖት፡ መክሰብ ደበሳይ፡ መርሃዊ ቁዱስ፡ ናትናኤል ብርሃነ እትውከል ናይ ዓበይቲ ሃገራዊት ጋንታ ኤርትራ ተሞክሮ ናይዞም ተቐዳደምቲ ኣብ ግምት ኣትዩ ኣብ ታሪኽ ቅድድም ብሽክለታ ኤርትራ እታ ዝበለጸት ጋንታ ክትብሃል ትኽእል እንተኾይና ኣብ ዝተሓተተሉ "እወ ዝሓየለት ሃገራዊት ጋንታ እያ ኣብ 2016 ኣብ ቐጠር ኣብ ዝተኻየደ ውድድር እውን ሓያል ጋንታ ሒዝና ኬድና ብሽዱሽተ ተቐዳደምቲ ተወዳዲርና ነይርና ኢና፡ ምስዛ ዘላ ሃገራዊት ጋንታ ከኣ ዝመሳሰላ እየን" ክብል መሊሱ።

ሳምሳም ሰሎሞን ሃገራዊት ጋንታ ኤርትራ ኣብዚ ዓቢ ዓለማዊ ውድድር ንምንታይ ብደሲት ኪዳነ ጥራይ ተወኪላ ዝብል ሕቶ ምስ ቐረበሉ፡ እቲ ውሳነ ብፈጻሚት ኣካል ናይ ፌዴሬሽን ዝተወሰነ ምኳኑ ድሕሪ ምሕባር "ነታ ሓንቲ ሒዝና ከኣ ዝበለጸ ወጽኢት ንምምዝጋብ ክንጽዕር ኢና" ይብል።

ኣሰልጣኒ ሳምሶም ኣብ መወዳእታ "ኣብ ዝተፈላለያ ሃገራት ውድድር ኣብ እነከይደሉ ተዓዛቢና የተባባዓና እዩ፡ ሕጂ ከኣ ንተቐማጦ ዓዲ እንግሊዝ ኣብ ናይ ውድድር ቦታ መጺኦም ከተባብዑና ይምሕጸን" ኢሉ።