Faahfaahin kasoo baxeysa weerarka Al-Shabaab ee weli ka socda Hoteelka Muqdisho
Xigashada Sawirka, Getty Images
Rasaas goos goos ah ayaa weli laga maqlayaa hoteelka aadka loo ilaaliyo ee Villa Rose ee ku yaal xayndaabka qarsiga madaxtooyada ee caasimadda Soomaaliya ee Muqdisho, halkaas oo xalay siddeeddii fiidnimo iyo daqiiqado ay ururka Al-Shabaab ku ekeeyeen weerrar culus.
Dadka ku sugan aaggaasi ayaa ku warramaya in tan iyo xalay ay maqlayeen qaraxyo iyo rasaas la isku waydaarsanayo hoteelka gudahiisa, goobtaas oo ay tagaan saraakiisha dowladda.
Siduu ku bilowday weerrarka?
Waxaa la sheegay in qarax lagu bilaabay weerrarkaasi, kaddibna rag hubaysan intay u gudbeen hoteelka ay halkaasi ka dagaallamayaan.
Ciidammada ammaanka ayaa wada howlgal ay ku doonayaan inay ku soo afjaraan duullaanka iyo dagaalka ka socda hoteelka, halkaas oo la rumaysan yahay in weli qaar kamid ah raggii duullaanka soo qaaday ay ka dhex dagaallamayaan.
Illaa iyo haatan saraakiisha ammaanka faafaahin dheeraad ah kama aanay bixin waxa hoteelka waqtigan ka soconaya.
Afhayeenka booliska Soomaaliya, Korneel Sadiiq Aaden Doodishe, ayaa isla xalay sheegay in ciidammada ammaanku ay howgal ka wadaan hoteelkaasi, islamarkaana ay soo badbaadiyeen dad badan oo isugu jira shacab iyo mas’uulyiinba.
Macluumaadkan waxaa daabacay X. Waxaan dalbanayenaa fasaxaaga ka hor inta aan la furin, waxaa laga yaabaa inay isticmaalayaan cookies iyo farsamooyin kale. hadii aad u bahato akhri X xeerarka cokie iyo kan ku saabsan xogta gaarka ah ka hor inta aadan aqbalin. si aad u aragto xogta guji ‘aqbal oo soco’.
Dhammaadka X boggan
Wasiiru dowladaha arrimaha deegaanka ee Soomaaliya, Aadan Aw Xirsi, ayaa soo dhigay bartiisa Twitter-ka farriin uu ku sheegayo inuu ka badbaaday weerrarka halkaasi ka socda.
Ururka Al-Shabaab oo bayaan soo saaray goordhaweyd ayaa shaaciyay in iyagu ay ka dambeeyaan weerrarka hoteel Villa Rose, islamarkaana ay ciidammadoodu halkaas howlgal ka wadaan.
Waxaa la sheegayaa inay jiraan dad waxyeello ay ka soo gaartay weerrarkaasi oo dhimasho iyo dhaawacba leh, kuwaas oo ay dadku iskula wadaagayaan baraha ay bulshada ku wada xiriiraan, illaa iyo haatanse lama oga khasaaraha dhabta ah ee uu ka tagay weerrarkaasi.
Xaguu ku yaal hotelka uu weerrarka ka socdo?
Xigashada Sawirka, Reuters
Hoteelka Villa Rose, waxa uu ku yaal xayndaabka sida wayn loo ilaaliyo ee ay ku taal xarunta madaxtooyada ee Villa Somalia, ee magaalada Muqdisho, halkaas oo ay ka caaggan yihiin inay galaan gawaarida dadweynaha iyo kuwa ay wataan dadka shacabka ah.
Sidaas oo ay tahayse waxaa muuqata in ragga weerrarka soo qaaday ay ka gudbeen baro koontorool oo badan oo aad loo ilaaliyo, kaddibna ay hoteelka weerrar ku ekeeyeen.
Dad badan ayaa su’aal ka keenay sida dagaalyahanno ka tirsan Al-Shabaab ay ugu suuragashay inay u gudbaan halkaas oo ay weerrarka intaasi la eg ka gaystaan.
Hoteelkan aadka loo ilaaliyo ayaa waxaa la sheegayaa inay si joogto ah u tagaan mas’uuliyiin ay ka mid yihiin wasiirro, xildhibaanno, agaasimayaal, siyaasiyiin, iyo xitaa saraakiil sarsare oo ka tirsan ciidammada.
Dagaalka ka dhanka ah Shabaab iyo weerrarada ay kordhiyeen
Xigashada Sawirka, Getty Images
Ciidammada dowladda Soomaaliya iyo maleeshiyaad xulafo la ah ayaa bilihii ugu dambeeyay tuulooyin iyo degmooyin kala wareeegayay uruka Al-Shabaab, iyadoo dagaallo qaraarna ay haatan ka socdaan gobollada dhaca bartamaha dalka.
Xafiiska ra’iisul wasaaraha Soomaaliya oo todobaadkii hore soo bandhigay waxqabadkiisa 100-kii maalmood ee ugu horreeyay ee xukuumadda, ayaa lagu shaaciyay in bilihii lasoo dhaafay ururka Al-Shabaab loogaga dilay boqollaal dagaalyahan.
Sidaas oo ay tahayse, ururka Al-Shabaab ayaa u muuqanaya inuu kordhiyay weerrarada uu ka gaysanayo magaalada Muqdisho, iyadoo tan iyo markii ay dagaalladan ugu dambeeyay ay bilowdeen ay magaaladaasi ka dhaceen weerraro ay dad badan ku dhinteen.
Xigashada Sawirka, AFP
Bishii Agoosto 20-keedii ayey aheyd markii ay Al-Shabaab weerrar ku galeen hoteel Xayaat ee magaalada Muqdisho halkaas oo lagu dilay in ka badan 20 qof.
29-kii Oktoobar-na laba qarax oo waa wayn ayaa lagu weerraray dhismaha wasaaradda waxbarashada ee ku yaal isgoyska Soobe ee magaalada Muqdisho, halkaas oo iyana lagu dilay in ka badan 120 qof, halka dhowr iyo toban qofna illaa iyo haatan la la’yahay halka ay jaan iyo cirib dhigeen.
Dhowr boqol oo qof oo kale ayaa ku dhaawacmay qaraxyadaasi, qaarkood waxaa lagu dabiibayaa Muqdisho halka qaarka kalena loo qaadday dibadda.
Qaar ka mid ah dadka ka faallooda arrimaha amniga ayaa sheegaya in maadaama Shabaab uu culays badan ka saaran yahay gobollada dhexe oo uu dagaal ku haysto, ay weerraradan ka dhacaya Muqdisho oo ah ubucda dowladda ay ku muujinayaan inay weli jiraan, isagana khafiifiyaan culayska ay wajahayaan.
