پاکستان: د القاعدې د بهرنیو بریدونو طراح مو نیولی
د پاکستان پوځ وايي پر دوشنبه یې د القاعدې شبکې د نړیوالو بریدونو یو مهم طراح نیولی دی.
پوځ زیاتوي، یونس الموریتاني پخپله د اسامه بن لادن له خوا د نړیوالو بریدونو د طراحۍ او عملي کولو لپاره ګمارل شوی و.
پاکستان وايي چې له الموریتاني سره د القاعدې شبکې دوه نور مشران عبدالغفار الشامي (بچرچاما) او مساره الشامي (مجاهد امینو) هم نیول شوي.
دوی وايي چې درېواړه کسه په کوټه ښار کې نیول شوي.
د پاکستاني پوځ اعلامیه کاږي، الموریتاني د اسامه لخوا شخصاً د متحده ایالتونو، اروپا او استرالیا د مهمو اقتصادي موخو په نښه کولو لپاره کمارل شوی و.
ویل کېږي چې هغه په نړیوالو اوبو کې د ګاز د نل لیکو، برېښناکوټونو، بندونو او بندرګاوو او تیلي ټانکرو په ګډون د امریکا اقتصادي بنسټونو په نښه کولو هوډ درلود.
پاکستان وايي چې ددغو کسانو په نیولو سره د القاعدې شبکې ته یو بل ګوزار ورکړل شو.
خبرپاڼه زیاتوي، چې دغه کسان یې د امریکا متحده ایالتونو له استخباراتي ډلې سره د ګډو عملیاتو په ترڅ کې نیولي.
