Фуқдони нишонаҳои пешрафт дар Виен; Баррасии тамдиди музокирот

Image copyright U.S. Department of State

Бо наздик шудани муҳлати 24 ноябр, вузарои хориҷаи Гурӯҳи панҷ ба иловаи як, ки дар рӯзи якшанбе ҳамчунон ба музокироти фишурда барои расидан ба тавофуқи ҷомеъ бо Эрон идома доданд, дар ҳоли баррасии тамдиди музокирот ҳастанд.

Аммо бо таваҷҷуҳ ба ин ки нишонае аз пешрафт дар ин гуфтугӯҳо дар Виени Утриш дида намешавад, Омрико мегӯяд, ки яке аз гузинаҳо тамдиди давраи музокирот аст.

Ба гузориши хабаргузории Оссушиэйтед Пресс, як мақоми аршади омрикоӣ гуфт, ки Ҷон Керрӣ, вазири хориҷаи Омрико, ба Муҳаммадҷаводи Зариф, вазири хориҷаи Эрон, пешниҳод кардааст ду тараф барои тамдиди гуфтугӯҳо то баъд аз муҳлати 24 ноябр баҳс кунанд.

То кунун нишонаҳои рӯшани зиёде аз пешрафт дар ин даври музокирот дида нашуда, аммо манобеъи огоҳ дар давлати Эрон ба Касро Ноҷӣ, хабарнигори Би-би-сии форсӣ, гуфтаанд, ки пеш аз саромадани муҳлати 24 ноябр дар рӯзи душанбе ду тараф мумкин аст ба як "тавофуқи сиёсӣ" бирасанд.

Ба гуфтаи хабарнигори мо диплумотҳо муваффақ нашудаанд ба як тавофуқи ҷомеъ ва густарда наздик шаванд ва дар иваз дар ҳоли кор рӯйи санаде ҳастанд, ки дар беҳтарин ҳолати мумкин аст, порометрҳои як тавофуқ дар ояндаро таъриф кунад.

Пештар як хабаргузории эронӣ ба нақл аз аъзои тими музокиракунандаи Эрон, ки аз ӯ ном набурд, гузориш дод, ки як тавофуқи комил то рӯзи душанбе "ғайримумкин" аст.

Ихтилофоти қобили таваҷҷуҳе бар сари абъоди барномаи ғанисозии урониюм тавассути Эрон ва замони бардошта шудани таҳрим байни ду тараф вуҷуд дорад.

Филип Ҳомунд, вазири хориҷаи Бритониё, ҳам ба Би-би-сӣ гуфт: "Намехоҳам умеде козиб эҷод кунам. Мавозеъи мо ҳанӯз хеле аз ҳам фосила дорад."

Аммо ӯ баъдан дар посух ба хабарнигорон дар мавриди тамдиди музокирот гуфт, ки ду тараф то пеш аз муҳлати нимашаби душанбе як бори дигар "охирин фишор"-ро барои расидан ба тавофуқ хоҳанд овард: "Дар ҳоли ҳозир мо бар охирин фишор тамаркуз дорем, субҳи фардо фишори зиёде барои убур аз хат поён хоҳем овард."

Ӯ изофа кард, ки агар тавофуқ амалӣ нашавад, он вақт дар мавриди қадами баъдӣ тасмим хоҳанд гирифт.

Як мақоми аршади вазорати хориҷаи Омрико ҳам якшанбе аср гуфт: "Тамаркузи мо ҳамчунон бар гомҳое ба сӯйи тавофуқ аст, аммо табиъист, ки каме беш аз 24 соъат монда ба поёни муҳлат, гузинаҳои мухталифро баррасӣ мекунем."

Ҳамазмон Бинёмин Нетонёҳу, нахуствазири Исроил, ба тарафҳои музокира бо Эрон ҳушдор дод аз ин "иштибоҳи таърихӣ" парҳез кунанд.

Ӯ ба шабакаи Эй-би-сии Омрико гуфт: "Муҳим аст тавофуқи бад ҳосил нашавад. Як тавофуқи бад ба Эрон имкон медиҳад ҳазорон сонтрифужро нигаҳ дорад ва бо он ғанисозӣ анҷом диҳад ва ин ҳамон чизе аст, ки барои бумби атумӣ лозим аст."

Дар ин музокирот Омрико, Бритониё, Чин, Фаронса, Русия ва Олмон мехоҳанд Эрон барномаи атумиашро дар изои бардошта шудани таҳримҳо маҳор кунад. Эрон мегӯяд ин барномаи сулҳомезро барои таъмини энержӣ мехоҳад.