ਰੂਸ ਦਾ 'ਵਿਕਟਰੀ ਡੇਅ': ਯੂਕਰੇਨ-ਰੂਸ ਜੰਗ ਬਾਰੇ ਪੁਤਿਨ ਨੇ ਕੀ ਕੁਝ ਕਿਹਾ
ਤਸਵੀਰ ਸਰੋਤ, Reuters
- ਲੇਖਕ, ਪੌਲ ਕਿਰਬੀ
- ਰੋਲ, ਬੀਬੀਸੀ ਪੱਤਰਕਾਰ
ਨੌਂ ਮਈ ਨੂੰ ਰੂਸ ਦੀ ਰਾਜਧਾਨੀ ਮਾਸਕੋ ਅਤੇ ਹੋਰ ਸ਼ਹਿਰਾਂ ਵਿੱਚ ਹਰ ਸਾਲ ਮਿਲਟਰੀ ਪਰੇਡ ਹੁੰਦੀ ਹੈ। ਇਹ ਦਿਨ 1945 ਵਿੱਚ ਜਰਮਨੀ ਉੱਪਰ ਰੂਸ ਦੀ ਜਿੱਤ ਦੀ ਸਾਲਗਿਰ੍ਹਾ ਵਜੋਂ ਮਨਾਇਆ ਜਾਂਦਾ ਹੈ।
ਵਲਾਦੀਮੀਰ ਪੁਤਿਨ ਦੇ ਕਾਰਜਕਾਲ ਦੌਰਾਨ ਵਿਕਟਰੀ ਡੇਅ ਦੀ ਪਰੇਡ ਰੂਸ ਦੀ ਫ਼ੌਜੀ ਸ਼ਕਤੀ ਦੀ ਨਿਮਾਇਸ਼ ਦਾ ਰੂਪ ਧਾਰਨ ਕਰ ਗਈ ਹੈ। ਇਸ ਦੌਰਾਨ ਦੂਜੇ ਵਿਸ਼ਵ ਯੁੱਧ ਵਿੱਚ ਮਾਰੇ ਗਏ ਰੂਸੀ ਫ਼ੌਜੀਆਂ ਦੀ ਕੁਰਬਾਨੀ ਨੂੰ ਵੀ ਸ਼ਰਧਾਂਜਲੀ ਦਿੱਤੀ ਜਾਂਦੀ ਹੈ।
ਰੂਸ ਦੀ ਰਾਜਧਾਨੀ ਮੌਸਕੋ ਵਿੱਚ ਰੈੱਡ ਸਕਵੇਅਰ ਉੱਤੇ ਆਪਣੀ ਵਿਕਟਰੀ ਡੇਅ ਸਪੀਚ ਵਿੱਚ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਕਿਹਾ ਕਿ ਯੂਕਰੇਨ ਵਿੱਚ ਵਿਸ਼ੇਸ਼ ਫੌਜੀ ਮੁਹਿੰਮ ਜ਼ਰੂਰੀ ਸੀ।
ਉਨ੍ਹਾਂ ਨੇ ਕਿਹਾ ਕਿ ਰੂਸ ਨੇ ਇਹ ਫ਼ੈਸਲਾ ਸਹੀਂ ਸਮੇਂ ਉੱਤੇ ਕੀਤਾ ਸੀ। ਪੁਤਿਨ ਨੇ ਇਸ ਫ਼ੈਸਲੇ ਨੂੰ ਇੱਕ ਸੁਤੰਤਰ, ਮਜ਼ਬੂਤ ਅਤੇ ਪ੍ਰਭੂਸੱਤਾ ਵਾਲੇ ਰਾਸ਼ਟਰ ਲਈ ਸਹੀ ਫ਼ੈਸਲਾ ਦੱਸਿਆ।
