கோபப்பட்ட மெஸ்ஸி... வைரலான வீடியோ - பின்னணி என்ன?

"என்ன பார்க்கிறாய் முட்டாளே. அங்கே போ." உலக கோப்பை காலிறுதிப் போட்டியில் அர்ஜென்டினா மற்றும் நெதர்லாந்து அணிகளுக்கு இடையேயான போட்டிக்குப் பிறகு கடந்த வெள்ளிக்கிழமை பேட்டியளித்த லியோனல் மெஸ்ஸி கூறிய இந்த வாசகம் சமீப நாட்களாக வைரலாக பரவி வருகிறது. மீம்ஸ்கள், டிக்டாக் காணொளிகள், பாடல்கள், தொப்பிகள், டி-ஷர்ட்கள், காபி கோப்பைகள் என எல்லா இடங்களிலும் அழிக்கமுடியாததாக மாறிவிட்டது இவ்வாசகம். ஆனால், தொலைக்காட்சிகளால் படம்பிடிக்கப்பட்ட அர்ஜென்டினா நட்சத்திரத்தின் இந்த அவமதிப்பு யாரை நோக்கி இருந்தது ?

மைதானத்திற்கு உள்ளேயும் வெளியேயும் சூழ்ந்த பதற்றம்

இறுதி கட்டம் வரை பரபரப்புக்குப் பஞ்சமில்லாத நெதர்லாந்து உடனான அந்த காலிறுதி போட்டியில் அர்ஜென்டினா அணி வெற்றி பெற்றது.

ஆட்டநேர இறுதியில் நெதர்லாந்து வீரர் வூட் வெகோர்ஸ்ட் அடித்த கோலின் மூலம் 2-2 என கோல் எண்ணிக்கை சமநிலையை எட்டியதைத் தொடர்ந்து, ஆட்டம் பெனால்ட்டி ஷூட் அவுட் முறையை நோக்கி நகர்ந்தது.

ஆட்டம் நெடுகிலும் இரு அணி வீரர்களுக்கிடையேயும் சிறுசிறு மோதல்கள் தொடர்ந்து கொண்டே இருந்தன. போட்டி முடிந்த பிறகு, TyC ஸ்போர்ட்ஸ் சேனலுக்கு நேர்காணல் ஒன்றை வழங்கினார் மெஸ்ஸி.

இந்த நேர்காணலில் பதிலளிக்கத் தொடங்குவதற்கு முன்னர் தொலைவில் நிற்கும் யாரோ ஒருவரைப் பார்த்து, "என்ன பார்க்கிறாய் முட்டாளே..? நகர்ந்து போ" என்று அவர் கூறுவதைக் கவனிக்க முடிந்தது.

ஆனால், அவர் யாரிடம் இவ்வாறு பேசுகிறார் என்பதை அந்த காணொளியில் பார்க்க முடியவில்லை.

ஆனால், அப்போட்டியில் இரண்டு கோல்களை அடித்த நெதர்லாந்து வீரர் வூட் வெகோர்ஸ்ட்டிடம் தான் மெஸ்ஸி அவ்வாறு பேசினார் என்பது, இந்த சம்பவத்தின்போது மற்றொரு பக்கத்திலிருந்து பதிவு செய்யப்பட்ட வேறொரு காணொளி வாயிலாகத் தெரிய வந்தது. ஆட்டம் முடிந்த பிறகு, மெஸ்ஸியுடன் கைகுலுக்கிக்கொண்டு அவரது ஜெர்ஸியை பெற்றுக்கொள்ளும் நோக்குடனேயே வெகோர்ஸ்ட் மெஸ்ஸியை அணுகியதாகவும், ஆனால் மெஸ்ஸி அதனை மறுத்துவிட்டதாகவும் சொல்லப்படுகிறது. இது மட்டுமல்லாது, அர்ஜென்டினாவைச் சேர்ந்த லௌடாரோ மார்டினெஸ் மற்றும் கத்தாரில் வர்ணனையாளராகச் செயல்படும் 'குன்' அகுரோ ஆகியோருடனும் அந்த நெதர்லாந்து வீரர் வாக்குவாதம் செய்வதைக் காணமுடிகிறது. செர்ஜியோ அகுரோவின் கூற்றுப்படி, அர்ஜென்டினா கேப்டன் பேட்டியளிப்பதற்காகத் தயாராகிக் கொண்டிருந்த போது, வெகோர்ஸ்ட் ஆத்திரமூட்டும் மனப்பான்மையில் அவரை தூரத்தில் இருந்து பார்த்து 'ஏய், மெஸ்ஸி, ஏய், மெஸ்ஸி' என்று கூறியுள்ளார்.

அப்போதுதான், "என்ன பார்க்கிறாய் முட்டாளே. அங்கே போ." எனக் கூறியுள்ளார் மெஸ்ஸி. இந்த சம்பவம் குறித்து நேர்காணல் ஒன்றில் பேசியுள்ள வெகோர்ஸ்ட், தனது பக்க விளக்கத்தையும் கூறியுள்ளார். அதன்படி, "போட்டிக்குப் பிறகு நான் அவருடன் கைகுலுக்க விரும்பினேன். ஒரு கால்பந்து வீரர் என்ற முறையில் அவர் மீது எனக்கு மிகுந்த மரியாதை உண்டு.

ஆனால் அவர் எனக்கு கை கொடுக்கவில்லை. என்னுடன் பேச விரும்பவில்லை. எனக்கு ஸ்பானிஷ் அந்த அளவுக்குத் தெரியாது. ஆனால், அவர் மரியாதைக்குறைவான வார்த்தைகளைக் கூறினார். எனக்கு அது ஏமாற்றமளிக்கிறது, நான் மிகவும் ஏமாற்றமடைந்தேன்" என்று கூறியுள்ளார்.

சமூக ஊடகங்களில் பிபிசி தமிழ்: