ఈ కుక్క మృతదేహం 18 వేల ఏళ్లుగా చెక్కుచెదరలేదు

మృతదేహాలను కొన్ని రోజులు లేదా నెలల వరకూ ఫ్రీజ్ చేసి ఉంచొచ్చు. కానీ సైబీరియాలో 18 వేల ఏళ్ల నాటి ఒక కుక్క మృత దేహం దొరికింది. అది ఇన్నేళ్లనుంచీ మంచుతో కప్పుకుపోయి ఉండిపోయింది.

అయితే, పరిశోధకులు ఈ మృతదేహం కుక్కదా లేక తోడేలుదా అని ఇంకా తెలుసుకునే ప్రయత్నంలో ఉన్నారు.

ఈ కుక్క చనిపోయినప్పుడు దాని వయసు రెండేళ్లని శాస్త్రవేత్తలు అంచనా వేశారు.

రేడియోకార్బన్ థెరపీ ద్వారా చనిపోయినప్పుడు ఈ కుక్క వయసు ఎంత, అది ఎన్నేళ్ల నుంచి మంచు అడుగున కూరుకుపోయుంది అనేది తెలుసుకున్నారు.

వేల ఏళ్లపాటు మంచు అడుగున ఉన్నప్పటికీ ఈ కుక్క వెంట్రుకలు, ముక్కు, దంతాలు చెక్కుచెదరలేదు.

ఈ కుక్క మృతదేహం తోడేళ్లు, ఆధునికకుక్కల మధ్య ఉన్న సంబంధాన్ని తెలిపే ఒక గొలుసులా పనిచేయగలదని శాస్త్రవేత్తలు చెబుతున్నారు.

స్వీడన్ సెంటర్ ఫర్ పెలియోజెనెటిక్స్‌లో పరిశోధకులు డేవ్ స్టెంటన్ సీఎన్ఎన్‌తో "ఈ కుక్క డీఎన్ఏ సీక్వెన్సింగ్ వల్ల ఇది తోడేళ్లకు సమానమైన పూర్వాపరాలు ఉన్న జాతికి సంబంధించిన కుక్క అని తెలిసింది" అన్నారు.

"మాకు దీని కళేబరం నుంచి చాలా సమాచారం లభించింది. దాని ఆధారంగా మనం ఆ కుక్క ఏ జాతికి చెందిందో తెలుసుకోవచ్చు" అన్నారు.

అదే సెంటర్‌లో మరో పరిశోధకుడు డెలన్ ఒక ట్వీట్‌లో "ఈ కళేబరం తోడేలు పిల్లదా, లేక అత్యంత పురాతన కుక్క జాతికి సంబంధించినదా? అని ప్రశ్నించారు.

ఈ కుక్కకు 'డోగర్' అనే పేరు పెట్టారు. అంటే, యాకూట్ భాషలో స్నేహితుడు అని అర్థం

ఆధునిక కుక్కలను తోడేళ్ల వంశానికి చెందినవిగా భావిస్తారు. కానీ కుక్క ఎప్పుడు పెంపుడు జంతువుగా మారింది అనే అంశంపై ఇప్పటికీ చర్చ జరుగుతోంది.

2017లో ప్రచురితమైన ఒక అధ్యయనంలో కుక్కలు 20 నుంచి 40 వేల ఏళ్ల క్రితం పెంపుడు జంతువులుగా మారాయని తేలింది.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)