ਪੁਤਿਨ ਨੇ ਰੂਸੀ ਲੜਾਕਿਆਂ ਨੂੰ ਸੰਬੋਧਿਤ ਕਰਦਿਆਂ ਕਿਹਾ ਕਿ ਉਹ ਰੂਸ ਦੀ ਸੁਰੱਖਿਆ ਲਈ ਲੜ ਰਹੇ ਹਨ। ਰੂਸ ਵਿੱਚ ਵਿਕਟਰੀ ਡੇਅ ਪਰੇਡ ਦੂਜੇ ਵਿਸ਼ਵ ਯੁੱਧ ਵਿੱਚ ਰੂਸ ਦੀ ਨਾਜ਼ੀ ਜਰਮਨੀ ਉੱਤੇ ਜਿੱਤ ਦੇ ਸੰਦਰਭ ਵਿੱਚ ਹੁੰਦੀ ਹੈ।
ਤਸਵੀਰ ਸਰੋਤ, Reuters
ਪੁਤਿਨ ਨੇ ਮੰਨਿਆ ਕਿ ਪਿਛਲੇ ਸਾਲ ਤੋਂ ਹੋਰ ਯੂਰਪੀ ਦੇਸ਼ਾਂ ਅਤੇ ਨਾਟੋ ਦੇ ਨਾਲ ਤਣਾਅ ਚੱਲ ਰਿਹਾ ਸੀ। ਉਨ੍ਹਾਂ ਨੇ ਕਿਹਾ ਕਿ ਰੂਸ ਨੇ ਯੂਰਪ ਤੋਂ ਅਪੀਲ ਕੀਤੀ ਸੀ ਕਿ ਉਹ ਇੱਕ ਨਿਰਪੱਖ ਸਮਝੌਤਾ ਤਲਾਸ਼ ਕਰਨ, ਪਰ ਯੂਰਪ ਰੂਸ ਦੀ ਸੁਣਨਾ ਨਹੀਂ ਚਾਹੁੰਦਾ ਸੀ।
ਪੁਤਿਨ ਨੇ ਕਿਹਾ ਕਿ ਯੂਰਪ ਡੋਨਬਾਸ ਵਿੱਚ ਕਾਰਵਾਈ ਦੀ ਯੋਜਨਾ ਬਣਾ ਰਿਹਾ ਸੀ, ਪਰ ਹੁਣ ਰੂਸ ਦੀ ਕਾਰਵਾਈ ਉੱਥੇ ਹੀ ਕੇਂਦਰਿਤ ਹੈ।
ਰੂਸ ਦੇ ਰਾਸ਼ਟਰਪਤੀ ਨੇ ਕਿਹਾ ਕਿ ਕੀਵ ਵਿੱਚ ਉਹ ਇਹ ਕਹਿ ਰਹੇ ਸਨ ਕਿ ਉਨ੍ਹਾਂ ਨੂੰ ਸ਼ਾਇਦ ਪਰਮਾਣੂ ਹਥਿਆਰ ਮਿਲ ਜਾਵੇਗਾ ਅਤੇ ਨਾਟੋ ਸਾਡੇ ਨੇੜੇ ਜ਼ਮੀਨ ਲੱਭਣ ਲੱਗੇਗਾ। ਇਹ ਸਾਡੇ ਦੇਸ਼ ਅਤੇ ਸਾਡੀਆਂ ਸਰਹੱਦਾਂ ਲਈ ਇੱਕ ਸਪੱਸ਼ਟ ਖ਼ਤਰਾ ਹੋ ਗਿਆ ਸੀ।
ਪੁਤਿਨ ਨੇ ਆਪਣੇ ਸੰਬੋਧਨ ਦੌਰਾਨ ਦੂਜੇ ਵਿਸ਼ਵ ਯੁੱਧ ਵਿੱਚ ਮਾਰੇ ਗਏ ਰੂਸੀਆਂ ਲਈ ਅਤੇ ਡੋਨਬਾਸ ਵਿੱਚ ਲੜ ਰਹੇ ਰੂਸੀ ਫੌਜੀਆਂ ਲਈ ਦੋ ਮਿੰਟ ਦਾ ਮੌਨ ਰੱਖਣ ਦੀ ਅਪੀਲ ਕੀਤੀ।
