JAMB - Wetin to know about 2025 UTME rescheduled examination

Di Joint Admission and Matriculation Board JAMB say from 16 May 2025, dem go allow some 2025 UTME candidates to rewrite di exam after investigation show say error dey di exam wey lead to a mass failure.

For statement on Wednesday JAMB say true-true some kain tins dey wey affect di performance of students during di 2025 Unified Tertiary Matriculation Examination (UTME).

JAMB oga Prof Ishaq Oloyede apologise to di affected students and Nigerians in front of media pipo say im go take responsibility for di errors wey happen and promise say dem dey do everything to correct am.

"Wetin suppose be moment of joy don change due to one or two errors," Oloyede tok.

Di Registrar announce say about 379,997 candidates for di just concluded Jamb go retake di UTME exam.

Dis follow many complaint of technical glitches, low scores, and alleged inconsistency for di question and answer during di exam.

E add say na di function of di exam bodi to admit error sake of say dem sabi say in spite of dia efforts dem no dey perfect.

Which states dey affected

JAMB say dem discover glitches for dia system wey affect 157 exam centres inside dia Lagos and Owerri exam zones.

Under Lagos zone, 65 exam centres dey affected inside Lagos and Oyo states only. For Owerri zone, 92 exam centres dey affected across Imo, Abia, Anambra and Ebonyi.

When be di new exam date and wetin you go need

Prof Oloyede say from Friday 16 May 2025, di affected candidates go begin rewrite di exams. E add say most of di exam go fall into Saturday and candidates go need to reprint dia exam slips.

According to am, di affected candidates go receive text messages to dia registered phone numbers and emails to show dem dia exam date and wia dem go write am.

"Some go receive phone calls. Dem go need to reprint dia exam slips to use go write di exam" na so di prof tok.

E explain say e dey possible say di exam fit clash wit di ongoing WAEC exam, but dem don do tok tok wit WAEC organizers to reduce such incidents from occurring.

Jamb on Monday bin announce say dem go review di 2025 Unified Tertiary Matriculation Examination (UTME) results wey dem release recently.

Di exam bodi for statement wey dia tok-tok pesin, Fabian Benjamin sign say di board dey fast forward dia annual system review.

Di review na comprehensive post-mortem of di examination process, Fabian tok.

Dis na sake of di high number of complaints wey follow di release of dis 2025 UTME results last Friday.

"If e dey determined say indeed glitches dey, we go implement appropriate remedial measures promptly, as we dey do in case of di examinations demsefs," e add.

Di statement add say di board dey particularly worry about di unusual complaints wey dey come out from some states within di Federation.

Nigerians including some candidates bin enta social media to complain about di low scores wey dey recorded by some candidates wey don score high for dia previous Jamb.

Wit di use of #thisisnotmyresult, social media bin full of how dem express worry and call for review of di results.

Jamb wen dem release di results bin tok say about 1.5 million candidates perform below 200, dis figures na one of di lowest in recent times.

Wetin dis mean be say dis year, na about 80 per cent of candidates wey bin siddon write dis 2025 UTME score less dan 200 points out of 400 points wey be di maximum wey a candidate fit get

Each candidate bin take four subjects, wit each one carrying a grade of 100 points.

JAMB result for recent years

For 2022 UTME, Jamb announce say, 378,639 candidates score above 200, 520,596 score 190 and above, while 704,991 score 180 and above.

Also, 934,103 score 170 and above and 1,192,057 score 160 and above.

For 2024, a total of 1,904,189 candidates sit down for UTME. 1,989,668 register for di exam, wey be 24.7% higher dan di figure for 2023.

According to Jamb, out of di 1,842,464 results wey dem release, only 0.4 percent score above 300, while 24 percent score 50 percent (200/400) and above.

As dem see dis kain low scores since for 2019 UTME, Jamb and institutions come conclude say make dem reduce and approve national minimum cut-off mark of 160 for university admission for Nigeria.

Again for 2022/2023 admission session, Jamb come set di general cut-off mark for universities at 140 and above, as dem see say candidates underperform dat year again.

And for dis year data, Jamb show say out of 1.5 million candidates wey write di exam, over 50 percent score below 200 for this year exam.