Three Nigerians make list as Caf release 2026 Afcon best eleven

Confederation of African Football (Caf) don release list of players wey perform best for di 2026 African Cup of Nations (Afcon) for Morocco and enta di best eleven list.

Champions Senegal get four players for di list, runners up Morocco get four players, while Nigeria wey carry third get three players for di list.

Dis na di list of players and dia contributions for di tournament.

Sadio Mane - Di Senegalese top striker bin win player of di tournament for Afcon 2021 and 2025.

E bin score two goals and do 4 assists for Morocco 2025.

Mane lead im team to win di 2025 tournament for Morocco and also lead di team win for di 2021 edition for Cameroon.

Mane don score total of 52 goals for di Senegal national team and do about 28 assists.

E bin don play for teams like Liverpool, Bayern Munich and Southampton bifor e join Saudi Arabian team Al-Nassr wia dey play now.

Brahim Diaz - Di Morocco and Real Madrid striker win highest goal scorer for Afcon 2025.

Di former Manchester City player score 5 goals ahead of odas for di tournament.

E follow team Morocco win second place for di 2025 edition of di tournament.

Afcon 2025 na di 26 years old first eva Afcon tournament.

E win man of dia matches against Comoros and Tanzania.

Im be di first Morocco player to score for all three group stage matches since 1976 and first Morocco player to score for four consecutive Afcon matches.

Diaz miss penalty during di last minutes of di Afcon finals against Senegal. Im team later lose dat match and di trophy to Senegal by 1-0.

Victor Osimhen - Di Nigeria top striker score four goals for di tournament and captain di team for two of dia matches including dia last game wey be di third place match.

Di Galatasaray striker also add two assists for im achievements for di tournament. E win man of di match for dia match against Algeria.

Osimhen don play for two Afcon tournaments in all, 2023 and 2025.

Di Galatasaray mask man bin play for Napoli for Italy bifor e join im current club two years ago.

Yassine Bono - Na di number one goalkeeper of di Morocco national team wey carry second for Afcon 2025 wey im kontri host.

E win best goalkeeper for di tournament. E play five matches for di tournament witout conceding one goal.

E don play for four Afcon tournaments 2019, 2021, 2023 and 2025. E don play for two world cups 2018 and 2025.

Bono bin don play for Girona and Sevilla bifor e join Saudi Arabia side Al Hilal.

Ademola Lookman - Di Atalanta striker give seven goals contribution for Afcon 2025.

E score three goals and do 4 assists for di Super Eagles for di tournament.

Di former African Footballer of di year win man of di match for dia game against Mozambique.

E also collect di man of di tournament award from Sofascore online platform.

Lookman bin don play for Leicester, Fulham and Everton bifor e move to Italy to join Atalanta.

Kelvin Bassy - Di Fulham FC defender na di third Nigeria for di best eleven list.

E perform creditably for dia semi-final and third place matches for im defensive position.

Officially e no win any man of di match award for Afcon 2025 but plenti online fans and im kontri pipo dey award am man of di match online.

Bassey don play for two Afcon tournaments 2023 and 2025.

Pape Gueye - Di Senegalese score di winning goal for di 2025 Afcon tournament for Morocco. E score di goal for extra time afta both teams bin don play draw during full time.

E score two goals for di 2025 Afcon tournament.

E don play for three Afcon tournaments - 2021, 2023 and 2025.

Di midfielder don win Afcon trophy two times - 2021 and 2025.

Gueye bin don play for Marseille, Sevilla and Watford bifor e join Villarreal wia e dey play now.

Noussair Mazraoui - Di 28 years old defender follow Morocco win silver for di 2025 Afcon tournament.

E no score for di tournament but im performance for di Morocco defense line earn am place for di Africa best eleven.

Mazraoui don play two Afcon tournaments - 2023 and 2025.

E follow Morocco play for di 2022 World Cup for Qatar. E help di team become di first African team to reach World Cup semi-final dat year.

Di defender bin don play for Ajax and Bayern Munich bifor e join Manchester United wia e dey play now.

Idrissa Gueye - Idrissa na Senegal defender wey help dem win Afcon 2025 tournament.

E bin follow di team play for Afcon 2023.

Gueye don get ova 100 caps for Senegalese team.

Na im captain di team for di finals of Afcon 2025 wey dem win on Sunday.

Gueye dey play for Everton FC for England. E bin don play for Aston Villa and Paris Saint-Germain.

Achraf Hakimi - Hakimi na di reigning African Footballer of di Year.

E captain Di Morocco team for all dia matches for Afcon 2025 wey im kontri host.

Although e no score for di tournament, e help im team to win di silver medal.

Hakimi na top defender for Paris Saint-Germain wia e follow di team win di 2025 Champions League.

E follow PSG win Uefa Super Cup 2025 and carry second for Fifa Club World Cup 2025.

E bin don play for Inter Milan and Borussia Dortmund bifor e join PSG.

Niakhate Moussa - Na Senegalese defender wey follow di team win Afcon 2025.

E bin play for France youth team bifor e switch nationality to join Senegal.

Moussa don play two Afcon tournaments - 2023 and 2025.

Di defender bin dey play for Mainz 05 and Nottingham Forest bifor e join Lyon wia e dey play now.