ਆਪਣੇ ਸੰਬੋਧਨ ਵਿੱਚ ਪੁਤਿਨ ਨੇ ਕਿਹਾ ਕਿ ਪੱਛਮੀ ਦੇਸ਼ ਰੂਸ ਨੂੰ ਸੁਣਨਾ ਨਹੀਂ ਚਾਹੁੰਦੇ ਸਨ ਅਤੇ ਉਨ੍ਹਾਂ ਦੀ ਵੱਖਰੀ ਯੋਜਨਾ ਸੀ। ਉਨ੍ਹਾਂ ਨੇ ਕਿਹਾ ਕਿ ਪੱਛਮੀ ਦੇਸ਼ ਸਾਡੀ ਜ਼ਮੀਨ ਉੱਤੇ ਹਮਲਾ ਕਰਨ ਦਾ ਪਲਾਨ ਬਣਾ ਰਹੇ ਸਨ।
ਤਸਵੀਰ ਸਰੋਤ, Reuters
ਮੌਸਕੋ ਤੋਂ ਬੀਬੀਸੀ ਪੱਤਰਕਾਰ ਵਿਲ ਵੇਨਾਰਨ ਨੇ ਦੱਸਿਆ ਕਿ ਪੁਤਿਨ ਨੇ ਆਪਣੇ ਸੰਬੋਧਨ ਵਿੱਚ ਕੋਈ ਵੱਡਾ ਐਲਾਨ ਨਹੀਂ ਕੀਤਾ, ਜਿਸ ਦੀ ਸੰਭਾਵਨਾ ਜ਼ਾਹਿਰ ਕੀਤੀ ਜਾ ਰਹੀ ਸੀ। ਪਰ ਉਨ੍ਹਾਂ ਨੇ ਯੂਕਰੇਨ ਉੱਤੇ ਰੂਸ ਦੇ ਹਮਲੇ ਨੂੰ ਸਹੀ ਠਹਿਰਾਉਣ ਦੀ ਕੋਸ਼ਿਸ਼ ਕੀਤੀ। ਪੁਤਿਨ ਦੇ ਭਾਸ਼ਣ ਤੋਂ ਬਾਅਦ ਉੱਥੇ ਮੌਜੂਦ ਫੌਜੀਆਂ ਨੇ ਤਾੜੀਆਂ ਮਾਰੀਆਂ।
ਇਹ ਵੀ ਪੜ੍ਹੋ:
ਰੂਸੀ ਆਗੂ ਅਕਸਰ ਹੀ ਇਸ ਮੌਕੇ ਦੀ ਵਰਤੋਂ ਆਪਣੇ ਨਾਗਰਿਕਾਂ ਅਤੇ ਕੌਮਾਂਤਰੀ ਭਾਈਚਾਰੇ ਨੂੰ ਸੰਦੇਸ਼ ਦੇਣ ਲਈ ਕਰਦੇ ਹਨ।
ਵਿਕਟਰੀ ਡੇਅ ਦੀ ਪਰੇਡ ਪਹਿਲਾਂ ਸੋਵੀਅਤ ਰੂਸ ਵਿੱਚ ਕੱਢੀ ਜਾਂਦੀ ਸੀ। ਉਸ ਦੇ ਪਤਨ ਤੋਂ ਬਾਅਦ ਤਤਕਾਲੀ ਰਾਸ਼ਟਰਪਤੀ ਬੋਰਿਸ ਯੈਲਸਿਸ ਨੇ ਇਸ ਨੂੰ 1995 ਵਿੱਚ ਵਿਕਟਰੀ ਡੇ ਦੀ 50ਵੀਂ ਵਰ੍ਹੇਗੰਢ ਮੌਕੇ ਮੁੜ ਸ਼ੁਰੂ ਕੀਤਾ। ਉਸ ਤੋਂ ਬਾਅਦ ਸਾਲ 2008 ਵਿੱਚ ਵਲਾਦੀਮੀਰ ਪੁਤਿਨ ਨੇ ਇਸ ਵਿੱਚ ਰੂਸ ਦੇ ਹਥਿਆਰਾਂ ਦੀਆਂ ਝਾਕੀਆਂ ਸ਼ਾਮਲ ਕਰਕੇ ਹਰ ਸਾਲ ਕਰਨਾ ਸ਼ੁਰੂ ਕਰ ਦਿੱਤਾ।
