Full list of U.S goods wey Canada impose 25% tariff ontop

Canada don reply in kind to US tariff, as dem announce 25% tariffs on 142 goods from America, inside move wey mark di beginning of trade war between di US and Canada.

Di Canadian goment say di tariff wey go affect $30 billion goods dem dey import from di US, go become effective from 4 February, 2025.

For one statement di goment release, e say dis decision dey come as countermeasure in response to di ongoing trade disputes between di two kontris, and e go remain until di US cancel di tariff on Canada products.

"These countermeasures go stay in place until di United States eliminate dia tariffs on Canada but do e no apply to US goods wey already dey dia way to Canada on di day dem go into effect."

Dis "do me, I do you" method dey come afta America President Donald Trump compulsory 25% levy on Canadian and Mexican imports to US - and additional 10% on China – sake of im worry on illegal immigration and drug trafficking.

Affected U.S. Products In Canada By 25% Tariff

Dis na di full list of products wey di 25% tariff go affect. and e go range from beer and wine, fruits, beverages to household appliances and sporting goods.

Di target items wey include American beer, wine, bourbon, fruits and fruit juices, vegetables, perfumes, clothing and shoes, plus household appliances, sporting goods and furniture.

Lumber and plastics go also face levies, dem also dey consider non-tariff measures wey relate to critical minerals and procurement.

Canada goment say di tariffs go specifically target goods wey dem dey produce and import from di United States under di Determination of Country of Origin for di Purposes of Marking Goods (CUSMA Countries) Regulations.

Economic and Consumer Impact

Dis move dey expected to increase di cost of many consumer goods for Canada, and e go lead to higher prices or shifts in consumer behaviour towards domestic or alternative import sources, di statement tok.

E add say, retailers and manufacturers dey ginger for di impacts on supply chains and dem fit adjust pricing or sourcing strategies accordingly.

For U.S. exporters, these tariffs represent significant barrier, wey go affect sales volumes and make dem begin dey torchlight market strategies.

Dis fit lead to negotiations for resolution or e fit lead to further retaliatory measures from di U.S., wey go escalate di trade conflict.

Dis coming weeks go hard for di two kontris as dem go try navigate dis new chapter for dia economic relationship.

Stakeholders from both kontris dey watch for any signs of diplomatic or trade policy shifts wey fit either de-escalate or further complicate di situation.

Tins wey fit dey more expensive for Americans afta Trump tariffs

Trump say im wan protect American industry, but many economists don warn say di taxes fit lead to prices rising for consumers for America.

Dis na becos domestic company wey dey import di foods dey pay tariffs. Dem fit choose to pass di cost on to customers directly, or to reduce imports wey go mean say na fewer products go dey available.

So wetin fit get more expensive?

Cars

Di prices of cars dey likely to go up in price - by about $3,000 according to TD Economics.

Dat na becos parts cross di US, Canadian and Mexican borders multiple times before dem assemble di vehicle.

Sake of di high taxes dem go pay on importing motor parts, dem go likely pass di cost to customers.

"Increase in tariffs go come wit significant costs," Andrew Foran, one economist at TD Economics tok.

Houses

Imports of Canadian lumber go go up. Trump tok say US get "more lumber dan dem go ever use".

However, di National Association of Home Builders don ask di president to remove building materials from di proposed tariffs "sake of dia harmful effect on housing affordability".

Di industry body get "serious concerns" say di tariffs on lumber fit increase di cost of building homes.

"Consumers go end up paying for di tariffs in di form of higher home prices," di NAHB tok.

Maple syrup

Wen e come to di trade war wit Canada, di "most obvious" household impact na on di price of Canadian maple syrup, according to Thomas Sampson, associate professor of economics for di London School of Economics.

Canada billion-dollar maple syrup industry account for 75% of di world entire maple syrup production.

Dem dey produce majority of di sweet staple - around 90% - for di province of Quebec, wia dem set up di world sole strategic reserve of maple syrup 24 years ago.

"Maple syrup go go up to become more expensive. And dat na direct price increase wey households go face," Oga Sampson tok.

Fuel prices

Canada na America largest foreign supplier of crude oil. According to di most recent official trade figures, 61% of oil America import between January and November last year come from Canada.

While US goment don sama 25% on Canadian goods dem dey import to di kontri, dia energy dey face a lower 10% tariff.

Now di US no get shortage of oil, but di type dia refineries dey designed to process mean say dem go depend on so-called "heavier" - i.e. thicker - crude oil from mostly Canada and some from Mexico.

"Many refineries need heavier crude oil to maximize flexibility of gasoline, diesel and jet fuel production," according to di American Fuel and Petrochemical Manufacturers.