Chelsea vs Leicester City highlights, Iheanacho and Ndidi celebrate as the Foxes win FA Cup, beat di blues to lift trophy
Wia dis foto come from, Getty Images
Nigeria Super Eagles players Kelechi Iheanacho and Wilfred Ndidi don join di league of Nigerians wey don carry di FA Cup afta dia club Leicester City beat Chelsea to lift di trophy on Saturday, 15 May, 2021.
Youri Tielemans produce one of di great FA Cup final goals to give Leicester City di trophy for di first time in dia history with victory over Chelsea for Wembley.
Di Belgian score di ogbonge goal for di 63rd minute.
Dis one make manager Brendan Rodgers go down in touchline as e celebrate.
Goal from Ben Chiwell bin wan later change di game but VAR rule say na offside.
Wia dis foto come from, Getty Images
Leicester carry di cup for dia fifth appearance inside FA Cup final and dia first since 1969. Before today, The Foxes bin don lose all dia previous finals, di most appearance wey one side don make for di competition history without ever winning di trophy.
Chelsea bin dey aim for FA Cup and Champions League double but e no happen.
Na around 20,000 fans enta Wembley for di game.
End of Di one wey oda users dey read well well
Dis na di biggest crowd since lockdown.
No be small celebration for di team and fans as The Foxes make history for Wembley.
Nigerians Ndidi and Iheanacho wey no fit hold dia joy also pose with di Nigerian flag as dem dey jubilate.
Wia dis foto come from, Getty Images
Dis season of FA Cup bin start on 31 August wen Woodford Town beat ninth-tier rivals London Colney 3-1 for di extra preliminary round.
A total of 736 teams na im enta di competition with National League North Chorley, di last non-league club to be knocked out. Di Magpies reach di fourth round before dem lose to Premier League Wolves.
Championship club Bournemouth na di last team outside di Premier League to be eliminated, di Cherries bin reach di quarter-finals before dem lose to Southampton.
Meanwhile Brendan Rodgers side dey on course to finish in di top four for di first time since winning di Premier League for 2015-16.
Chelsea on dia part be eight-time FA Cup winners and dey enjoy impressive run of form under Tuchel, wey be di first German manager to lead im side out for an FA Cup final.
