د ایران فوټبال لوبې پر مهال د حکومت پلويانو او مخالفو نندراچیانو تر منځ تاوتریخوالی شوی

د فوټبال نړیوال جام سیالیو لړ کې د ایران دویمې لوبې پر مهال د جمعې پر ورځ لوبغالي کې د حکومت پلوه نندارچیانو او احتجاجیانو تر منځ ناندرۍ او لفظي شخړې رامنځته شوې.

ځینې احتجاجي نندارچیانو ویل، له دوی بیرغونه اخیستل شوي او ځینو نورو بیا ادعا کوله چې نارې پرې شوې دي. د قطر لوبغالي مسوولینو هم ځینې داسې کمیسونه او نور توکي ضبط کړي چې د حکومت ضد شعارونه پرې لیکل شوي وو.

په ایران کې له تیر سپتمبر راهیسې چې ۲۲ کلنه مهسا امیني د تهران پولیسو په توقیف کې مړه شوه، د احتجاجونو لړۍ روانه ده. اغلې امنیتي د اخلاقي فساد ضد پولیسو په پلازمېنه تهران کې د ټیکري سم نه پرسرولو په تور نیولې وه، چې درې ورځې ورسته مړه شوه.

له هغې پېښې راهیسې د ایران په لر او بر کې احتجاجونه روان دي او ایراني حکومت سخت غبرګون څرګند کړی. د جمعې پر ورځ په داسې حال کې چې په احمد بن علي لوبغالي کې د ایران او ویلز تر منځ فوټبال لوبه روانه وه، ځینو نندارچیانو له اسلامي انقلابه د مخکې مهال ایرانی بېرغ لېږداوه، چې حکومت پلوه نندارچیانو ترې په زور واخیستل.

رپوټونو کې ویل شوي، ځینې هغه نندارچیان کنځل شوي هم دي، چې د (ښځه، ژوند، ازادي) شعار یې پر کمیسونو لیکلی و. دا هغه شعار دی، چې د ایراني حکومت ضد احتجاجیانو په لاریونونو کې معمول دی.

د لوبې لیدو ته یوې راغلې ښځې ادعا کوله چې حکومت پلوه نندارچیانو قطري پولیسو ته شکایت کړی او هغوی دې ته امر کړی، چې د ایران په مظاهرو کې د وژل شویو کسانو نومونه له مټو پاک کړي. یوې بلې ښځې بیا شکایت کاوه، چې په داسې کمېس کې لوبغالي ته د ننوتو اجازه نه ورکول کېده، چې د مهسا امیني انځور پرې چاپ شوی و.

د یادونې ده چې روانه اونۍ په ملګرو ملتونو کې د بشري حقونو شورا د یوه داسې پلاوي ګومارلو لپاره رایې ورکړه چې په ایران کې د حکومت ضد مظاهرو ځپلو په تړاو پلټنې وکړي. ملګرو ملتونه وايي، په دې مظاهرو کې تېرو نهو اونیو کې ۳۰۰ کسان وژل شوي او نژدې ۱۴۰۰۰ نیول شوي دي. ایران بیا دا یو متکبرانه سیاسي چل ول بولي او ردوي یې.