هندي ډلې د ټرمپ د کامیابۍ لپاره دعا وکړه

ښايي د ډونالډ ټرمپ لپاره به دا ستونزمنه وي چې د جمهوریپال ګوند مشرانو ملاتړ د ولسمشرۍ کمپاین لپاره ترلاسه کړي، خو ځینې داسې تلوسه لرونکي ملاتړي لري چې هڅه کوي د دوی خدایان يې ترڅنک ودرېږي.

د یوې ښۍ اړخې هندي ډلې لسګونو غړو د دیني مراسمو په ترڅ کې د چارشنبې په ورځ اور بل کړ چې ورسره يې سندرې زمزمه کولې. له خپلو خدایانو يې غوښتنه کوله چې ټرمپ د امریکا د متحد ایالاتو ولسمشرۍ لپاره بریالی شي.

په داسې وخت کې چې ټرمپ د جمهوريپال ګوند په هغو سیالیو کې برلاسی دی چې د نومبر په ټاکنو کې به د ګوند له لوري برخه واخلي، د نوموړي هغه غوښتنه چې امریکا ته د مسلمانانو پر ورتللو بندیز، او په بهر کې د ترهګرو ډلو تعقیبول غواړي، په هند کې ځینې ملاتړي پیدا کړي دي.

د هند سینا ملي ډلې بنسټګر ویشنو ګوپتا وايي: "ټوله نړۍ له اسلامي ترهګرۍ سخت شکایت کوي، ان تر دې چې هند هم ورڅخه په امان کې نه دی، او د نړۍ یوازینی ژوغورنکی ډونالنډ ټرمپ دی".

ددغې ډلې غړي چې د نوي ډيلي په یوه پارک کې راغونډ، او په شړیو ناست وو، ترڅنګ يې هغه مجسمې هم اېښې وې چې د دوی خدایان بلل کیږي او په منځ کې يې شفا، هانومان او د ټرامپ موسکا لرونکي انځورونه ول.

او له سرونو پورته يې یوه داسې لوحه ځړولې وه، چې له ټرمپ يې د خپل ملاتړ ترڅنګ ویل "هغه د بشریت یوازینۍ هیله ده چې له اسلامي ترهګرۍ یې وژغوري."

دغو راټولو شویو په سنکریټي ژبه دعاګانې کولې او له خپلو خدایانو يې غوښتنه کوله چې ټرمپ ته په ټاکنو کې بریالیتوب ورپه برخه کړي، او د مناسکو د سرته رسولو لپاره يې اور ته دانې، واښه، او کوچ د نذارانې په توګه ورغورځول.