கொரோனா வைரஸ்: சீனாவின் 5 லட்சம் ரேபிட் டெஸ்ட் கிட்களின் ஆர்டரை ரத்து செய்த இந்தியா

கொரோனா வைரஸ் தொற்று உள்ளதா என்பதை கண்டறிவதற்கான, சுமார் ஐந்து லட்சம் ரேபிட் டெஸ்டிங் கிட்களுக்கான (rapid testing kit) ஆர்டர்களை இந்திய அரசு ரத்து செய்துள்ளது.

ஏற்கனவே சீனாவில் இருந்து இறக்குமதி செய்யப்பட்ட இந்தக் கருவிகளில் பெரும்பாலானவை தரம் குறைவாக இருப்பதாக குற்றச்சாட்டு எழுந்ததை தொடர்ந்து இந்த நடவடிக்கை எடுக்கப்பட்டுள்ளது.

சீனாவில் இருந்து இறக்குமதி செய்யப்பட்ட இந்தப் பரிசோதனைக் கருவிகள் மோசமான தரத்தில் உள்ளன என்பதால் அவற்றை பரிசோதனைக்காகப் பயன்படுத்த வேண்டாம் என்று இந்திய அரசு கடந்த வாரம் மாநில அரசுகளுக்கு அறிவுறுத்தியிருந்தது.

பரிசோதனைக்கு உட்படுத்தப்படும் நபர்களின் ரத்தத்தில், உடலுக்கு வெளியே உள்ள பிற பொருட்கள் (antibodies) ஏதாவது உள்ளனவா என்பதை சுமார் 30 நிமிட நேரத்தில் இந்தக் கருவிகள் காட்டும்.

மறுக்கும் சீனா

சீனாவில் இருந்து இறக்குமதி செய்யப்படும் பொருட்களின் தரம் குறைவாக இருப்பதாக கூறுவதை சீன அரசு மறுத்துள்ளது.

"சீனாவில் இருந்து ஏற்றுமதி செய்யப்படும் மருத்துவ உபகரணங்களின் தரத்துக்கே முன்னுரிமை கொடுக்கப்படும். சீனப் பொருட்கள் சரியாக செயல்படாது என்றும் தரம் குறைவானது என்றும் சில நபர்கள் முன் முடிவுகளுடன் பேசுவது நியாயமற்றது மற்றும் பொறுப்பற்றது," என்று இந்தியாவிலுள்ள சீனத் தூதரகத்தின் செய்தித்தொடர்பாளர் ஜீ ரோங் செவ்வாயன்று வெளியிட்டுள்ள செய்திக்குறிப்பில் தெரிவித்துள்ளார்.

இந்தக் கருவிகள் நேரடியாக கொரோனா வைரஸ் இருக்கின்றனவா இல்லையா என்பதைக் கண்டறியாமல் மனித உடலில் வழக்கத்துக்கு மாறான வேறு ஏதாவது பொருள், அதாவது ஆன்டிபாடீஸ், உள்ளதா என்பதையே கண்டறியும் என்பதால் இவற்றை பரிசோதனை செய்யப் பயன்படுத்துவது எந்த அளவுக்குப் பலனளிக்கும் என்பது குறித்து மருத்துவ வல்லுநர்கள் சந்தேகம் தெரிவித்துள்ளனர்.

போதிய அளவிலான எண்ணிக்கையில் பரிசோதனை செய்யப்படவில்லை என்ற காரணத்தால் இந்த கருவிகளை பயன்படுத்த அனுமதிக்க வேண்டும் என்று இந்திய மருத்துவ ஆராய்ச்சி கழகத்தில் பல்வேறு இந்திய மாநில அரசுகளும் தொடர்ந்து வலியுறுத்தின.

தொடக்கத்தில் அதற்கு அனுமதி அளிக்காத இந்திய மருத்துவ ஆராய்ச்சிக் கழகம் மாநில அரசுகள் தொடர்ந்து வலியுறுத்திய பின்பு இரண்டு சீன நிறுவனங்களிடமிருந்து இவற்றை இறக்குமதி செய்ய ஒப்புதல் அளித்தது.

சீனாவில் இருந்து இறக்குமதி செய்யப்பட்ட இந்தப் பரிசோதனை கருவிகள் இந்தியாவில் பயன்படுத்த தொடங்கிய பின்பு அவற்றின் துல்லியம் வெறும் 5% மட்டுமே இருப்பதாக புகார் எழுந்தது.

ஏற்கனவே வைரஸ் பரிசோதனை செய்யப்பட்டு, தொற்று இருப்பதாக உறுதி செய்யப்பட்ட நோயாளிகளிடம் மேற்கொள்ளப்பட்ட சோதனைகளில் கூட அவர்களுக்கு கோவிட்-19 இல்லை என்பதை காட்டும் வகையிலேயே இந்த கருவிகளின் முடிவுகள் இருந்தன.

அதன் பின்னர் இந்திய மருத்துவ ஆராய்ச்சிக் கழகம் மேற்கொண்ட பரிசோதனைகளும் அவை தரம் குறைவாக இருப்பதாகவே தெரிவிக்கப்பட்டது.

இந்தப் பிரச்சனைகளுக்கு நடுவில் இந்திய மருத்துவ ஆராய்ச்சிக் கழகம் அதிகமான விலை கொடுத்து இந்த கருவிகளை வாங்கியதாக சர்ச்சை உருவானது.

இதுதொடர்பாக தொடுக்கப்பட்ட வழக்கில் இவற்றின் விலை அதிகபட்சமாக 400 ரூபாய் மட்டுமே இருக்க வேண்டும் என்று நிறுவனங்களுக்கு திங்களன்று டெல்லி உயர் நீதிமன்றம் உத்தரவிட்டது.

தற்போது சீன நிறுவனங்களுக்கு வழங்கியுள்ள ஆர்டர்கள் ரத்து செய்யப்பட்டுள்ளதால் இந்திய அரசுக்கு எந்தவிதமான இழப்பும் ஏற்படவில்லை என்று அதிகாரிகள் தெரிவித்துள்ளதாக இந்திய ஊடகங்கள் செய்தி வெளியிட்டுள்ளன.

முன்பணமாக எந்தத் தொகையும் கொடுக்கப்படும் முன்பே ஒட்டுமொத்த ஆர்டரையும் ரத்து செய்துவிட்டதால் இந்திய அரசுக்கு எந்த இழப்பும் ஏற்படாது என்று அவர்கள் தெரிவித்துள்ளதாக ஊடகங்கள் கூறுகின்றன.

இந்தியாவின் அண்மை நிலை?

பிற செய்திகள்:

சமூக ஊடகங்களில் பிபிசி தமிழ்: