Даргирии хиёбонӣ дар Кубонӣ пас аз вуруди Доъиш ба шаҳр

Image copyrightEPA

Бино ба гузоришҳо, пайкорҷӯёни гурӯҳи мавсум ба Давлати Исломӣ вориди шаҳри муҳимми Кубонӣ дар Сурия дар канори марзи Туркия шудаанд ва даргири задухӯрдҳои хиёбонӣ бо мудофеъони курди ин шаҳр ҳастанд.

Пайкорҷӯёни ин гурӯҳ аз тарафи шарқӣ ворид шуданд ва парчами сиёҳи гурӯҳро рӯи сохтмонҳо ва нуқоти муртафаъ ба эҳтизоз дароварданд. шарқи Кубонӣ дар рӯзҳои ахир маҳалли шадидтарин даргириҳо будааст.

Гуфта мешавад, ки садҳо ғайринизомӣ дар ҳоли гурез аз марз ба дохили Туркия ҳастанд.

Бо ишғоли Кубонӣ гурӯҳи Доъиш кунтрули борикаи баланде дар канори марзи Туркияро ба даст хоҳад овард.

Пештар яке аз мақомҳои курди шаҳри Кубонӣ дар шимоли Сурия изъон кард, ки ин шаҳр дар маърази "хатари ҷидди суқут" ба дасти шибҳнизомиёни гурӯҳи мавсум ба Давлати Исломӣ аст.

Идрис Нисон ба Би-би-сӣ гуфт, ки нерӯҳои Доъиш кунтрули як теппаи истротежик бар фарози шаҳрро ба даст гирифтаанд ва акнун оташбори онҳо тамоми нуқоти шаҳрро дар бар мегирад.

"Силоҳҳои маҳдуд"

Осия Абдуллоҳ, як сиёсатмадори аршади курд, ки аз раҳбарони ҳизби иттиҳодияи демукротики Курдистон аст ва дар Кубонӣ ба сар мебарад, ба Би-би-сӣ гуфт, ки даргириҳо дар се маҳалла дар ҷараён аст.

Ӯ гуфт: "Алъон набард дар хиёбонҳои Кубонӣ ҷараён дорад. Ҳанӯз ҳазорон ғайринизомӣ дар шаҳр ҳастанд ва Доъиш аз силоҳҳои сангин истифода мекунад. Агар алъон ҷилави онҳо гирифта нашавад, қатли омми васеъе рӯй хоҳад дод."

Ӯ изофа кард: "Онҳо моро тақрибан аз ҳама тараф бо тонк муҳосира кардаанд. Онҳо бо силоҳҳои сангин шаҳрро гулӯлаборон кардаанд. Ҷангҷӯёни курд то ҷое, ки битавонанд бо силоҳҳои маҳдуде, ки доранд, муқовимат мекунанд."

Мустафо Болӣ, як сухангӯи курдҳо дар Кубонӣ, ба хабаргузории Фаронса гуфт, ки ба ҳама ғайринизомиён дастури тахлия дода шуда ва ду ҳазор ғайринизомӣ рӯзи душанбе онҷоро тахлия карданд.

Пештар фармондеҳии марказии Омрико таъйид кард, ки ҳамалоти ҳавоии тозае тавассути нерӯҳои таҳти фармондеҳии Омрико анҷом шуда, ки "ду мавзеъи Доъишро дар ҷануби шаҳр мунҳадим карда," аммо хонуми Абдуллоҳ гуфт, ки ҳамалот дар ин ноҳия "беасар" будааст.

Ӯ гуфт: "Онҳо силоҳҳои сангин ва тонк доранд, барои ҳамин аст, ки муқовимати мо маҳдуд аст ва ҳамалоти ҳавоии бештаре лозим аст."

Осия Абдуллоҳ гуфт: "Боқӣ ҷаҳон дар мавриди ин қатли омми қарибулвуқӯъ сукут кардааст."

Дар соири таҳаввулот дар рӯзи душанбе:

• Гурӯҳи Дидбони Ҳуқуқи Башари Сурия мегӯяд ҳадди ақал 30 ҷангҷӯйи курд дар ду ҳамла дар шаҳри Ҳасака дар шимоли шарқии Сурия кушта шуданд
• Йенс Истивлетенберг, дабири кулли Ноту, қавл дод аз Туркия, ки узви Ноту аст, ҳифозат шавад: "Туркия бояд бидонад, ки агар ҷанг ба ин кишвар сироят кунад, агар ҳар ҳамлае дар натиҷаи хушунати ҷорӣ дар Сурия ба Туркия сурат гирад, Ноту ҳузур хоҳад дошт."
• Филип Ҳомунд, вазири хориҷаи Бритониё, бо Айёд Аловӣ, муъовини раиси ҷумҳури Ироқ, дидор кард ва қавл дод, ки "аз ҳама абзорҳои мавҷуд барои шикасти Доъиш истифода хоҳад шуд."

Эҳтизози парчами Доъиш Шибҳнизомиёни Доъиш аз се ҳафта пеш Кубонӣ, дар наздикии марзи Туркияро ба муҳосира дароварданд ва шаҳрро бо тонку хумпора зери оташ ширифтанд.

Хабаргузориҳо тасовиреро мунташир кардаанд, ки нишон медиҳад парчамҳои шибҳнизомиёни Давлати Исломӣ бар фарози як сохтмон ва як теппа дар ҳошияи шарқии шаҳри Кубонӣ ба эҳтизоз даромадааст.

Ин аввалин бор аст, ки гузоришҳое аз вуруди нерӯҳои Давлати Исломӣ (Доъиш) ба дохили шаҳри Кубонӣ мунташир мешавад.

Хабарнигорони маҳаллӣ ҳам аз вуқӯъи даргириҳои хиёбонӣ дар дохили шаҳр хабар додаанд.

Ба гуфтаи ин хабарнигорон ягонҳои ҳифозати халқи курдҳои Сурия дар ҳоли тахлияи ғайринизомиёни боқимонда аз дохили шаҳр ҳастанд.

Даргириҳо дар ин минтақа боъиси овора шудани беш аз сад ҳазор нафар аз сокинони ин шаҳри умдатан курднишин ва паноҳ бурдани онҳо ба Туркия шудааст.

Хабарнигори Би-би-сӣ шоҳиди теъдоди зиёде омбулонс дар Туркия буда, ки барои бардоштани захмиҳо ба марз мераванд. Бисёре аз захмиҳо дар бемористонҳои наздики марз мудово мешаванд.

Туркия ҳафтаи пеш қавл дод монеъи суқути Кубонӣ шавад ва порлумони ин кишвар муҷаввизи амалиёти низомӣ алайҳи Доъишро содир кард.

Аммо ба назар мерасад, ки ин кишвар иқдоме барои ҷилавгирӣ аз пешравии Доъиш сурат надода бошад.

Хабарнигорон мегӯянд Туркия моил нест ба нерӯҳои курди ин шаҳр кумак кунад, чун онҳо муттаҳиди ПКК ҳастанд, ки Туркия онро як гурӯҳи теруристӣ мешиносад.