ਰੂਸ ਦੀ ਪਛਾਣ ਉੱਥੋਂ ਦੀਆਂ ਸਕੂਲੀ ਕਿਤਾਬਾਂ ਵਿੱਚ ਯੂਰਪ ਨੂੰ ਅਜ਼ਾਦੀ ਦਵਾਉਣ ਵਾਲੇ ਇੱਕ ਮਸੀਹਾ ਦੀ ਹੈ।
ਤਸਵੀਰ ਸਰੋਤ, Getty Images
ਵਿਸ਼ੇਸ਼ ਫ਼ੌਜੀ ਕਾਰਵਾਈ
ਸਾਲ 2014 ਵਿੱਚ ਜਦੋਂ ਰੂਸ ਨੇ ਕ੍ਰੀਮੀਆ ਨੂੰ ਆਪਣੇ ਵਿੱਚ ਸ਼ਾਮਲ ਕੀਤਾ ਤਾਂ ਪੁਤਿਨ ਨੇ ਰੈਡ ਸਕੁਏਰ ਤੋਂ ਆਪਣੇ ਵਿਕਟਰੀ ਡੇ ਦੇ ਸੰਬੋਧਨ ਵਿੱਚ ਕਿਹਾ ਕਿ ਫਾਸੀਵਾਦ ਨੂੰ ਹਾਰ ਦਿੱਤਾ ਗਿਆ ਹੈ।
ਉਸ ਤੋਂ ਬਾਅਦ ਉਹ ਕਾਲੇ ਸਾਗਰ ਵਿੱਚ ਇਸ ਜਿੱਤ ਦੇ ਜਸ਼ਨਾਂ ਵਿੱਚ ਸ਼ਾਮਲ ਹੋਏ ਜਿੱਥੇ ਹਜ਼ਾਰਾਂ ਦਰਸ਼ਕ ਉਨ੍ਹਾਂ ਨੂੰ ਦੇਖ ਰਹੇ ਸਨ।
ਸੈਂਟਰ ਫਾਰ ਪੌਲਿਸ਼-ਰਸ਼ੀਅਨ ਡਾਇਲੌਗ ਐਂਡ ਅੰਡਰਸਟੈਂਡਿੰਗ ਦੇ ਅਰਨੈਸਟ ਵਾਸਕਿਊਵਿਚ,''ਇਸ ਸਾਲ ਵੀ ਪਹਿਲਾ ਉਦੇਸ਼ ਤਾਂ ਉਸ ਜਿੱਤ ਦਾ ਐਲਾਨ ਕਰਨਾ ਸੀ ਜਿਸ ਬਾਰੇ ਉਮੀਦ ਸੀ ਕਿ ਫਰਵਰੀ ਵਿੱਚ ਹਾਸਲ ਕਰ ਲਈ ਜਾਵੇਗੀ। ਹੁਣ ਉਹ ਸੋਮਵਾਰ ਲਈ ਕੋਈ ਪੀਆਰ ਐਕਸਰਸਾਈਜ਼ ਕਰ ਰਹੇ ਹਨ।''
ਤਸਵੀਰ ਸਰੋਤ, Reuters
''ਰੂਸੀ ਨਾਗਰਿਕਾਂ ਦਾ ਇਹ ਦੇਖਣਾ ਜ਼ਰੂਰੀ ਹੈ ਕਿ ਜਿਸ ਵਿਸ਼ੇਸ਼ ਫੌਜੀ ਕਾਰਵਾਈ ਬਾਰੇ ਉਹ ਇੰਨੇ ਦਿਨਾਂ ਤੋਂ ਸੁਣ ਰਹੇ ਹਨ, ਉਸ ਵਿੱਚੋਂ ਕੁਝ ਖ਼ਾਸ ਹਾਸਲ ਹੋਇਆ ਹੈ।''
