ඔබ මේ දකින්නේ අවම ඩේටා ප්රමාණයක් භාවිත කරන මෙම වෙබ් අඩවියේ පෙළ පමණක් කියවිය හැකි අනුවාදයකි. රූප සහ වීඩියෝ අන්තර්ගත අපගේ මුලික වෙබ් අඩවිය මෙතැනින් නරඹන්න.
අවම ඩේටා ප්රමාණයක් භාවිතා කරන මෙම වෙබ් පිටු පිළිබඳ වැඩිදුර කියවන්න
ඔසප් නිවාඩුවේ අයිතිය ශ්රී ලංකා කාන්තාවන්ටත්?
ඉල්ලීමක් ඉදිරිපත් වන්නේ නම් ශ්රී ලංකාවේ කාන්තාවන්ටත් ඔසප් නිවාඩුවක් ලබාදිය යුතුයැ'යි කැබිනට් මණ්ඩලයට නිර්දේශ කිරීමට සූදානම් බව කාන්තා කටයුතු ඇමතිනී චන්ද්රානි බණ්ඩාර පවසන්නීය.
ඇමතිවරිය ඒ බව කියා සිටියේ චීනයේ පළාත් ගණනාවක් තුළ දැනටමත් ක්රියාත්මක ඔසප් නිවාඩුව ශ්රී ලංකාවේත් ක්රියාවට නැගිය හැකි දැයි සංදේශය කළ විමසීමකදීය.
ශ්රී ලංකාවේත් එවැනි නිවාඩුවක් ලබා දිය යුතුයැ'යි තමන් පුද්ගලිකව විශ්වාස කරන බව චන්ද්රානි බණ්ඩාර ඇමතිවරිය ප්රකාශ කළාය.
"දරන්න බැරි වේදනාවක්"
"දරන්න බැරි වේදනාවක් එන කාන්තාවෝ ඉන්නවා. මමත් ඒ වගේ කාන්තාවන් ගැන හොඳට දන්නවා. ඒ නිසා මගේ පෞද්ගලික මතයක් හැටියට මම හිතනවා එහෙම නිවාඩුවක් දෙන්න පුලුවන්නම් හොඳයි කියල." යනුවෙන් ඇය පැවසුවාය.
ඔසප් වීම ආරම්භයත් සමග දරාගත නොහැකි වේදනාවක් දැනෙන්නේ නම් එවැනි කාන්තාවන්ට මසකට දිනක් හෝ දෙකක් නිවාඩු ලබා ගැනීමට චීනයේ පළාත් ගණනාවක් තුළ නීතියෙන් අවස්ථාව හිමි වේ.
එවැනි ක්රමයක් ශ්රී ලංකාවේ ස්ථාපනය කිරීමට පෙර එහි ඇති ප්රායෝගික ගැටලු දීර්ඝ වශයෙන් සාකච්ඡාවට බඳුන් කළ යුතුව ඇති බව කාන්තා කටයුතු පිළිබඳ ඇමතිවරිය සඳහන් කළාය.
