پرويز مشرف وايي د پنجشنبې په ورځ به پوځي جامه پريږدي

په دغه ورځ دى د دويمې دورې لپاره د ولسمشرۍ د څوکۍ لپاره لوړه کوي .

له ١٩٩٩ کال څخه راهيسته جنرال مشرف د لوى درستيز او ولسمشرۍ دواړه څوکۍ درلودې خو په دې وروستيو کې يې ژمنه کړې وه چې که بيا د ولسمشر په توگه وټاکل شو نو پوځي جامه او څوکۍ به پريږدي .

د جنرال مشرف له غاړې تر دې اعلان لږ وړاندې پاکستان ته بيا ستانۀ شوي پخواني لومړي وزير نواز شريف وويل دى به د پرويز مشرف په شته والي کې د حکومت مشري ونه مني .

نواز شريف چې په روانه اوونۍ کې له سعودي عربستان څخه بيا پاکستان ته ستون شو د جنوري د مياشتې په ټول ټاکنو کې د برخې اخيستلو لپاره غوښتنليک سپارلى دى .

خو ښاغلي شريف او د پاکستان يوې بلې پخوانۍ لومړۍ وزيرې بېنظير بوټو دواړو ويلي دي چې که جنرال مشرف د جنوري د مياشتې د سمو ټول ټاکنو ژمنه پر ځاى نه کړه نو دوى په وروستيو شېبو کې هم له انتخاباتو بايکاټ يا شلون کولى شي .