ਹਾਲਾਂਕਿ ਵਿਕਟਰੀ ਡੇ ਮੌਕੇ ਇਹ ਤਾਂ ਨਹੀਂ ਕਿਹਾ ਜਾ ਸਕੇਗਾ ਕਿ ਅਸੀਂ ਯੂਕਰੇਨ ਵਿੱਚ ਸਰਕਾਰ ਬਦਲ ਦਿੱਤੀ ਹੈ। ਹਾਂ ਇਹ ਜ਼ਰੂਰ ਕਿਹਾ ਜਾ ਸਕਦਾ ਹੈ ਕਿ ਅਸੀਂ ਮਾਰੀਓਪੋਲ ਦੇ ਵੱਡੇ ਹਿੱਸੇ ਉੱਪਰ ਅਧਿਕਾਰ ਕਰ ਲਿਆ ਹੈ। ਮਾਰੀਓਪੋਲ ਭਾਵੇਂ ਰਾਖ ਦਾ ਢੇਰ ਬਣ ਗਿਆ ਹੋਵੇ ਪਰ ਰੂਸ ਦਾ ਦਾਅਵਾ ਰਿਹਾ ਹੈ ਕਿ ਉਹ ਯੂਕਰੇਨ ਵਿੱਚੋਂ ਨਾਜ਼ੀ ਖ਼ਤਮ ਕਰ ਰਿਹਾ ਹੈ।
ਰੂਸ ਅਜ਼ੋਵ ਬਟਾਲੀਅਨ ਨੂੰ ਹਰਾਉਣ ਦਾ ਵੀ ਦਾਅਵਾ ਕਰ ਸਕਦਾ ਹੈ। ਜਿਨ੍ਹਾਂ ਨੂੰ ਉਹ ਨਾਜ਼ੀ ਦੱਸਦਾ ਰਿਹਾ ਹੈ। ਇਹ ਦਾਅਵਾ ਦੂਜੇ ਵਿਸ਼ਵ ਯੁੱਧ ਵਿੱਚ ਨਾਜ਼ੀਆਂ ਨੂੰ ਹਰਾਉਣ ਦੀ ਸਾਲਗਿਰ੍ਹਾ ਦੇ ਅਵਸਰ ਨਾਲ ਵੀ ਮੇਲ ਖਾਵੇਗਾ।
ਤਸਵੀਰ ਸਰੋਤ, EPA
ਪਰੇਡ ਵਿੱਚ ਕੀ ਕੁਝ ਹੋਵੇਗਾ
ਓਲਗਾ ਇਰੀਸੋਵਾ ਰਿਡਲ ਰਸ਼ੀਆ ਨਾਮ ਦੇ ਵਿਸ਼ਲੇਸ਼ਣ ਸਮੂਹ ਦੇ ਸਹਿ-ਸੰਸਥਾਪਕ ਹਨ, ਮੁਤਾਬਕ, ''ਰੂਸ ਦੇ ਸ਼ਹਿਰ ਅਤੇ ਖੇਤਰੀ ਰਾਜਧਾਨੀਆਂ ਵਿੱਚ ਵਿਕਟਰੀ ਡੇ ਦੇ ਨਿਸ਼ਾਨ ਲਗਾਏ ਦੇਖੇ ਜਾ ਸਕਦੇ ਹਨ। ਆਮ ਤੌਰ 'ਤੇ ਇਨ੍ਹਾਂ ਉੱਪਰ 1945 ਲਿਖਿਆ ਹੁੰਦਾ ਹੈ ਪਰ ਇਸ ਵਾਰ ਇਨ੍ਹਾਂ ਉੱਪਰ 1945-2022 ਲਿਖਿਆ ਗਿਆ ਹੈ। ਇਸ ਤਰ੍ਹਾਂ ਉਹ ਲੋਕਾਂ ਨੂੰ ਇੱਕ ਅਭਾਸ ਦੇਣਾ ਚਾਹੁੰਦੇ ਹਨ ਕਿ ਇੱਕ ਵਾਰ ਫਿਰ ਉਹ ਨਾਜ਼ੀਆਂ ਦੇ ਖਿਲਾਫ਼ ਖੜ੍ਹੇ ਹਨ।''
