مدیترانې سمندر کې د بیړۍ د ډوبیدو له کبله ۲۵ کډوال وژل شوي
د عکس سرچینه، b
د مدیترانې سمندر کې د ناقانونه کډوالو بیړۍ ډوبه شوې چې له کبله یې ۲۵ کسان وژل شوي دي.
د ژغورنې عملیات روان دي او ویل کېږي چې د لیبیا له ساحله په روانه شوې دغې بیړۍ کې ۶۰۰ کسان سپاره وو.
چارواکي وايي، چې سمندر کې د سلګونو کسانو د ډوبېدو ویره شته، خو د ملګروملتونو د کډوالو چارو ادارې د ۴۰۰ کسان د ژغورلو پخلی کړی.
د ایټالیا سمندري ځواکونه وايي، چې تر دې دمه یې د ۲۵ کسانو مړي له اوبو را ایستلي خو د نادرکه شویو کسانو کره شمېره نه ده معلومه.
تر دې دمه په ۲۰۱۵ کال کې په ناقانونه ډول اروپا ته اوښتونکو کسانو څخه شاوخوا۲۰۰۰ کسان وژل شوي دي.
د چهارشنبې په ورځ (اګست ۵) د لیبیا له ساحل څخه ۲۵ کیلیومتره لرې د کب نیولو لپاره کارېدونکې دا بیړۍ د سمندر له څپو سره مخامخ شوه او ډوبه شوه.
د دوی د ژغورنې لپاره درې نورې چورلکې او درې مرستندویې بیړۍ هم د پېښې ځای ته په رسېدو وې، ویل کیږي د بیړۍ په یوه خوا کې د کډوالو را ټولیدلو له امله بیړۍ په بل مخ اوښتېده .
د عکس سرچینه،
د ایټالیا سمندري ځواکونه وايي، چې د ژغورنې عملیات د شپې تر ناوخته دوام درلود او ژغورل شویو کسانو ورته ویلي، چې په بیړۍ کې له ۴۰۰ تر ۶۰۰ کسان سپاره وو.
د روان کال په اپریل میاشت کې د لیبیا له ساحل نه د روان شويو ناقانونه کډوالو بیړۍ د ډوبېدو له کبله ۸۰۰ کسان په سمندر کې ډوب شول.
چې ملګرو ملتونو په سمندر کې دا تر ټولو خونړۍ پېښه بللې وه.
