Man wey spray and abuse naira for im wedding chop prison sentence

One Federal High Court for Kano, northwest Nigeria, don sentence one makeup artist to six months in prison sake of naira abuse.

Justice S.M Shuaibu jail Abdullahi Musa Huseini afta im plead guilty to one-count charge bordering on abuse and mutilation of di naira.

For one statement on Monday 7 April by di Economic and Financial Crimes Commission (EFCC), court find Huseini guilty say im mutilate naira wey im spray during im wedding.

Di charge read: "Dat you, Abdullahi Musa Huseini, on di 6th day of December, 2024, at Ali Jita Event Centre, Kano, within di jurisdiction of di Honourable Court whilst dancing during a social event tamper wit di sum N100,000.00 (One Hundred Thousand Naira) in 1000 notes denomination wey di Central Bank of Nigeria issue by spraying in di said occasion and you thereby commit offence contrary to and punishable under Section 21(1) of di Central Bank Act, 2007"

"Di convict bin chop arrest afta credible intelligence on im involvement in di deliberate mutilation of di Nigerian currency as e spray am for im own wedding celebration.

"Investigations reveal say Huseini wilfully deface and abuse di naira notes in defiance of warning and campaigns against di practice by di EFCC," di anti-graft agency tok on X.

Wen dem arraign am, Huseini bin plead guilty to di charge, and dis prompt di prosecution counsel, Zarami Mohammed, to present di facts of di case and tender evidence bifor di court.

Delivering judgment, Justice Shuaibu find am guilty as charged and sentence am to six months imprisonment witout option of fine.

Dis no be di first time wey pesin go chop prison sentence sake of naira abuse.

For 2024, court bin sentence ogbonge Nigeria celebrity Idris Olanrewaju Okuneye wey pipo sabi as Bobrisky to prison.

Na Justice Abimbola Awogboro deliver di six-month sentence to 'Bobrisky'.

Di court pass di sentence wit no option of fine. Di Crossdresser bin serve im prison sentence for Ikoyi correctional centre.