ਹਾਲਾਂਕਿ ਮਾਰੀਓਪੋਲ ਵਿੱਚ ਸੁਰੱਖਿਆ ਕਾਰਨਾਂ ਕਰਕੇ ਵਿਕਟਰੀ ਡੇ ਪਰੇਡ ਨਹੀਂ ਹੋ ਸਕਦੀ। ਮਾਰੀਓਪੋਲ ਵਿੱਚ ਪੁਤਿਨ ਦੇ ਪ੍ਰੌਕਸੀ ਡੈਨਿਸ ਪੁਸ਼ਲਿਨ ਨੇ ਕਿਹਾ ਹੈ ਕਿ ਮਾਰੀਓਪੋਲ ਵਿੱਚ ਵਿਕਟਰੀ ਡੇ ਉਦੋਂ ਹੀ ਸੰਭਵ ਹੈ ਜਦੋਂ ਮਾਰੀਓਪੋਲ ਪੂਰੀ ਤਰ੍ਹਾਂ ਉਨ੍ਹਾਂ ਦੇ ਦੋਨੇਤਸਕ ਪੀਪਲਜ਼ ਰਿਪਬਲਿਕ ਦਾ ਹਿੱਸਾ ਨਹੀਂ ਬਣ ਜਾਂਦਾ।
ਵਿਕਟਰੀ ਡੇ ਰੈਡ ਸਕੁਏਰ ਉੱਪਰ ਸਜਧੱਜ ਦਾ ਵੀ ਮੌਕਾ ਹੁੰਦਾ ਹੈ। ਇਹ ਉਹ ਦਿਨ ਹੁੰਦਾ ਹੈ ਜਦੋਂ ਰੂਸ ਪੂਰੀ ਸ਼ਾਨ ਨਾਲ ਆਪਣੇ ਅਸਲ੍ਹੇਖਾਨੇ ਦੇ ਸਭ ਤੋਂ ਆਧੁਨਿਕ ਹਥਿਆਰਾਂ ਦਾ ਵਿਖਾਵਾ ਕਰਦਾ ਹੈ।
ਸਾਲ 2015 ਦੀ ਵਿਕਟਰੀ ਪਰੇਡ ਵਿੱਚ ਟੀ-14 ਟੈਂਕ ਨੇ ਸਭ ਦਾ ਧਿਆਨ ਖਿੱਚਿਆ ਸੀ ਪਰ ਯੂਕਰੇਨ ਜੰਗ ਵਿੱਚ ਇਸ ਨੂੰ ਸ਼ਾਮਲ ਨਹੀਂ ਕੀਤਾ ਗਿਆ। ਇਸ ਤੋਂ ਵੀ ਕਈ ਲੋਕ ਹੈਰਾਨ ਸਨ। ਯੂਕਰੇਨ ਦਾ ਦਾਅਵਾ ਹੈ ਕਿ ਉਸ ਨੇ ਰੂਸ ਦੇ ਲਗਭਗ ਇੱਕ ਹਜ਼ਾਰ ਟੈਂਕ ਤਬਾਹ ਕਰ ਦਿੱਤੇ ਹਨ।
ਬੀਬੀਸੀ ਰੂਸੀ ਸੇਵਾ ਦੇ ਇੱਕ ਵਿਸ਼ਲੇਸ਼ਕ ਮੁਤਾਬਕ, ਇਸ ਸਾਲ ਪਿਛਲੇ ਸਾਲ ਦੇ ਮੁਕਾਬਲੇ ਪਰੇਡ ਵਿੱਚ ਥੋੜ੍ਹੇ ਫ਼ੌਜੀ ਅਤੇ ਥੋੜ੍ਹੇ ਹਥਿਆਰ ਸ਼ਾਮਲ ਕੀਤੇ ਜਾਣਗੇ। ਫਿਰ ਵੀ ਕਿਆਸ ਹਨ ਕਿ ਇਸ ਵਾਰ ਲਗਭਗ 10 ਹਜ਼ਾਰ ਫੌਜੀ ਅਤੇ 129 ਹਥਿਆਰ ਇਸ ਪਰੇਡ ਦਾ ਹਿੱਸਾ ਹੋ ਸਕਦੇ ਹਨ।
