‘Nilijaribu kujiunga na IS kumsaidia mama yangu aliyekuwa akiugua’

Ahmed bado ni kijana, lakini badala ya kusoma yeye hutumia muda kila siku kazini. Anaishi katika mji wa kaskazini mwa Lebanon wa Tripoli, mojawapo ya maeneo maskini zaidi kwenye Mediterania.

Licha ya saa anazozitumia kazini, anaondoka na dola chache tu kwa wiki. Anahitaji kumsaidia mama yake mgonjwa, lakini kazi yake ya mikono inayomsumbua inamletea kipato kidogo cha kuwalisha wote wawili.

Hali hiyo ya kutokuwa na tumaini ilimfanya atafute njia ya kutokea. Katika mgahawa wa intaneti mjini Tripoli, alianza kuzungumza na mwanaume aliyemwambia Ahmed kuwa alikuwa mwajiri wa kundi la Islamic State - wanamgambo wenye itikadi kali wa Kiislamu wa Sunni ambao wakati fulani walidhibiti maeneo makubwa ya nchini Syria na Iraq, na ambao wamefanya ukatili na ugaidi, mashambulizi katika kanda na duniani kote.

"Nilikuwa nasoma Sharia [sheria za Kiislamu], na siku baada ya siku walitufundisha kuhusu jihadi," Ahmed aliniambia. "Walituambia kuhusu Iraq na kundi la Islamic State [IS].

Tuliipenda IS, kwa sababu ilikuwa maarufu. Niliwasiliana na mwanaume aliyekuwa gerezani, na akaniambia 'nitakupeleka huko'.

"Alikuwa akizungumza kwa utulivu, ni vigumu kufikiria Ahmed kuwa mpiganaji. Tulizungumza kuhusu uhalifu mbaya sana ambao kikundi hicho kilikuwa kimefanya, nami nikamshinikiza aeleze kwa nini angetaka kuwa sehemu ya jambo kama hilo.

"Nilitaka kujiunga na IS na kuwa mujahid kwa sababu sikuweza kukabiliana na mgogoro hapa", anajibu polepole. "Kisha nilimkaribia Mungu wangu, na kuishi kwa raha, na sio kuwa na wasiwasi kila wakati juu ya gharama ya maisha."

Ahmed alikuwa amefanya uamuzi wake. Alimwambia mwajiri alitaka kujiandikisha, kuondoka Lebanon na kusafiri kupigania kundi hilo nchini Iraq na Syria.

Lakini baada ya saa chache, alichukuliwa na polisi na kukamatwa. Maafisa wa ujasusi wa Jeshi la Lebanon walimhoji kwa siku tano kabla ya kuachiliwa. Ilimfanya ajutie chaguo lake, lakini bado hana suluhu la matatizo yake mengi.

"Inanifanya nitamani kujiua. Nina deni la watu pesa nilizokopa ili kupata samani za chumba changu lakini sina uwezo wa kurudisha. Hatujui kitakachotokea siku za usoni."

Katika mitaa ya Tripoli, matumaini ni haba. Ndivyo ilivyo umeme, maji, mafuta, madawa na ajira. Katika mwaka uliopita, takriban vijana mia moja wa Lebanon wanasemekana kujiunga na IS.

Sio tu kuhusu kujiandikisha kwa itikadi kali ambayo kikundi kinawakilisha.

Wanajaribu kutoroka umaiskini unaotatiza wa nchi iliyo katika hali mbaya.

Kwa wengi, madhehebu yao ya kidini au malezi ya familia inamaanisha kuwa fursa zimefungwa kwao. Jitihada hizo za kuokoka zimewaona vijana wengine wakichukua hatua za kukata tamaa.

Nabil Sari ni jaji maarufu mjini Tripoli. Aliwahi kushughulikia kesi hizi hapo awali.

"Hakuna nafasi za kazi, hakuna shule au nafasi za kusoma. Na baadhi ya wale waliojiunga na IS kwa sababu hiyo, walijuta, na walijaribu kuwasiliana na familia zao ili warudi,lakini hawawezi."

Kundi la Islamic State halina nguvu lililowahi kuwa nayo katika Mashariki ya Kati. Kwa muda lilidhibiti sehemu kubwa ya ardhi ambayo iliteua ukhalifa [Dola la Kiislamu] kote Syria na Iraq.

Wengi wa kundi hilo walishindwa katika vita vya umwagaji damu katika mji wa Syria wa Baghouz mnamo 2019. Lakini waliosalia ambao hawakuuawa au kufungwa wanaendelea kushambulia maeneo ambayo hapo awali ilishikilia.

Na mapema mwaka huu, ripoti za mashambulizi hayo zilianza kuwa na maelezo ya wahalifu wa Lebanon. Mohammad Sablouh ni wakili ambaye anawakilisha familia zao kadhaa.

