روسیې د اوکرایین پر بېلابېلو ښارونو نور درانه بریدونه کړي
د عکس سرچینه، Serhiy Lysak
روسي ځواکونو یو ځل بیا پر اوکرایین د توپخانې او توغندیو درانه بریدونه کړي دي.
دا تېرو درېو ورځو کې دا ډول دویم برید دی.
د رپوټونو له مخې په دغو بریدونو کې یوازې په خېرسون سیمه کې لږترلږه یو تن وژل شوی او ۳۴ نور ټپیان شوي دي.
په دوی کې درې ماشومان هم شامل دي چې په 'دنیپرو پېتروفڅک' کې ټپیان شوي.
د اوکرایین وسله وال ځواکونه وايي، د دوی هوايي دفاع سیستم د ۱۵ او ۱۸ ترمنځ توغندي شنډ کړي دي.
د دغو بریدونو یو ستر هدف دنیپرو ته څېرمه پاولوهراد ښار و.
دغلته د روسیې لخوا یوه ګومارل شوي چارواکي ویلي چې د اوکراییني ځواکونو عملیاتي سرچینې په نښه شوي.
ولادیمیر روګوف د خپل ټلېګرام پر پاڼه لیکلي چې توغندي د اورګاډي پر تاسیساتو او د تېلو په ډېپوګانو لګېدلي دي.
خو په دغو بریدونو کې ۱۹ استوګنیزو بلاکونو، ۲۵ شخصي کورونو، ۶ ښوونځیو او وړکتونونو او ۵ هټیو ته هم زیان اوښتی دی.
د اوکرایین پوځ له اوږدې مودې راهیسې د سترو ځوابي عملیاتو د پیل خبره کوي، خو دا لا مشخصه نه ده چې دغه عملیات به کله او له کوم ځای پیل شي.
پاولوهراد د جګړې د لومړۍ کرښې ۱۱۰ کیلومترۍ کې پروت او د اوکرایین تر کنټرول لاندې دی.
د اوکرایین د 'دنیپرو پېتروفڅک' پوځي ادارې دا یوه "غم لړلې شپه او سهار" بللی دی.
پلازمېنه کیېف کې هم د پوځي ادارې مشر سېرهي پوپکو ویلي، چې د دغه ښار فضا کې د روسیې توغندي په نښه او شنډ شوي دي.
په وروستیو میاشتو کې له لوېدیځه د لا ډېرو پوځي تجهیزات له ور رسېدو سره د اوکرایین هوايي دفاع سیستمونه پیاوړي شوي.
خېرسون کې هم چې لا یې یوه برخه د روسیې تر کنټرول لاندې ده، د اوکرایین ځايي چارواکو ویلي چې روسانو دغلته ۳۹ بریدونه کړي.
دوی زیاته کړې چې په دغو بریدونو کې ځمکنې وسلې، ډرون او جنګي الوتکې درېواړه کارول شوي.
روسیې د جمعې پر ورځ اعلان وکړ چې پوځ یې د اوکرایین ریزرف قطعې په نښه کوي.
له دې سره اوکراییني چارواکو نن دوشنبه ویلي چې ځواکونو یې باخموت ښار کې روسان له ځینو سیمو په شا تمبولې دي.
باخموت د اوکرایین ختیځ کې پروت او له څو میاشتو راهیسې د خونړیو جګړو شاهد دی.
د ځمکنیو ځواکونو قوماندان جنرال اولېکساندر سیرڅکي د ټلېګرام یوه پیغام کې ویلي، چې دغلته وضعیت "خورا کړکېچن" دی خو د نوموړي په وینا "دښمن د دغه ښار د کنټرول ترلاسه کولو توان نه لري."
هاخوا روسي چارواکي وایي چې اوکرایین یې د یکشنبې پر ورځ په یوه سرحدي کلي هوايي برید کړی او ۴ کسان یې وژلي دي.