ਹਵਾਈ ਸ਼ੋਅ ਵੀ ਪਹਿਲਾਂ ਵਾਂਗ ਹੀ ਹੋਵੇਗਾ। ਇਸ ਵਿੱਚ 77 ਜਹਾਜ਼ ਅਤੇ ਹੈਲੀਕਾਪਟਰ ਸ਼ਾਮਲ ਹੋਣਗੇ ਅਤੇ ਹਵਾਈ ਫ਼ੌਜ ਰੈਡ ਸਕੁਏਰ ਦੇ ਉੱਪਰ Z ਦੇ ਅਕਾਰ ਦੀ ਸੰਰਚਨਾ ਵਿੱਚ ਉਡਾਣ ਭਰਨ ਦਾ ਅਭਿਆਸ ਕਰ ਰਹੇ ਹਨ।
ਇਹ ਉਹੀ ਚਿੰਨ੍ਹ ਹੈ ਜੋ ਯੂਕਰੇਨ ਉੱਪਰ ਹਮਲਾਵਰ ਹੋ ਕੇ ਗਈਆਂ ਰੂਸੀ ਫ਼ੌਜਾਂ ਦੀਆਂ ਗੱਡੀਆਂ ਅਤੇ ਮਿਲਟਰੀ ਉਪਕਰਣਾਂ ਉੱਪਰ ਬਣਾਇਆ ਗਿਆ ਹੈ।
ਤਸਵੀਰ ਸਰੋਤ, Reuters
ਵਿਦੇਸ਼ੀ ਮਹਿਮਾਨਾਂ ਦੀ ਗੈਰ-ਹਾਜ਼ਰੀ
ਹਾਲਾਂਕਿ ਇਸ ਸਾਲ ਦੇ ਪਰੇਡ ਵਿੱਚ ਕੋਈ ਵਿਦੇਸ਼ੀ ਮਹਿਮਾਨ ਸ਼ਾਮਲ ਨਹੀਂ ਹੋਣਗੇ। ਕਰੈਮਿਲਨ ਵੀ ਕਹਿ ਰਹੀ ਹੈ ਕਿ 77ਵੀਂ ਪਰੇਡ ਦੀ ਐਨੀ ਅਹਿਮੀਅਤ ਨਹੀਂ ਹੈ।
ਓਲਗਾ ਕਹਿੰਦੇ ਹਨ ਕਿ ਵਿਕਟਰੀ ਡੇਅ ਬਾਰੇ ਇਸ ਵਾਰ ਜੋ ਵੀ ਸੁਨੇਹੇ ਭੇਜੇ ਜਾ ਰਹੇ ਹਨ ਉਹ ਰੂਸੀ ਨਾਗਰਿਕਾਂ ਦੇ ਮੁਖਾਤਿਬ ਹਨ।
ਦੂਜੇ ਵਿਸ਼ਵ ਯੁੱਧ ਦੇ ਨਾਜ਼ੀ ਸੰਵਾਦ ਨੂੰ ਛੇੜ ਕੇ ਕਰੈਮਲਿਨ ਰੂਸੀ ਨਾਗਰਿਕਾਂ ਨੂੰ ਖਿੱਚਣ ਵਿੱਚ ਸਫ਼ਲ ਹੋ ਸਕਦਾ ਹੈ। ਬਹੁਤ ਸਾਰੇ ਰੂਸੀ ਨਾਗਰਿਕ ਹਨ ਜਿਨ੍ਹਾਂ ਦੇ ਪਰਿਵਾਰ ਜਾਂ ਰਿਸ਼ਤੇਦਾਰਾਂ ਵਿੱਚੋਂ ਕਿਸੇ ਨਾ ਕਿਸੇ ਦੀ ਮੌਤ ਉਸ ਜੰਗ ਦੌਰਾਨ ਹੋਈ ਹੈ।