Kwa pamoja tulielekea Wadi Khaled ambako watu wengi waliopotea waliishi. Ni eneo gumu, lenye umaskini. Watoto hucheza siku nzima katika vichochoro vyenye vumbi.

Mgogoro huo unamaanisha wengi hawapati nafasi ya kwenda shule. "Hapa ni kutengwa na serikali," Mohammed alieleza. "Angalia maeneo haya maskini. Hakuna anayejali.

Nchi haifanyi wajibu wake kwa raia wake. Na tabaka hili la watu masikini litatumika na kuajiriwa kwa IS." Mwaka mmoja uliopita, Bakr Seif alitoweka.

Alikuwa amebakiza wiki kadhaa kabla ya kufunga ndoa. Ingawa alikuwa amekamatwa na kukaa gerezani kwa muda, alikuwa akijenga maisha ya baadaye na mchumba wake.

Hakumwambia mama yake Umm Seif kwamba anapanga kuondoka. “Alituambia anakwenda kumuona mchumba wake, na atarudi saa sita mchana,” aliniambia huku macho yake yakitokwa na machozi. "Na akaenda, na hakurudi tena." "Tulisikia habari hizo kwenye mitandao ya kijamii," baba yake Mahdi anaendelea.

"Ilikuwa kwenye simu zetu zote. Hatukuiamini. Na kisha kila mtu akaanza kupiga kelele na kulia."

Umm ananyamaza na kufuta macho yake. "Alikuwa na furaha maishani, alikuwa anajiandaa kwa ajili ya harusi na alikuwa na furaha, alikuwa ametoka gerezani. Alikuwa kijana mzuri sana, mwenye heshima, mwenye adabu. Kila nitakachosema unaweza kusema 'ni mama yake', lakini huu ndio ukweli." Chini ya mwezi mmoja baadaye, Umm alipokea ujumbe wa sauti. Sauti mbaya, iliyobadilishwa na kompyuta ilimwambia kwamba mtoto wake aliuawa akiwapigania IS nchini Iraq.

Wazazi wa Bakr hawaamini ujumbe huo wa sauti, au kile mamlaka ya Lebanon imewaambia kuhusu hatima yake. Wanafikiri hakuwahi kuondoka Lebanon, na bado amefichwa kizuizini mahali fulani nchini.

Baba yake Bakr Mahdi alinionesha kwenye gorofa ya mwanawe. Ni nadhifu lakini tupu. Chokoleti zilizofunikwa kwa dhahabu ambazo Bakr alinunua tayari kwa ajili ya harusi yake bado ziko kwenye stendi ya maonyesho, hazijaliwa.

Jeshi la Iraq linasema Bakr aliondoka Lebanon na kusafiri kwenda huko kujiunga na IS.

Wanadai alihusika katika shambulio la wanamgambo kwenye kambi ya jeshi huko Diyala na kuua wanajeshi 10.

Siku chache baadaye wanachama tisa wa IS waliuawa katika shambulio la kulipiza kisasi la anga la vikosi vya Iraq. Nusu yao walikuwa Walebanon.

Vikosi vya Iraq vinasema Bakr alikuwa mmoja wao. Wanasisitiza kuwa wana uhakika kabisa wa utambulisho wake, na wanasema wanafanya uchunguzi wa DNA kwenye miili ya wale wanaowaua ili kuthibitisha hilo.

Nilizungumza na Jenerali wa Jeshi la Iraq Yahya Rasoul Abdulla kuhusu wanaume wanaoondoka Lebanon kujiunga na IS.

Alikuwa na maneno makali kwao. "Ujumbe wangu kwa ulimwengu wa Kiarabu, na haswa kwa vijana wa Lebanon, ni kwamba shirika hili la kigaidi linakutumia kama kuni kwenye moto. Unaweza kuona na kuuliza watu wa Iraqi ambao waliishi chini ya udhibiti wa IS, walikuwa wakiua watu, wakiwabaka wanawake. , kuwafanya wanawake kuwa watumwa, kuharibu maeneo ya urithi, kuharibu miundombinu, hata makaburi ya nabii, usiwe mafuta ya vita vyao, usitumike nao. "Jeshi la Iraq liko kila mahali. Popote ambapo shirika hili linakwenda, katika jangwa, milima, mabonde, tutawakimbiza na tutawaua."

Kuanzia kilele mwanzoni mwa mwaka huu, idadi ya wanaojiunga na IS imeanza kupungua. Hadithi za wale walioondoka sasa zinajulikana sana mjini Tripoli, na hilo linafanya matarajio ya kuwafuata yasiwe makubwa.

Lakini wakati Lebanon inaendelea kuhangaika na mzozo wake wa kifedha na wanasiasa wake kukwama kuunda serikali mpya baada ya uchaguzi wa nchi hiyo, maisha hayawi rahisi. Na hivyo waajiri wa IS wanaendelea kuzunguka, wakitumai kuvutia ulaji mpya wa vijana wa Lebanon walionyimwa haki.