لیبیا کې ''اسلامي دولت'' د ۲۱ مصري مسیحیانو سرونه غوڅ کړي
د عکس سرچینه، AP
په لیبیا کې ''اسلامي دولت'' ته منسوبو جنګیالیو د ۲۱ مصري مسیحي قبطیانو د سرونو غوڅولو وېډیو خپره کړې ده. دغه مسیحیان لیبیا کې د ''اسلامي دولت'' اړوندو جنګیالیو له لوري تښتول شوي وو.
مصر ۷ ورځي ملي ویر اعلان کړی او ازهر دا وژنه یو 'وحشي عمل' بللی.
د داعش له لوري په خپره شوې وېډیو کې مصري مسیحیان په نارنجي کالیو کې سمندرغاړې ته څېرمه زنګون کړل شوي او جنګیالي یې هم مهاله سرونه غوڅوي.
د وېډیو تر خپرېد لږ وروسته، د مصري ولسمشر عبدالفتاح السیسي په امر د مصر امنیت شورا بېړنۍ غونډه وکړه چې د داعش ددغه عمل پروړاندې مناسب ګام پورته کړي.
د السیسي په وینا، مصر د داعش د کړنو پروړاندې د هر ډول غبرګون ښودلو حق لري.
د مصر ولسمشر دا هم ویلي، تر دویم امر پورې لیبیا ته د مصري وګړو هر راز سفر ممنوع دی.
د عکس سرچینه، AFP
په لیبیا کې له نارامیو سربېره، زرګونه مصري کارکوونکي دغه ګاونډي هېواد ته د کاروبار موندلو لپاره ځي.
د عکس سرچینه، EPA
د ''اسلامي دولت'' اړوندو مشکوکو جنګیالیو تر اوسه په لیبیا کې د ځینو وسله والو بریدونو مسؤلیت منلی دی.
له ۲۰۱۱ کال راهیسې کله چې معمر القذافي د پراخو لاریونونو له کبله راوپرځېد، دغه هېواد بیا ښه ورځ ونه لیده او په هره برخه کې یې نارامي پیل شوه.
عمومي ویر
د مصري مسیحیانو دغه ډله د لیبیا سرت ښار په سمندرغاړه کې د تېرې دسمبر او جنورۍ میاشتو کې نیول شوي وو. سرت ښار د اسلامپالو په لاس کې دی.
په لیبیا کې اسلامپالې ډلې چې وړاندې یې له ''اسلامي دولت'' سره بیعت کړی و، د یکشنبې په ورځ ددغو مصري وګړو د سر غوڅولو وېډیو خپره کړې ده.
د عکس سرچینه، EPA
د عکس سرچینه، AP
داعش په وېډیو کې وژل شوي ''صلیبیان'' بللی او د هغوی د وژلو لامل یې هم د دوی دین په ډاګه کړی دی.
دغه ویډیو د ازهر د مشرانو له لوري یو ''وحشیانه عمل'' ګڼل شوی.
د مصر دولت د خپلو قبطي وګړو د وژل کېدو لپاره یوه اونۍ عمومي ویر اعلان کړی.
په مصر کې د قبطي مسیحیانو شمېر د مصر له ټول ټال ۸۷ میلیون وګړو څخه د ۹ او ۱۰ میلیونو ترمنځ اټکل شوی دی.
د عکس سرچینه، AFP
د عکس سرچینه، AP
"د صلیبیانو امت"
د (صلیبي امت لپاره په وینو لاسلیک شوی پیغام) په نامه په دې وېډیو کې په انګلیسي ژبه یو غږېدونکی کس وايي ''د قبطیانو د وژل کېدو دغه وینې د کامیلیا او د هغې د خویندو د غچ اخیستو لپاره دي.''
د عربي هېوادونو ټولنې په یوه اعلامیه کې ددغو مصري قبطیانو وژنه غندلې او د هغوی له خپلوانو سره یې غمشریکي ښودلې ده.
د بریتانیا د بهرنیو چارو وزیر فیلیپ هاموند هم ویلي ''دا ډول وحشیانه اعمال زموږ دا هوډ پیاوړی کوي چې له خپلو شریکانو سره په لیبیا او سیمه کې د ترهګرۍ د خطر خپرېدو مخه ډب کړو.''
د عکس سرچینه، BBC World Service
د عربي هېوادونو ټولنې مشر ویلي، دغه ټولنه به د بهرنیو چارو د وزیرانو د چارشنبې په ورځ جوړېدونکې غونډه کې ددې پېښې په رڼا کې د ترهګرۍ د مخنیوي په اړه بحث ولري.
