కోవిడ్ కేసులు: ఒమిక్రాన్ బీఎఫ్ 7, డెల్టా, డెల్టా ప్లస్, ఆల్ఫా, బీటా, గామా వేరియంట్లు అంటే ఏమిటి... ఇవి వ్యాక్సీన్లకు లొంగుతాయా

భారత్‌లో ఒమిక్రాన్ సబ్‌వేరియంట్ BF.7 కేసులు మూడు బయటపడ్డాయి. ప్రస్తుతం చైనాలో పెరుగుతున్న కోవిడ్ 19 కేసులకు కారణం ఈ వేరియంటే.

మొదటి BF.7 కేసు అక్టోబర్‌లో గుజరాత్ బయోటెక్నాలజీ రీసెర్చ్ సెంటర్‌లో వెలుగులోకి వచ్చిందని, ఇప్పటివరకు గుజరాత్‌లో రెండు, ఒడిశాలో ఒక కేసు నమోదైందని అధికారులు వెల్లడించినట్లు పీటీఐ తెలిపింది.

ఒమిక్రాన్‌ వేరియంట్‌ను ఆందోళనకరమైన రకంగా ప్రపంచ ఆరోగ్య సంస్థ (డబ్ల్యూహెచ్‌వో) గుర్తించింది. ఇది మొట్టమొదట దక్షిణాఫ్రికాలో వెలుగులోకి వచ్చింది.

ఒమిక్రాన్‌లో మ్యుటేషన్ల కారణంగా అది వేగంగా వ్యాప్తి చెందే అవకాశముందని ప్రపంచ ఆరోగ్య నిపుణులు అంచనా వేస్తున్నారు.

వ్యాక్సీన్ల ప్రభావాన్ని తగ్గించే మ్యుటేషన్లు కూడా ఒమిక్రాన్‌లో ఉన్నట్లు ప్రపంచ ఆరోగ్య సంస్థ చెబుతోంది. ఇతర వేరియంట్ల కంటే కూడా ఇన్ఫెక్షన్లను వ్యాప్తి చేసే ముప్పు దీనికి ఎక్కువగా ఉంటుందని వివరించింది.

అయితే, దీని వల్ల స్పల్ప ఇన్ఫెక్షన్ వస్తుందా? లేదా తీవ్రమైన ఇన్ఫెక్షన్లు కూడా వచ్చే అవకాశముందా? అనే అంశంపై స్పష్టతలేదు.

అసలు వేరియంట్ అంటే ఏమిటి?

వైరస్‌లు నిత్యం మ్యుటేట్ అవుతూనే ఉంటాయి. కొన్ని మార్పులు స్వయంగా ఆ వైరస్‌కు కూడా హాని చేసేలా ఉండొచ్చు.

ఇలాంటి మ్యుటేషన్లలో కొన్ని ఆ వైరస్ వల్ల కలిగే వ్యాధిని మరింత ప్రాణాంతకంగా మార్చడం, సంక్రమణ శక్తిని పెంచడం చేస్తాయి. ఇలాంటి ప్రమాదకర మ్యుటేషన్ల అనంతరం వ్యాప్తి చెందుతున్న వైరస్‌ను కొత్త వేరియంట్‌గా పిలుస్తారు.

కొత్త వేరియంట్ల వ్యాప్తి ఎలా ఉంది?

భారత్‌లో సెకండ్ వేవ్‌కు కారణం డెల్టా వేరియంటేనని పరిశోధనలు చెబుతున్నాయి. సెకండ్ వేవ్ సమయంలో భారత్‌లో కొన్ని రోజుల్లో రోజుకు నాలుగు లక్షలకుపైగా కేసులు నమోదయ్యాయి.

జనవరి, మార్చి మధ్యలో మహారాష్ట్రలో సేకరించిన 361 కోవిడ్ శాంపిళ్లలో 220 శాంపిళ్లలో మొదట ఈ వేరియంట్‌ను గుర్తించారు.

బ్రిటన్‌లో ఫిబ్రవరి 22 తరువాత ఇలాంటివి 103 కేసులు గుర్తించారు.

డెల్టా, డెల్టా ప్లస్ మరింత ప్రమాదకరమా?

2021 ఏప్రిల్, మే నెలల్లో భారత్‌లో విరుచుకుపడిన డెల్టా వేరియంట్ దేశాన్ని అతలాకుతలం చేసింది. కేసులు, మృతుల సంఖ్య వేగంగా పెరగడంతో మళ్లీ లాక్ డౌన్ విధించాల్సి వచ్చింది.

