ج سودان ياغيانو حکومت په اوربند ماتولو تورن کړی
د عکس سرچینه، BBC World Service
په جنوبي سودان کې یاغي ځواکونو پر حکومت د هغه اوربند ماتولو تور لګولی چې جمعې په ورځ ټینګ شوی و.
د ايتوپيا په پلازمېنه اديسه بابا کې شوي دغه اوربند د اوونیو جګړه پای ته ورسوله.
د جمعې په ورځ د ولسمشر سلوا کيير او د هغه د پخواني مرستيال رېيک مشار مرکچيان په اوربند سلا شول.
د یاغیانو یوه ویاند تورن جنرال لول روای بي بي سي ته وویل د دوی پر ځواکونو د ملاکال په جنوب کې برید شوی دی.
ښاغلی روای وايي د دوی ځواکونو یوازې د ځان په دفاع کې جګړه کړې ده.
ده وویل حکومت د دښمنۍ له کبله اوربند ته لېواله نه دی.
د شنبې په ورځ حکومت ياغیان د اوربند په ماتولو تورن کړي وو.
راپورونه وايي په جنوبي سودان کې د وروستيو ناکراريو له امله شاوخوا ۱۰۰۰ کسه وژل شوي او زرګونه نور ټپيان دي.
د جنوبي سودان په بور کې ښار کې د جګړې له وېرې زرګونه کسانو خپل کورونه پرېښي او د ملګرو ملتو په پنډغالو کې يې پناه اخیستې ده.
د بور ستراتيژيک ښار چې په تيلو بډای دی دوه ځله د حکومتي ځواکونو او ياغيانو ترمنځ لاس په لاس شو.