ਜਦੋਂ ਰੂਸ ਵਿੱਚ ਨੌਂ ਮਈ ਨੂੰ ਜਸ਼ਨ ਮਨਾਏ ਜਾ ਰਹੇ ਹਨ ਤਾਂ ਇਸ ਦਾ ਗੁਆਂਢੀ ਮੁਲਕ ਯੂਕਰੇਨ ਲਗਭਗ ਪ੍ਰਸੰਗਹੀਣ ਹੋ ਚੁੱਕਿਆ ਹੈ। ਜਿੱਥੇ ਰੂਸ ਹਮਲਾਵਰ ਹੈ।
ਯੂਕਰੇਨ ਦਾ ਵੀ ਜੰਗ ਵਿੱਚ ਬਹੁਤ ਜ਼ਿਆਦਾ ਨੁਕਸਾਨ ਹੋਇਆ ਹੈ। ਤਾਜ਼ਾ ਓਪੀਨੀਅਨ ਪੋਲਜ਼ ਦੱਸਦੇ ਹਨ ਕਿ ਰੂਸ ਵਿੱਚ ਨੌਂ ਮਈ ਨੂੰ ਯਾਦਗਾਰੀ ਦਿਨ ਵਜੋਂ ਦੇਖਿਆ ਜਾਣਾ ਚਾਹੀਦਾ ਹੈ ਨਾ ਕਿ ਜਿੱਤ ਦੇ ਦਿਹਾੜੇ ਵਜੋਂ।
ਕਜ਼ਾਕਿਸਤਾਨ ਨੇ ਆਪਣੀ ਪਰੇਡ ਲਗਾਤਾਰ ਤੀਜੇ ਸਾਲ ਰੱਦ ਕਰ ਦਿੱਤੀ ਹੈ ਅਤੇ ਲਾਤੀਵੀਆ ਨੇ ਇਸ ਦਿਨ ਨੂੰ ਯਾਦਗਾਰੀ ਦਿਨ ਐਲਾਨਿਆ ਹੈ। ਇਹ ਫ਼ੈਸਲਾ ਰੂਸ ਦੇ ਯੂਕਰੇਨ ਉੱਪਰ ਹਮਲੇ ਦੇ ਪੀੜਤਾਂ ਨਾਲ ਹਮਦਰਦੀ ਵਜੋਂ ਲਿਆ ਗਿਆ ਹੈ।
ਇਹ ਵੀ ਪੜ੍ਹੋ:
ਇਸ ਲੇਖ ਵਿੱਚ Google YouTube ਤੋਂ ਮਿਲੀ ਸਮੱਗਰੀ ਸ਼ਾਮਲ ਹੈ। ਕੁਝ ਵੀ ਡਾਊਨਲੋਡ ਹੋਣ ਤੋਂ ਪਹਿਲਾਂ ਅਸੀਂ ਤੁਹਾਡੀ ਇਜਾਜ਼ਤ ਮੰਗਦੇ ਹਾਂ ਕਿਉਂਕਿ ਇਸ ਵਿੱਚ ਕੁਕੀਜ਼ ਅਤੇ ਦੂਜੀਆਂ ਤਕਨੀਕਾਂ ਦਾ ਇਸਤੇਮਾਲ ਕੀਤਾ ਹੋ ਸਕਦਾ ਹੈ। ਤੁਸੀਂ ਸਵੀਕਾਰ ਕਰਨ ਤੋਂ ਪਹਿਲਾਂ Google YouTube ਕੁਕੀ ਪਾਲਿਸੀ ਤੇ ਨੂੰ ਪੜ੍ਹਨਾ ਚਾਹੋਗੇ। ਇਸ ਸਮੱਗਰੀ ਨੂੰ ਦੇਖਣ ਲਈ ਇਜਾਜ਼ਤ ਦੇਵੋ ਤੇ ਜਾਰੀ ਰੱਖੋ ਨੂੰ ਚੁਣੋ।
End of YouTube post
