ሩስያን ዩክረይንን ንበዓል ፋሲካ ኦርቶዶክስ ተዅሲ ደው ንምባል ተሰማሚዐን

ሩስያን ዩክረይንን ንበዓል ፋሲካ ኦርቶዶክስ ተዋሕዶ ዝጸንሕ ግዝያዊ ተዅሲ ደው ናይ ምባል ስምምዕ ገይረን።

ቭላድሚር ፑቲን ሰራዊት ሩስያ ኣብዚ መወዳእታ ሰሙን ኣብ "ኵሉ ኣንፈታት" ተዅሲ ደው ከብሉ ከም ዝኣዘዘ ገሊጹ።

እዚ ካብ ሞስኮ ዝወጽአ ኣዋጅ፡ ቮሎድሚር ዘለንስኪ ብተደጋጋሚ ከቕርቦ ዝጸንሐ ግን ድማ ኵሉ ብክሬምሊን ተነጺጉ ንዝጸንሐ ጻውዒታት ስዒቡ ዝመጽአ እዩ።

ሕጂ ፑቲን ካብ ቀዳም 11 ሚያዝያ ጀሚሩ ክሳዕ ሰንበት ፋሲካ ዝጸንሕ ስምምዕ ኣዊጁ ኣሎ። ወሲኹ ድማ ዩክረይን ነዚ ናይ ሩስያ "ኣብነት ክትስዕብ" ከም ዝጽበ ገሊጹ።

ሰራዊቱ ግን ንዝዀነ "ምትዅታዅ" ወይ "ጻሕታሪ ስጕምትታት" ንምክልኻል ድሉዋት ክዀኑ ኣዚዙ ኣሎ።

እቲ ሩስያ ዝተጠቐመትሉ ቃናን ነቲ ተበግሶ ንምምንዛዕ ዝገበረቶ ፈተነን ንዩክረይናውያን ከቘጥዖም እዩ።

ይዅን እምበር፡ ዘለንስኪ ነዊሕ ከይጸንሐ ሃገሩ "ተመሳሳሊ ስጕምቲ" ንምውሳድ ድልውቲ ምዃና ኣብ ኤክስ ገሊጹ።

"ሰባት ካብ ስግኣት ናጻ ዝዀነ ፋሲካን ናብ ሰላም ዝወስድ ናይ ሓቂ ምንቅስቓስን የድልዮም እዩ፡" ክብል ጽሒፉ።

"ሩስያ ድሕሪ ፋሲካ'ውን ናብ መጥቃዕቲ ናይ ዘይምምላስ ዕድል ኣለዋ፡" እውን ኢሉ።

ኣብ መጀመርታ እዚ ሰሙን፡ ዘለንስኪ ንበዓላት ዝኸውን ናይ ተዅሲ ደው ምባል ሓሳብ ከም ቀዳማይ ስጕምቲ ናብ ሞስኮ ንኸመሓላልፉ ንኣመሪካ ሓቲቱ ከም ዝነበረ ገሊጹ ነይሩ።

ካብ ግዜ ኲናት ዝርከብ ዝዀነ ይዅን ናይ ዕረፍቲ ግዜ፡ በቶም ኣብ ምብራቕ ዩክረይን ዝርከቡ ብመጥቃዕቲ ድሮናት ዕረፍቲ ዘይጸንሖም ወተሃደራት ጽቡቕ ተቐባልነት ክረክብ እዩ።

እዚ ስምምዕ ኣብ መላእ እታ ሃገር ሰባት ንኽዛነዩ ዕድል ክህብ እዩ፤ ኣብታ ሃገር ደወል መጠንቀቕታ ኣየር ምስማዕ ኣካል ዕለታዊ ህይወት እዮም። ሚሳይላትን ድሮታትን ሩስያ ሰላማውያን ሰባት ምቕታልን ምቝሳልን ይቕጽሉ ኣለዉ።

ኣብዚ ቀረባ እዋን፡ ኣብ ደቡብ ምብራቕ ኒኮፖል ሓንቲ ድሮን ንኣውቶቡስ ዒላማ ምስ ገበረት ሓያሎ ሰባት ተቐቲሎም። ኣብ ዚቶሚር፡ ካብ ኪቭ ብወገን ምዕራብ፡ ሓንቲ ሰበይቲ ኣብ ጥቓ ገዝኣ ሚሳይል ምስ ወደቐ ሞይታ።

እቲ ናይ መወዳእታ ሰሙን ስምምዕ ተዅሲ ደው ምባል ምስ ተኣወጀ ነዊሕ ከይጸንሐ፡ ኣብ ኪቭ ናይ መጠንቀቕታ ድምጺ ዳግማይ ተሰሚዑ።

ዩክረይን'ውን ብወገና ኣብ ልዕሊ ሩስያ፡ ብፍላይ ናብ መኽዘናት ነዳዲ ዘቕነዐ ጽዑቕ መጥቃዕቲ ድሮናት ኣካይዳ። ሩስያ ድማ መንበሪ ኣባይቲ ተሃሪሞም ክትብል ገሊጻ።

እዚ ስምምዕ፡ ቀዳም ኣብ ግብሪ እንተ ወዓለ'ውን ዩክረይናውያን ዝቕንይ ምዃኑ ይጣራጠሩ እዮም።

ኣብ መጀመርታ ናይዚ ዓመት፡ ሩስያ "ናይ ጸዓት ዕረፍቲ" ኣዊጃ ነይራ። ኣብ ልዕሊ ናይ ዩክረይን መመንጨውቲ ሓይሊ ኤለክትሪክ እትፍጽሞ ዝነበረት ኣዕናዊ መጥቃዕቲ'ውን ደው ኣቢላቶ። እንተዀነ፡ እቲ ዕረፍቲ ንዝቕጽል ዓቢ መጥቃዕቲ ሚሳይላት ንምድላው ጥራሕ እዩ ነይሩ።

ዝሓለፈ ዓመት ግንቦት'ውን፡ ሩስያ ነቲ መበል 80 ዓመት ዓወት ሶቭየት ኣብ ልዕሊ ናዚ ጀርመን ንምጽንባል በይናዊ ምቍራጽ ተዅሲ ኣዊጃ ነይራ። ሽዑ ግዜ ዩክረይን ብኣማኢት ዝቝጸሩ ምጥሓስ ስምምዕ ተዅሲ መዝጊባ።

ኪቭ፡ እቲ ሩስያ ዝጀመረቶ ምሉእ ወራር ቀዋሚ ምቝራጽ ተዅሲ ክካየድ እያ ብተደጋጋሚ ትሓትት።

ሞስኮ ግን ቅድሚ ተዅሲ ደው ምባሉ ናይ ሰላም ስምምዕ ክፍረም ትደሊ። እዚ ድማ ሩስያ ነቲ ኵናት ንምብቃዕ ቅንዕና የብላን ዝብል ክሲ ካብ ኪቭ ንኽለዓል ገይሩ።

ኣመሪካ ኣብቲ ዘተ ከም ሸምጋሊት ኰይና ትነጥፍ እኳ እንተ ነበረት፡ ዶናልድ ትራምፕ ትዅረቱ ናብ ማእከላይ ምብራቕ ካብ ዝቕይር ንደሓር ግን እቲ መስርሕ ደስኪሉ ይርከብ።