تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د سعودي د تېلو 'ارامکو' شرکت د ریکارډ کچې ګټه کړې
د سعودي عربستان د تېلو ارامکو شرکت د ۲۰۲۲ کال دویمه ربع کې د ریکارډ کچې ۴۸ اعشاره ۴ میلیارد ډالر ګټلي دي. دا د تېر کال د همدې مودې پرتله د دغه شرکت ګټه کې ۹۰ سلنه لوړوالی ښيي.
ارامکو د ۲۰۲۲ کال لومړیو دریو میاشتو کې د ۳۹ اعشاریه ۸ میلیارد ډالرو ګټې ریکارډ جوړ کړی و چې اوس یې پخپله مات کړی دی.
د روسیې لخوا پر اوکرایین له برید سره نړۍ کې د تېلو او ګازو بیې پام وړ لوړې شوې.
روسیه د نړۍ په کچه د تېلو له سترو صادرونکو ده خو لوېدیځو هېوادونو ژمنه کړې چې د انرژۍ له اړخه به پر دغه هېواد تکیه کموي.
ارامکو د سعودي عربستان د تېلو دولتي شرکت دی او اوس یې ویلي چې د کال درېمې ربع لپاره به د خپلو ونډو په ۱۸ اعشاریه ۸ میلیارد ډالر ګټه کې بدلون نه راولي.
دې کمپنۍ د تېلو ډېرېدونکې تقاضا او غوښتنې ته په کتو ویلي چې خدمات به نور هم پراخ کړي.
د ارامکو رییس او اجرائیه مشر امین ناصر وايي "موږ فکر کوو چې پر لنډمهاله نړیوالو وړاندوینو له مخ پر ځوړ اقتصادي فشارونو سره سره به روانه لسیزه کې د تېلو تقاضا همداسې په ډېرېدو وي."
د تېلو بیې د اوکرایین له جګړې مخکې هم له دې کبله په لوړېدو وې چې د نړۍ اقتصاد له کورونا وبا د رغېدو په حال کې و او تېلو ته اړتیا په ډېرېدو وه.
پر ارامکو سربېره د اېکسون موبیل، شېورون او برېتش پېترولیم (بي پي) په څېر نړۍ د تېلو نورو سترو تولېدونکو هم روان کال پام وړ لوړه ګټه ثبت کړې.
په دې توګه له دولتونو هم دا غوښتنه په ډېرېدو ته چې له دغو شرکتونو ډېرې مالیې او ټکسونه واخلي.
سعودي عربستان د تېلو د سترو صادرونکو اوپېک سازمان کې تر ټولو ستر تولېدونکی دی.
د اوپېک غړي تېره اوونۍ پر دې سلا شول چې د بیو ټیټېدو لپاره د تېلو تولید یو څه ډېر کړي.
خو د تولید د زیاتوالي دا ژمنه هغومره نه ده چې تمه او غوښتنه یې کېږي.
