US Supreme Court strike down Trump tariffs

Di top court for di United States don rule against US President Donald Trump global tariffs, wey bin go into effect last year.

For 2025, Trump bin place taxes on goods wey dey enta di US, as e say e go boost American manufacturing.

However, wit one 6-3 majority, di Supreme Court on Friday, 20 February rule say Trump don pass im authority wen e compulsory sweeping tariffs through one law wey dey reserved for national emergencies

Di ruling centre on Trump use of one 1977 law, di International Emergency Economic Powers Act (IEEPA), wey give di president power to "regulate" trade in response to one emergency.

Di high court rule say di International Emergency Economic Powers Act "no authorise di President to compulsory tariffs".

Instead of getting Congressional approval, di Trump administration bin use di 1977 IEEPA. Declaring emergency under di law mean say Trump fit issue immediate orders and bypass Congress.

US President Donald Trump don react to di Supreme Court decision to strike down im tariffs, e call am a "disgrace".

Trump bin first invoke di law for February 2025 to tax goods from China, Mexico and Canada. E say drug wey dem traffic from dose kontris constitute emergency.

E use am again for April, wia e order levies from 10% to 50% on goods from almost evri kontri for di world.

Trump tok say tariffs go increase di amount of tax wey di govment dey raise, e go encourage consumers to buy more American-made goods and boost investment for di US. But critics warn of higher prices and damage to di global economy.

E say im wan reduce di US trade deficit – di gap between di value of goods US dey buy from oda kontris and di ones dem dey sell to dem.

For August 2025, one US appeals court rule say most of Trump tariffs bin dey illegal, but leave dem in place.

Di president bin argue say di US dey exploited by "cheaters" and "pillaged" by foreigners.

Trump don also use taxes to make oda demands.

For example, wen e announce tariffs against China, Mexico and Canada, e tok say di kontris gatz do more to stop migrants and di illegal drug fentanyl wey dey enta di US.

Many tariffs don dey amended or delayed afta dia announcement.

Di Supreme Court bin get involved wen di White House request say make dem overturn di appeals court decision.

Reactions follows Supreme court ruling

Plenty reactions don dey follow di Supreme Court ruling. One of di most vocal anti-tariff organisations for US, We Pay the Tariffs, don launch one national sign-on letter wey dey call for "full, fast, and automatic" refunds.

"Today Supreme Court decision na ogbonge victory for America small businesses wey dey bear di crushing weight of dis tariffs," di group director, Dan Anthony tok.

Anthony add say di court decision dey "meaningless witout actual relief for di businesses wey dey pay dis tariffs".

"Di administration only responsible course of action now na to establish a fast, efficient and automatic refund process wey dey return tariff money to di businesses wey dey pay am," e tok.

We Pay the Tariffs – wey include more dan 800 businesses under dia umbrella – bin file one amicus brief wit di Supreme Court for di tariffs cases.

Meanwhile, trade lawyers dey caution say while di Supreme Court ruling open di door to tariff refunds, businesses still dey faced wit big questions about which form dat process fit take.

Steve Becker, head of law firm Pillsbury international trade practice, tell BBC say e go dey up to di Court of International Trade to sort out di implementation of di court ruling against Trump tariffs.