تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
ایګبو ژبې ته ژباړل شوی قران کریم لومړی ځل چاپ شو
په نایجریا کې لومړی ځل هغه قران کریم چاپ او خپور شوی، چې د یوې ځايي ژبې ایګبو ژباړه هم ورسره لیکل شوې ده.
په همدې مناسبت د نایجریا پلازمېنې ابوجا په انصار الدین جومات کې یو لړ مراسم ترسره شول.
ایګبو ژبې د قران کریم ژباړن محمد مورتالا چوکویومیکا بي بي سي ته وویل، له عربي یې ایګبو ته د ټول قران کریم ژباړه په پنځو کلونو کې بشپړه کړه.
ایګبو ژبه د نایجریا په سویل ختیځو سیمو کې ویله کېږي، چې ډېری اوسېدونکي یې مسیحیان دي.
نایجریا د افریقیا تر ټولو ګڼ نفوسه هېواد دی، چې په شمال کې یې ډېری مسلمانان او په سویل کې یې اکثریت مسیحیان اوسي.
ایګبو ژبې ته د قران کریم ژباړه کوونکی محمد مورتالا چوکویومیکا په ۱۹۸۹ کال کې مسلمان شوی او له اسلامي زدکړو وروسته دیني عالم شو.
نوموړي وویل، ایګبو ژبې ته د ژباړل شوي قران کریم سلګونه ټوکه یې د دې لپاره چاپ کړي، چې د ایګبو ژبې ویونکو ''خویندو او وروڼو ته د الله تعالی پیغام ورسېږي. ''
د یادونې ده، چې دوو نورو ځايي ژبو هوسه او یوربا ته له مخکې قران کریم ژباړل شوی دی، چې په نایجریا کې ګڼ شمېر ویونکي لري.