ఈ డెల్టా వేరియంట్‌లోని కొన్ని మ్యుటేషన్లకు దక్షిణాఫ్రికా, బ్రెజిల్ వేరియంట్లతో పోలిక ఉందని లూసియానా స్టేట్ యూనివర్సిటీ వైరాలజిస్ట్ డాక్టర్ జెరెమీ కామిల్ అన్నారు.

రోగ నిరోధక శక్తిలోని యాంటీబాడీలను తప్పించుకుని మనిషి శరీరంలోకి ప్రవేశించేలా ఈ మ్యుటేషన్ వైరస్‌కు తోడ్పడగలదని కామిల్ అభిప్రాయపడ్డారు.

‘‘కొత్తగా పుట్టుకొచ్చిన డెల్టా ప్లస్, కిందటి ఏడాది తొలిసారిగా భారతదేశంలో కనిపించిన డెల్టా వేరియంట్ బంధువే’’ అని ఆయన చెప్పారు.

ప్రధానంగా డెల్టా వేరియంట్ వల్లే రెండో దశ తీవ్రంగా మారింది. వైరస్ వ్యాప్తి ఇలాగే కొనసాగితే భవిష్యత్తులో మరిన్ని కొత్త రకాలు పుట్టుకు రావొచ్చని నిపుణులు అంటున్నారు.

మరోవైపు ప్రపంచ వ్యాప్తంగా మొదట్లో విజృంభించిన ఆల్ఫా వేరియంట్ స్థానాన్ని ఈ డెల్టా వేరియంట్ భర్తీ చేసిందని ప్రపంచ ఆరోగ్య సంస్థ (డబ్ల్యూహెచ్‌వో) కూడా వెల్లడించింది.

డెల్టాలో కొన్ని మ్యుటేషన్ల అనంతరం డెల్టా ప్లస్ వచ్చింది. దీన్ని కూడా "వేరియంట్ ఆఫ్ కన్సర్న్"గా భారత ప్రభుత్వం ప్రకటించింది.

అయితే, డెల్టా ప్లస్‌ను 'వేరియంట్ ఆఫ్ కన్సర్న్' కేటగిరీలో చేర్చడాన్ని కొందరు వైరాలజిస్టులు ప్రశ్నించారు. డెల్టా ప్లస్ మరింత ప్రమాదకరం అనడానికి ఆధారంగా తగినంత డేటా అందుబాటులో లేదని వారు వివరించారు.

''22 డాటా సీక్వెన్స్‌ల ఆధారంగా దీన్ని వేరియంట్ ఆఫ్ కన్సర్న్‌గా చెప్పలేం'' అని వైరాలజిస్ట్ డాక్టర్ గగన్‌దీప్ కాంగ్ అన్నారు.

''వేరియంట్ ఆఫ్ కన్సర్న్‌గా దీన్ని పరిగణించాలంటే మరింత క్లినికల్, బయలాజికల్ సమాచారం అవసరం'' అన్నారామె.

లామ్డా వేరియంట్ కూడా..

బ్రిటన్‌లో ఓ కొత్త వేరియంట్ వ్యాపిస్తున్నట్లు పరిశోధకులు గుర్తించారు. దీనికి లామ్డా వేరియంట్‌గా నామకరణం చేశారు.

ఈ వేరియంట్ ఆగస్టు 2020లో దక్షిణ అమెరికా దేశం పెరూలో తొలిసారి కనిపించింది. దీన్ని సీ.37 అని కూడా పిలుస్తున్నారు. ఏప్రిల్ నుంచి పెరూలో నమోదైన కేసుల్లో 81 శాతం కేసులు ఈ వేరియంట్ వల్లే వచ్చాయి.

పెరూ, బ్రిటన్‌లతోపాటు ఉత్తర, దక్షిణ అమెరికాలు, ఐరోపాల్లో మొత్తం 29 దేశాల్లో లామ్డా వేరియంట్ వ్యాపించింది.

స్పైక్ ప్రోటీన్‌లో భిన్న మ్యుటేషన్లు జరగడంతో ఈ వేరియంట్ వేగంగా వ్యాపిస్తోందని ప్రపంచ ఆరోగ్య సంస్థ (డబ్ల్యూహెచ్‌వో) తెలిపింది. అయితే, వ్యాప్తి తీవ్రతపై అంచనా వేసేందుకు మరింత లోతైన అధ్యయనం అవసరమని సంస్థ అభిప్రాయపడింది.

