ኣብ ኣመሪካ ብዝተፈጸመ መጥቃዕቲ 18 ሰባት ተቐቲሎም

ምንጪ ስእሊ, Getty Images
ኣብ ኣመሪካ ግዝኣት መይነ ከተማ ሌዊስተን ብዝተፈጸመ መጥቃዕቲ ብውሕዱ 18 ሰባት ተቐቲሎም። ሓደ ውልቀ ሰብ ተኹሲ ብምኽፋት ነቶም ሰባት ከምዝቐተሎም ድማ ተገሊጹ።
እቲ መጥቃዕቲ ትማሊ ረቡዕ ኣብ ጥቓ መጻወቲ ቦውሊንግን ቤት መግብን ዝተኸፈተ ኮይኑ፡ ነቲ ናይ ተኩሲ መጥቃዕቲ ዝፈጸመ ተጠርጣሪ ንምህዳን ሰፊሕ ምውፋር ፖሊስ ተገይሩ’ሎ።
ፖሊስ፡ እቲ ጥርጡር ሮበርት ካርድ ዝበሃል ወዲ 40 ዓመት ምዃኑ ብምሕባር "ዕጡቕን ሓደገኛን እዩ" ክብል ኣጠንቂቑ።

ምንጪ ስእሊ, EPA
ሰበስልጣን ቁጽሪ ዝሞቱ እኳ እንተዘየረጋገጹ፡ ኣመሪካዊ መሻርኽቲ ቢቢሲ ዝኾነ ሲቢኤስ ግን፡ ካብ ፖሊስ ብዝረኸቦ ሓበሬታ ብምጥቃስ፡ እቲ ቁጽሪ ብውሑዱ 16 ከምዝበጽሐ ጸብጺቡ።
ገለ ዘይተረጋገጹ ፀብፃባት ድማ ብውሕዱ 50 ሰባት ከምዝቖሰሉ ይሕብሩ።
ክፍሊ ህዝባዊ ድሕነት ግዝኣት መይን፡ "ብዙሕ መጉዳእቲ ኣሎ" ኢሉ፡ ኣብ ከተማ ሌዊስተን ኣስታት 38 ሽሕ ሰባት ይነብሩ።
ፖሊስ ኣብ ክልተ ቦታታት ተኹሲ ከምዝተኸፈተ ጸብጻባት ከምዝበጽሖ ይገልጽ።
እቲ ሓደ ሽመንጊስ ኣብ ዝበሃል ቤት መግቢ ክኸውን ከሎ እቲ ካልኣይ ድማ ስቴርታይም ሪክሪሽን ዝበሃል መጻወቲ ቦውሊንግ እዩ።
ኣብ መንጎኦም ናይ 6.5 ኪሎ ሜትሮ ርሕቀት ኣሎ።
እታ ከተማ ብምልእታ ከምዝተዓፀወትን ነቲ መጥቃዕቲ ዝፈፀመ ተጠርጣሪ ንምህዳን ብኣማኢት ዝቑፀሩ ኣባላት ፖሊስ ከምዝተዋፈሩን ተፈሊጡ’ሎ።
ፖሊስ ምስሊ ናይቲ ጥርጡር ዝዘርግሐ ኮይኑ ቡናዊ ዝሕብሩ ጎልፎ ተኸዲኑ ብረት ተዓጢቑ ናብቲ ህንጻ ክኣቱ ከሎ ኣብቲ ቪድዮ ይረኣይ።
እቲ ውልቀሰብ ኣብ ሰራዊት ምክልኻል ኣመሪካ ስልጠና ዝወሰደን መምህር ኣጽዋር ምዃኑን ጸብጻብ ኣሶሴይትድ ፕረስ የመልክት።
ኣብዚ ዓመት ዝተወሰነ እዋናት ኣብ ማእከል ጥዕና ኣእምሮ ከምዘሕለፈን ናይ ተኹሲ መጥቃዕቲ ከምዝፍፅም የፈራርሕ ምንባሩን ተገሊጹ።




![ኣብቲ መበል 48 ሓፈሻዊ ዋዕላ ሕቡራት ሃገራት ንወኪል ኤርትራ ዝመርሐ ሽዑ ምኒስተር ጉዳያት ወጻኢ ዝነበረ ማሕሙድ ኣሕመድ ሸሪፎ [ጸ]፡ ኣብ ጐድኑ ኣቶ የማነ ገብረኣብ፡ ኣቶ ሓጐስ ገብረሂወት፡ ብድሕሪኡ ኣቶ የማነ ገብረመስቀል፡ ኣቶ ኣሚን ሓሰንን ካልኦትን ይረኣዩ።](https://ichef.bbci.co.uk/ace/ws/400/cpsprodpb/1ffe/live/bf49b970-b354-11f0-ad84-99ce12c6004d.jpg.webp)







