تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د هوا حالاتو ناسمه وړاندوینه؛ هنګري د هوا پېژندنې ادارې مشران ګوښه کړل
هنګري کې حکومت له دې کبله د هوا پېژندې خدماتو ادارې دوه مخکښ مختصصان له دندو ګوښه کړي، چې د هوا ناسم اټکل او وړاندوینه یې کړې وه.
د دوی دې ناسمې وړاندوینې نیوکې او ناندرۍ راپورته کړې.
ستونزه له دې پیل شوه چې د شنبې پر ورځ هنګري کې د 'سنټ سټېفن ورځې' د لمانځلو پلان شوي مراسم او اور لوبه د خرابې هوا د اټکل له کبله وځنډول شول.
دا ورځ د اروپا په کچه د اورلوبو تر ټولو ستره ننداره وي، خو سږ کال یې تر پیلېدو اووه ساعته مخکې د حکومت لخوا د خرابې هوا د خبرداري له کبله د ځنډېدو اعلان وشو.
وروسته مالومه شوه چې هوا نورماله او ارامه وه.
سږ کال د سنټ سټېفن ورځې د لمانځلو لپاره د هنګري د پلازمېنې بوداپېست له منځه د تېر شوي دانوبې سیند د څنډو په اوږدو کې له ۲۴۰ ځایونو د ۴۰ زره مهتابیو یا فېشنګونو د الوځولو تابیا نیول شوې وه.
هر کال شاوخوا دوه میلیون کسان د دې اور لوبې ننداره کوي.
حکومت وویل دا مراسمو یې د خرابې هوا د خبرداري له کبله یوه اوونۍ ځنډولي.
خو د خرابې هوا دې څپې لوری چورلټ بدل کړ او د پلازمینې پر ځای یې د هنګري ختیځ کې ځينې سیمې وځپلې.
د هنګري د هواپېژندنې خدماتو ادارې که څه هم د یکشنبې پر ورځ پر خپله فېسبوک پاڼه له خلکو عمومي بښنه وغوښته او دا یې د هوا د اټکل د ستونزو برخه وبلله، خو خبره له خبرې تېره وه.
دا ناسمه وړاندوینه د دې لامل شوه چې حکومت د دې ادارې مشر او د هغه مرستیال له دندو ګوښه کړي.
هنګري کې د دغو مراسمو او اور لوبو په تړاو لیدلوري وېشلي دي.
نږدې ۱۰۰ زره کسان یو غوښتنلیک لاسلیک کړې وه چې ګاونډي اوکرایین کې جګړې او په کور دننه اقتصادي ستونزو ته په کتو دې اور لوبه نه کېږي.
خو ګڼ نور بیا د تېر په څېر ورته سترګې په لار او هیله من دي چې د راتلونکې شنبې پر ورځ به یې له مخکیني پلان سره سم ولمانځي.
