ኣርሊን ሃላንድ ኣብ ፕሪምየር ሊግ ዝነውሐ ሓድሽ ውዕል ፈሪሙ

ኣጥቃዓይ ማንቸስተር ሲቲ ኣርሊን ሃላንድ ምስታ ክለብ ክሳዕ 2034 ክጸንሕ ዘኽእሎ ሓድሽ ናይ ልዕሊ ትሽዓተ ዓመት ውዕል ፈሪሙ።

እዚ ኖርወጃዊ ኣጥቃይ ምስታ ክለብ ኣብ ዝገበሮም 126 ጸወታታት 111 ሸቶታት ከምዘመዝገበ ይፍለጥ።

ሃላንድ፡ ኣብ 2022 እዩ ካብ ዶርትሙንድ ናብ ማንቸስተር ሲቲ ተጸንቢሩ። ኣብቲ እዋን ዝፈረሞ ውዕል፡ ኣብ 2027 እዩ ዝዛዘም።

ነዚ ሓድሽ ውዕል ስዒቡ ሃላንድ ንትሽዓተ ዓመትን መንፈቕን ክሳብ መበል 34 ዓመት ልደቱ ምስ ማንቸስተር ሲቲ ክጻወት እዩ።

እዚ ውዕል ኣብ ፕሪምየር ሊግ እቲ ዝነውሐ ኰይኑ፡ ነቲ ኮል ፓልመር ኣብ ዝሓለፈ ወርሒ ነሓሰ ምስ ቸልሲ ዝፈረሞ ናይ 9 ዓመት ውዕል ዓብሊልዎ ኣሎ።

"ሓድሽ ውዕለይ ብምፍራመይን ምስዛ ዓባይ ክለብ ዝያዳ ግዜ ከሕልፍ ብምኽኣለይን ናይ ብሓቂ ሕጕስ እየ" ክብል ሃላንድ ገሊጹ።

"ማንቸስተር ሲቲ ፍልይቲ ክለብ እያ፣ ብዘደንቑ ደገፍቲን ፍሉያት ሰባትን ዝመልአት ኰይና፡ እዚ ድማ ካብ ካልኦት ሰባት ዝያዳ ንኽትበልጽ ዝሕግዝ ሃዋህው'ዩ።"

ወሲኹ ድማ "ብተወሳኺ [ኣሰልጣኒ] ፔፕ [ጓርድዮላ]፡ ጕጅለ ኣሰልጠንቱ፡ ደቂ ጋንታይን ንዅሎም ኣብታ ክለብ ዘለዉን ከመስግኖም እደሊ፤ ኵሎም ኣብ ዝሓለፈ ክልተ ዓመታት ኣዝዮም ሓጊዞምኒ እዮም" ኢሉ።

ዳይረክተር ኩዕሶ እግሪ ማን ሲቲ ትክሲኪ በጊሪስታይን፡ "[ሃላንድ] ንነዊሕ እዋን ምፍራሙ፡ ከም ተጻዋታይ ንዕኡ ዘለና ተወፋይነትን ነታ ክለብ ዘለዎ ፍቕሪን ዘርኢ'ዩ" ክብል ርእይቶኡ ገሊጹ።

ንምእማን ዘጸግም ኣሃዛት ሃላንድ

ኣሰልጣኒ ማን ሲቲ ፔፕ ጓርድዮላ ንክልተ ዓመት ድሕሪ ምፍራሙ ክልተ ኣዋርሕ ጸኒሑ እዩ ሃላንድ ሓድሽ ውዕል ፈሪሙ ዘሎ።

እዚ ኖርወጃዊ ኣጥቃዓይ ካብ ጀርመን ናብዛ ክለብ ካብ ዝጽንበር ንደሓር፡ ክልተ ግዜ ፕሪምየር ሊግ፡ ሓደ ግዜ ኤፍ.ኤ ካፕ፡ ሓደ ግዜ ሻምፕዮንስ ሊግን ሓደ ግዜ ድማ ሱፐር ካፕን ተዓዊቱ ኣሎ።

ኣቦኡ ኣከፋፋሊ ሲቲ ነበር ኣልፍ-ኢንገ ዝዀነ ሃላንድ፡ ኣብዚ ዓመተ ስፖርት ምስ ሲቲ ኣብ ዘካየዶም 28 ጸወታታት 21 ሸቶታት ኣመዝጊቡ'ዩ።

ኣብዚ ሕጂ እዋን ማን ሲቲ ካብታ ነቲ ሊግ ትመርሕ ዘላ ሊቨርፑል ብ12 ነጥቢ ድሒራ ትርከብ።

ሃላንድ ውዕል ዘሐድስ ዘሎ፡ ሲቲ ውጽኢት ዲሲፕሊናዊ ክስታት ኣብ እትጽበየሉ ዘሎ እዋን'ዩ።

እታ ክለብ ገበነኛ ኰይና እንተተረኺባ፡ ዓቢ እገዳ ከጋጥማ ተኽእሎ ኣሎ።

ማን ሲቲ ግን ነቶም ኣብ ልዕሊኣ ዝቐረቡ 115 ክስታት ብምንጻግ ዝዀነ ጥሕሰት ከምዘይፈጸመት እያ ትገልጽ።