ఇప్పటివరకు భారత్‌లో లామ్డా వేరియంట్ కేసులు వెలుగులోకి రాలేదు.

ఈ కొత్త సబ్‌వేరియంట్ ఏమిటి?

వైరస్ పరివర్తన చెందినప్పుడల్లా ఒక కొత్త వర్గం, ఉప వర్గంగా రూపాంతరం చెందుతుంది. BF.7 అంటే ఇంతకు ముందు వచ్చిన BA.5.2.1.7 వేరియంట్‌ నుంచి పరివర్తన చెందిందే. ఇది ఒమిక్రాన్ సబ్‌వేరియంట్ BA.5 నుంచి పరివర్తన చెందిన రకం.

ఈ నెల 'సెల్ హోస్ట్ అండ్ మైక్రోబ్' అనే సైంటిఫిక్ జర్నల్‌లో ప్రచురించిన ఒక కథనం ప్రకారం, ఈ కొత్త వేరియంట్ చాలా బలహీనమైనది. అంటే వ్యాక్సీన్ తీసుకున్నవాళ్లపై ఇది ఎక్కువ ప్రభావం చూపదు.

అయితే, ఈ సబ్‌వేరియంట్ కారణంగానే ప్రస్తుతం చైనాలో కోవిడ్ కేసులు తీవ్రమవుతున్నాయని చెబుతున్నారు.ఈ వేరియంట్ వేగంగా ఒకరి నుంచి ఒకరికి సంక్రమిస్తోందని అంటున్నారు.

వ్యాక్సీన్లు పనిచేస్తాయా?

వ్యాధి తీవ్రత తగ్గించే విషయంలో డెల్టా వేరియంట్‌పై ప్రస్తుత వ్యాక్సీన్లు పనిచేస్తాయని కేంబ్రిడ్జ్ యూనివర్సిటీలో క్లినికల్ మైక్రోబయాలజీ ప్రొఫెసర్ రవి గుప్తా వివరించారు. ప్రొఫెసర్ గుప్తా బృందం నేచర్ జర్నల్‌లో ప్రచురించిన ఒక వ్యాసం ప్రకారం కొన్ని వేరియంట్లు వ్యాక్సీన్లను కూడా తప్పించుకోగలవు.. అలాంటి పరిస్థితిని నివారించడానికి వ్యాక్సీన్ డిజైన్ కూడా మార్చి మరింత సమర్థంగా తయారుచేయాల్సి ఉంటుంది.

ఆసుపత్రిలో చికిత్స పొందుతూ కూడా చనిపోయే పరిస్థితులు కంటే తక్కువ తీవ్రతతో వ్యాధి రావడమో, అసలు రాకపోవడమో జరగడం కొంత నయమని.. వ్యాక్సీన్ వల్ల అది సాధ్యమని చాలామంది అనుకుంటున్నారని డాక్టర్ కామిల్ చెప్పారు.

''కచ్చితమైన వ్యాక్సీన్ కోసం నిరీక్షించి సమయం వృథా చేసుకోవడం కంటే అందుబాటులో ఉన్న వ్యాక్సీన్ వేయించుకోవడం మంచిది'' అని లూసియానా స్టేట్ యూనివర్సిటీ వైరాలజిస్ట్ డాక్టర్ జెరెమీ కామిల్ అన్నారు.

"వైరస్ వ్యాప్తి ఉన్నంతకాలం కొత్త వేరియంట్లు వస్తూనే ఉంటాయి. ప్రమాదకరమైన కొత్త రకాలను గుర్తించి, ఆ ప్రాంతాల్లో కఠిన నిబంధనలు అమలుపరిచే విధంగా మన ప్రయత్నాలను మరింత పెంచాలి" అని అంటువ్యాధుల నిపుణులు డాక్టర్ లలిత్ కాంత్ అన్నారు.

ప్రస్తుతం మార్కెట్లో ఉన్న వ్యాక్సీన్లు మనకు తెలిసిన వేరియంట్లపై బాగానే పని చేస్తున్నాయి. కానీ, కొత్త వేరియంట్లపై పని చేస్తాయా, లేదా అనేది కచ్చితంగా తెలీదని అనేకమంది కోవిడ్ రోగులకు వైద్యం అందించిన డాక్టర్ ఫతాహుదీన్ అంటున్నారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)